11 ᐃᔅᐱ ᒫᑲ ᑳ ᑮ ᐅᑎᓈᒋᒃ, ᑮ ᒥᑕᐙᒣᐗᒃ ᑳ ᑎᐯᓕᑕᒥᓕᒋ ᐙᔅᑳᔨᑲᓂᓕᐤ,
ᐁ ᑭᑕᐊᒪᐎᔭᒥᒋᒃ ᑭᒋ ᐋᔭᒥᐊᑭᒋᒃ ᒉᓐᑖᐃᓚᒃ ᑭᒋ ᐱᒫᒋᐋᑲᓂᐎᒋᒃ, ᑭᒋ ᑌᐱᐸᓕᑖᒋᒃ ᐅ ᒪᒋᑐᑕᒧᐎᓂᐗᐤ ᒧᔕᒃ: ᐌᓴ ᐋᑯᓚᐌᓯᐎᓂᓕᐤ ᒥᑐᓂ ᐅᑎᑎᑯᐗᒃ᙮
ᐃᔅᐱ ᒫᑲ ᐎᐋᐸᑕᑭᒃ, ᒥᓯᐌ ᑮ ᐙᔦᔥ ᐃᑗᐗᒃ, ᐁ ᐃᑗᒋᒃ, ᓇᑕᐎ ᒪᐗᑎᑌᐤ ᐃᓕᓕᐗ ᑳ ᒪᒋᑣᓕᒋ᙮
ᐅᑯ ᐁᐗᒀᓂᑭ ᐅᒥᑕᐌᔅᑲᒃ, ᐅᑕᑖᒥᒥᐌᔅᑲᒃ, ᐁ ᓄᔅᐱᓇᑕᑭᒃ ᑎᐱᓚᐌ ᐅ ᒪᒋ ᓇᑕᐌᓕᑕᒧᐎᓂᐙᐗ; ᐅᑐᓂᐗᐗ ᒫᑲ ᐋᔭᒥᒪᑲᓂᓕᐗ ᑭᒋ ᑭᔅᑌᓕᒧᐎ ᐋᔭᒥᐎᓇ, ᐁ ᒥᓨᐸᒫᒋᒃ ᐃᓕᓕᐗ ᐁ ᐃᔑᓈᑯᓯᓕᒋ ᑭᒋ ᐅᒋ ᐅᑎᓯᒋᒃ᙮
ᐃᔅᐱ ᒫᑲ ᒎᐗᒃ ᐎᐋᐸᒫᒋᒃ ᑳ ᒫᐗᒋᐃᑑᓕᒋ ᐃᓕᓕᐗ, ᑮ ᓵᑲᔅᑭᓀᐗᒃ ᐅᑌᓕᑕᒧᐃᓂᓕᐤ, ᓀᔥᑕ ᐁ ᒪᒋ ᐋᓕᒧᑕᑭᒃ ᐊᓂᐃ ᑫᒀᓇ ᑳ ᑎᐹᑐᑕᒥᓕᒋ ᐹᓚ, ᐁ ᐋᓉᑖᑫᒋᒃ ᓀᔥᑕ ᐁ ᐹᔅᑖᒧᒋᒃ᙮
ᐸᕋᓯᔭᒃ ᒫᑲ ᓀᔥᑕ ᐅᒪᓯᓇᐃᑫᐗᒃ ᑮ ᐗᔑᔥᑕᐌᓕᑕᒶᒃ, ᐁ ᐃᑗᒋᒃ, ᐊᐗ ᐃᓕᓕᐤ ᐅᑎᓀᐤ ᐅᒪᒋᑣᐗ, ᓀᔥᑕ ᐎᒋᒥᒋᓱᒣᐤ᙮
ᒫᑲ ᐅ ᒪᓯᓇᐃᑫᒥᐙᐗ ᓀᔥᑕ ᐸᕋᓯᔭᒃ ᑮ ᐙᔦᔥ ᐃᑎᒣᐗᒃ ᐅ ᑭᔅᑭᓄᐊᒪᐙᑲᓇ, ᐁ ᐃᑗᒋᒃ, ᑖᓀᑭ ᐌᒋ ᐎᒋᒥᒋᓱᒣᑾᒃ ᓀᔥᑕ ᐎᒋᒥᓂᑴᒣᑾᒃ ᐸᑉᓕᑳᓇᒃ ᓀᔥᑕ ᐅᒪᒋᑖᐗᒃ?
ᒫᑲ ᐃᔅᐱ ᐊᓂᑭ ᓃᔥᑕᒻ ᑳ ᐊᑐᑖᑲᓂᐎᒋᒃ ᑌᑯᔑᑭᒃ, ᐊᐙᓯᑌ ᓂ ᑳ ᒥᓕᑲᐎᓈᓐ ᑮ ᐃᑌᓕᑕᒶᒃ; ᐎᓚᐗᐤ ᓀᔥᑕ ᑮ ᒥᓛᐗᐤ ᒥᓯᐌ ᐯᐯᔭᒃ ᐃᓕᓕᐤ ᐯᔭᒃ ᔔᓕᐊᓈᐱᔅᑯᔕ᙮
ᐁ ᐃᑗᒋᒃ, ᐅᑯ ᒫᒋᒡ ᑳ ᑕᑯᔑᑭᒃ ᐯᔭᒃ ᑎᐹᔨᑲᓐ ᐱᓯᒧᑳᓂᒃ ᐱᑯ ᑮ ᐊᑑᔅᑫᐗᒃ, ᑖᐱᔅᑯᒡ ᓂᓚᓈᓐ ᒫᑲ ᑭ ᑮ ᑐᑕᐙᐗᒃ, ᑳ ᑮ ᐊᓕᒥᐃᑯᔮᒃ ᐋᐸᑎᓯᐎᓐ ᓀᔥᑕ ᐁ ᑭᔖᔥᑌᒃ ᐁᔅᑲᓂ ᑭᔑᑳᐤ᙮
ᐌᓴ ᑲᑕ ᑮ ᐊᑖᐙᑲᓂᐗᓄᐸᓐ ᐊᐙᓯᑌ ᐃᔥᐱᔥ ᓂᔅᑡᐤ ᒥᑖᑐᒥᑕᓇᐤ ᔓᓕᐊᓈᐱᔅᑯᔕ, ᐁᑯ ᒫᑲ ᑭᒋ ᒥᓕᑣᐸᓐ ᐅᑭᑎᒫᑭᓯᐗᒃ᙮ ᑮ ᓈᔦᑕᐌᓕᒣᐗᒃ ᒫᑲ᙮
ᒎᐗᒃ ᒫᑲ ᑮ ᐙᔦᔥ ᐃᑌᓕᒣᐗᒃ, ᐁ ᑮ ᐃᑗᓕᒋ, ᓂᓚ ᐁᐗᑯ ᐊᓚᑯᓇᐤ ᑭᒋᑭᔑᑯᒃ ᑳ ᐅᒋᐸᓕᑦ᙮
ᐃᔅᐱ ᒋᓴᔅ ᑫᔅᑫᓕᑕᒃ ᐅ ᒥᑐᓀᓕᒋᑲᓂᒃ ᐅ ᑭᔅᑭᓄᐊᒪᐙᑲᓇ ᐁ ᐙᔦᔥ ᐃᑌᓕᑕᒥᓕᒋ, ᑮ ᐃᑌᐤ, ᑭ ᐙᓯᔅᑕᐌᓕᑕᒥᐃᑯᓐ ᓈ ᐅᒪ?
