7 ᔕᐌᓕᑖᑯᓯᐗᒃ ᑳ ᔕᐌᓕᒋᑫᒋᒃ; ᐌᓴ ᑲᑕ ᒥᓛᐗᒃ ᔕᐌᓕᒋᑫᐎᓂᓕᐤ᙮
ᓀᔥᑕ ᒫᑲ ᑭᔐᐙᑐᑖᑐᒃ, ᐁ ᔕᐎᑌᐁᔦᒃ, ᐁ ᐌᐯᓕᑕᒫᑐᔦᒃ, ᑖᐱᔅᑯᒡ ᑭᒋᒪᓂᑐ ᙭ ᐅᒋ ᐁ ᑮ ᐌᐯᓕᑕᒫᑖᒃ᙮
ᐌᓴ ᐎᓚ ᑲᑕ ᐋᔭᐤ ᑎᐹᔅᑯᓂᑯᓯᐎᓂᓕᐤ ᐁᑳ ᐁ ᐊᓯᒋᐸᓕᓕᒃ ᔕᐌᓕᒋᑫᐎᓂᓕᐤ, ᐁᑳ ᑳ ᑮ ᐙᐸᑎᓕᐌᑦ ᔕᐌᓕᒋᑫᐎᓂᓕᐤ; ᔕᐌᓕᒋᑫᐎᓐ ᒫᑲ ᒥᓚᐙᑕᒧᒪᑲᓐ ᐁ ᔖᑯᒋᑳᑌᒃ ᑎᐹᔅᑯᓂᑫᐎᓐ᙮
ᒫᑲ ᐊᓂᒪ ᑲᑫᑕᐌᓕᑕᒧᐎᓐ ᐃᔥᐱᒥᒃ ᑳ ᐅᒋᐸᓕᒃ ᓃᔥᑕ ᐸᔦᑲᓐ, ᐁᑯ ᑳᔮᒣᐗᓐ, ᓗᑳᑕᓐ, ᐌᑕᓐ ᑭᒋ ᔑᑭᒋᑳᑌᒃ, ᐁ ᓵᑲᔅᑭᓀᒃ ᑭᔐᐙᑎᓯᐎᓐ ᓀᔥᑕ ᒥᓗ ᒥᓂᔕ, ᐁᑳ ᐁ ᑶᑕᐎᐃᑌᓕᑕᒧᒪᑲᒃ, ᐁᑳ ᓀᔥᑕ ᐁ ᐊᔭᒥᐊᑳᓱᒪᑲᒃ᙮
ᐁᐗᑯ ᐌᒋ ᐳᔅᑎᔥᑲᒧᒃ, ᑖᐱᔅᑯᒡ ᐅ ᐙᐌᓛᐸᒫᑲᓇ ᑭᒋᒪᓂᑐ, ᐯᓓᑭᓯᔦᒃ ᓀᔥᑕ ᓯᐋᑭᐃᑲᐎᔦᒃ, ᔕᐌᓕᒋᑫᐎ ᒥᑌᐃ, ᑭᔐᐙᑎᓯᐎᓐ, ᑕᐸᑌᓕᒧᐎᓐ, ᓗᔅᐱᓯᐎᓐ, ᔑᐱᓚᐌᓯᐎᓐ;
ᒫᑲ ᓵᑭᐃᑯᒃ ᑭᓚᐗᐤ ᐊᓂᑭ ᑳ ᐸᒀᑎᑖᑾᒃ, ᓀᔥᑕ ᒥᓗᑐᑖᑫᒃ, ᓀᔥᑕ ᐋᐎᐃᐌᒃ, ᐁᑳ ᑫᒀᓐ ᒥᓇ ᐁ ᐸᑯᓭᓕᑕᒣᒃ: ᑭ ᑎᐸᐊᒫᑯᓯᐎᓂᐗᐤ ᒫᑲ ᑲᑕ ᒥᔕᐤ, ᓀᔥᑕ ᑭ ᑳ ᐅᑕᐙᔑᒥᔑᒥᑯᐗᐤ ᐊᓇ ᒥᔭᐗᒋ ᐃᔅᐯᓕᑖᑯᓯᑦ: ᐌᓴ ᐎᓚ ᑭᔐᐙᑐᑕᐌᐤ ᐊᓂᐃ ᐁᑳ ᑳ ᓇᓈᔅᑯᒧᓕᒋ ᓀᔥᑕ ᑳ ᒪᒋᑣᓕᒋ᙮
ᐌᓴ ᑭᒋᒪᓂᑐ ᓇᒪᐎᓚ ᒪᒑᑎᓯᐤ ᑭᒋ ᐗᓂᑭᔅᑭᓯᑐᑕᒃ ᑭᑦ ᐊᑑᔅᑫᐎᓂᐗᐤ ᓀᔥᑕ ᑭ ᓵᑭᐃᐌᐎ ᐋᐸᑎᓯᐎᓂᐗᐤ, ᑳ ᑮ ᐙᐸᑎᓕᐌᔦᒃ ᐅᑦ ᐃᔑᓂᑳᓱᐎᓂᒃ, ᐁ ᑮ ᐅᒋᔅᑕᒪᐌᑾᒃ ᐅᐸᓓᑭᓴᒃ, ᑫᔮᐸᒡ ᓀᔥᑕ ᐁ ᐅᒋᔅᑕᒪᐌᑾᒃ᙮
ᐁᐗᑯ ᐅᒋ ᐁᑯᔑ ᓱᑭᑌᐁᐎ ᐯᒋ ᓈᑖᑕᐤ ᔕᐌᓕᒋᑫᐎ ᐅᑭᒪᐗᐱᐎᓐ, ᑭᒋ ᑮ ᐅᑎᓇᒪᒃ ᑭᑎᒫᑫᓕᒋᑫᐎᓐ, ᓀᔥᑕ ᑭᒋ ᒥᔅᑲᒪᒃ ᔕᐌᓕᒋᑫᐎᓐ ᑭᒋ ᐎᒋᐃᑯᔭᒃ ᐃᐊᓕᒥᓯᔭᑯ᙮
ᑭᓚᐗᐤ ᑳᔮᔥ ᐁᑳ ᑳ ᑮ ᐃᑕᔅᑳᓀᓯᔦᒃ ᐁ ᐃᓕᓕᐎᔦᒃ, ᒫᑲ ᐊᓄᒡ ᑯᑎᓕᓕᒥᒥᑯᐗᐤ ᑭᒋᒪᓂᑐ: ᐁᑳ ᑳ ᑮ ᒥᓕᑲᐎᔦᒃ ᔕᐌᓕᒋᑫᐎᓐ, ᐊᓄᒡ ᒫᑲ ᑳ ᑮ ᒥᓕᑲᐎᔦᒃ ᔕᐌᓕᒋᑫᐎᓐ᙮
ᐃᔅᐱ ᒫᑲ ᓂᐃᐹᐎᔦᑯ ᐁ ᐋᔭᒥᐋᔦᒃ, ᐌᐯᓕᑕᒫᑫᒃ ᑮᔥᐱᓐ ᐊᐌᓇ ᐙᔦᔥ ᓈᔦᑕᐌᓕᒣᒃ; ᑯᑖᐎᐗᐤ ᑭᒋᑭᔑᑯᒃ ᑳ ᐃᑖᑦ ᑭᒋ ᐌᐯᓕᑕᒫᑖᒃ ᑮ ᐗᓂᑎᐎᓂᐙᐗ᙮
ᓂᓚ ᑳᔮᔥ ᑳ ᑮ ᐹᔅᑖᒥᐌᔅᑭᔮᓐ, ᓀᔥᑕ ᑳ ᑮ ᑲᒀᑕᑭᐃᐌᔮᓐ, ᓀᔥᑕ ᑳ ᑮ ᒪᒋᑐᑖᑫᔮᓐ; ᒫᑲ ᓂ ᑮ ᒥᓕᑲᐎᓐ ᔕᐌᓕᒋᑫᐎᓐ, ᐋᓉᔦᓕᑕᒧᐎᓂᒃ ᐁ ᑮ ᑐᑕᒫᓐ ᐁᑳ ᐁ ᑮ ᑭᔅᑫᓕᑕᒫᓐ᙮
ᐅᔥᑭᓂᑭᔅᑴᐗᒃ ᐅᒋ ᒫᑲ, ᓇᒪᐎᓚ ᓂ ᑮ ᐃᑕᔓᒥᒃ ᑭᒋᒪᓂᑐ: ᐁᓕᐌᒃ ᒫᑲ ᓂ ᐎᑌᐤ ᑳ ᐃᑌᓕᑕᒫᓐ, ᑖᐱᔅᑯᒡ ᐊᐌᓇ ᑳ ᑮ ᒥᓕᑯ ᔕᐌᓕᒋᑫᐎᓂᓕᐤ ᐅᑎᐯᓕᒋᑫᐗ ᑭᒋ ᒀᔭᔅᑭᑎᑦ᙮
ᐁᓕᐌᒃ ᒫᑲ, ᐅᒪ ᐅᒋ ᓂ ᑮ ᒥᓕᑲᐎᓐ ᔕᐌᓕᒋᑫᐎᓐ, ᓂᓚ ᒪᐗᒋ ᓂᑳᓐ ᑭᒋ ᐅᒋ ᐙᐸᑎᓕᐌᑦ ᒥᓯᐌ ᔑᐱᓚᐌᓯᐎᓂᓕᐤ, ᑭᒋ ᑭᔅᑭᓄᐙᐸᑕᑭᒃ ᐊᓂᑭ ᐁᔥᑾ ᑫ ᑖᐺᔦᓕᒫᒋᒃ ᑳᑭᑫ ᐱᒫᑎᓯᐎᓂᒃ ᐃᔑ᙮
ᐁ ᐙᐸᑕᒫᒃ ᒫᑲ ᐁ ᐋᔮᔮᒃ ᐅᒪ ᐋᔭᒥᐋᐎ ᐊᑐᔅᑫᐎᓐ, ᑳ ᑮ ᐃᔑ ᒥᓕᑲᐎᔮᒃ ᔕᐌᓕᒋᑫᐎᓐ, ᓇᒪᐎᓚ ᓂ ᔖᑯᑌᐋᓈᓐ;
ᐌᓴ ᑖᐱᔅᑯᒡ ᐅᑖᓈᒃ ᑳ ᑮ ᐃᔑ ᐁᑳ ᑖᐺᑕᐌᑯᐸᓐ ᑭᒋᒪᓂᑐ, ᐁᓕᐌᒃ ᒫᑲ ᐊᓄᒡ ᐁ ᑮ ᒥᓕᑳᐎᔦᒃ ᔕᐌᓕᒋᑫᐎᓐ ᐅᑦ ᐋᓉᔦᓕᑕᒧᐎᓂᐗᐤ ᐅᒋ:
