54 ᐊᓂᒪ ᒫᑲ ᐁᐗᑯ ᐋᔦᔅᑲᐎ ᑭᔑᑲᐤ, ᐋᔭᒥᐁᑭᔑᑲᐤ ᒫᑲ ᑮ ᐯᔓᓈᑾᓐ᙮
ᐃᔅᐱ ᒥᓇ ᐁ ᑭᔑᑳᒃ, ᑭᐃᔥᑾ ᐊᓂᒪ ᐁ ᐋᔦᔅᑲᐎ ᑭᔑᑳᒃ, ᑭᒋ ᓵᓵᑭᐎᓕᐌᐎᓕᓕᐗᒃ ᓀᔥᑕ ᐸᕋᓯᔭᒃ ᑖᐱᔅᑯᒡ ᑮ ᐯᒋ ᓈᑌᐗᒃ ᐹᐃᓚᑕ,
ᒎᐗᒃ ᒫᑲ, ᐁ ᐋᔦᔅᑲᐎᓈᓂᐗᒃ, ᒥᔭᐗ ᐁᑳ ᐋᔑᑌᐋᑎᑯᒃ ᑭᒋ ᐃᑕᑾᓂᓕᑭ ᐁ ᐋᔭᒥᐁᑭᔑᑳᓕᒃ, (ᐌᓴ ᐊᓂᒪ ᐁ ᐋᔭᒥᐁᑭᔑᑳᒃ ᑮ ᐃᔅᐯᓕᑖᑾᓐ,) ᑮ ᓇᑐᑕᒪᐌᐗᒃ ᐹᐃᓚᑕ ᐅᔅᑳᑎᓕᐗ ᑭᒋ ᓈᑣᐃᑳᑌᓕᑭ, ᓀᔥᑕ ᑭᒋ ᑭᑐᑕᐋᑲᓂᐎᓕᒋ᙮
ᐁᑯ ᒫᑲ ᐃᔅᐱ ᐌᑖᑯᔒᒃ, (ᐁ ᐋᔦᔅᑲᐎᑭᔑᑳᒃ, ᐁᐗᑯ ᐊᓂᒪ ᐁ ᑭᔑᑳᒃ ᐸᒧᔑ ᐋᔭᒥᐁᑭᔑᑳᒃ,)
ᐁᑯᑕ ᒫᑲ ᐯᒥᔑᒫᒋᒃ ᒋᓴᓴ, ᒎᐗᒃ ᐅᑦ ᐋᔦᔅᑲᐎ ᑭᔑᑳᒥᐗᐤ ᐅᒋ; ᐌᓴ ᑭᔑᐙᒃ ᑮ ᐃᑕᑾᓐ ᒋᐹᔨᑲᒥᒃ᙮
ᐁᑯ ᒣᒀᒡ ᒫᑲ ᑮ ᐋᔦᔅᑲᐎᑖᓂᐗᓐ ᒥᔮᔥᑳᑫᐎ ᒪᑯᔐᐎᓐ, ᓀᔥᑕ ᓈᓐᑕᐤ ᐁ ᐋᐱᑕᑭᔑᑳᒃ: ᐁᑯ ᐁᑖᑦ ᒎᐗ, ᑲᓇᐙᐸᒥᒃ ᑭ ᑭᒋᐅᑭᒫᒥᐗᐤ!
ᑮ ᓂᑎᓇᒬᐤ ᒫᑲ, ᓀᔥᑕ ᑮ ᐌᐌᑭᓇᒬᐤ ᐸᐸᑭᐙᔮᓀᑭᓄᒃ, ᓀᔥᑕ ᑮ ᐱᒥᑎᑕᐌᐤ ᒋᐹᔨᑲᒥᑯᒃ ᑳ ᒧᓇᐱᔅᑲᐃᑳᑌᒃ ᐊᓯᓂᒃ, ᐃᑕ ᐁᑳ ᐊᐌᓇ ᐁ ᓂᑕ ᐱᒥᔑᒫᑲᓂᐎᑦ᙮
