29 ᒫᑲ ᓂᓚ ᓂ ᑭᔅᑫᓕᒪᐤ: ᐌᓴ ᐎᓚ ᐁᑯᑕ ᐌᒋᔮᓐ, ᐎᓚ ᓀᔥᑕ ᓂ ᑮ ᐯᒋᑎᔕᐅᒃ᙮
ᐁᓕᐌᒃ ᒫᑲ ᓇᒪᐎᓚ ᑮ ᐅᒋ ᑭᔅᑫᓕᒪᐗᐤ; ᒫᑲ ᓂᓚ ᓂ ᑭᔅᑫᓕᒪᐤ: ᑮᔥᐱᓐ ᒫᑲ ᐃᑗᔮᓀ, ᓇᒪᐎᓚ ᓂ ᑭᔅᑫᓕᒪᐤ, ᓂ ᑳ ᑭᓛᔅᑭᔅᑭᓐ ᑖᐱᔅᑯᒡ ᑭᓚᐗᐤ: ᒫᑲ ᓂ ᑭᔅᑫᓕᒪᐤ, ᓀᔥᑕ ᓂ ᑲᓇᐎᑕᐙᓐ ᐅᑦ ᐃᑗᐎᓐ᙮
ᒥᓯᐌ ᑫᒀᓇ ᓂ ᐸᑭᑎᓇᒫᒃ ᓄᑖᐎ: ᓇᒪᐎᓚ ᐊᐌᓇ ᓀᔥᑕ ᑭᔅᑫᓕᒣᐤ ᐅᑯᓯᓯᒫᐗ, ᐎᓚ ᐱᑯ ᐅᑖᐎᒪᐤ; ᓇᒪ ᓀᔥᑕ ᐊᐌᓇ ᑭᔅᑫᓕᒣᐤ ᐅᑖᐎᒫᐗ, ᐎᓚ ᐱᑯ ᐅᑯᓯᓯᒪᐤ, ᐊᓂᐃ ᓀᔥᑕ ᐅᑯᓯᓯᒪᐤ ᑫ ᐙᐸᑎᓛᑴ᙮
ᑖᐱᔅᑯᒡ ᐁ ᑮ ᐯᒋᑎᔕᐅᔭᓐ ᐊᔅᑮᒃ, ᐁᑯ ᓀᔥᑕ ᑖᐱᔅᑯᒡ ᑳ ᐃᑎᔕᐗᑭᒃ ᐊᔅᑮᒃ᙮
ᓇᒪᐎᓚ ᐊᐌᓇ ᐁ ᑮ ᐙᐸᒫᑦ ᐅᑖᐎᒪᐗ, ᐱᑯ ᐊᓇ ᑭᒋᒪᓂᑐᒃ ᑳ ᐅᒌᑦ, ᐁᐗᑯ ᑳ ᑮ ᐙᐸᒫᑦ ᐅᑖᐎᒪᐗ᙮
ᓇᒪᐎᓚ ᐊᐌᓇ ᐎᔅᑳᒡ ᐅᒋ ᐙᐸᒣᐤ ᑭᒋᒪᓂᑐᐗ: ᐯᔭᑯᑯᓯᓵᓐ, ᑳ ᐃᑖᑦ ᐅ ᐱᓗᒧᐎᓂᓕᒃ ᐅᑖᐎᒪᐗ, ᑮ ᑭᔅᑫᓕᑖᑯᐁᐤ᙮
ᓂ ᑮ ᐙᐸᑌᓈᓐ ᒫᑲ, ᓀᔥᑕ ᓂ ᐎᑌᓈᓐ ᐅᑖᐎᒪᐤ ᐁ ᑮ ᐯᒋᑎᔕᐙᑦ ᐅᑯᓯᓯᒪᐗ ᑭᒋ ᐱᒫᒋᑖᓕᒋ ᐊᔅᑭᓕᐤ᙮
ᐅᑕ ᑳ ᐃᔑ ᓄᑯᑣᑯᔭᒃ ᑭᒋᒪᓂᑐ ᐅ ᓵᑭᐃᐌᐎᓐ, ᑭᒋᒪᓂᑐ ᐁ ᑮ ᐃᔑᑎᔕᐙᑦ ᑳ ᐯᔭᑯᓕᒋ ᐅᑯᓯᓴ ᐊᔅᑮᒃ, ᐎᓚ ᑭᒋ ᐅᒋ ᐱᒫᑎᓯᔭᒃ᙮
(ᐌᓴ ᐊᓂᒪ ᐱᒫᑎᓯᐎᓐ ᑮ ᓄᑯᑖᑲᓂᐗᓐ, ᓂ ᑮ ᐙᐸᑌᓈᓐ ᒫᑲ, ᓀᔥᑕ ᓂ ᑎᐹᑐᑌᓈᓐ, ᑭ ᐙᐸᑎᓕᑎᓈᓐ ᒫᑲ ᐊᓂᒪ ᑳᑭᑫ ᐱᒫᑎᓯᐎᓐ, ᑳ ᑮ ᐎᒋᑕᔑᑫᒥᑯᑦ ᐅᑖᐎᒪᐤ, ᓀᔥᑕ ᑳ ᑮ ᐙᐸᑎᓕᑲᐎᔮᒃ;)
ᒋᓴᔅ ᐁ ᑭᔅᑫᓕᑕᒃ ᐅᑖᐎᒪᐗ ᐁ ᑮ ᒥᓕᑯᑦ ᒥᓯᐌ ᑫᒀᓇ ᐅᒋᒌᒃ, ᓀᔥᑕ ᑭᒋᒪᓂᑐᒃ ᐁ ᐅᒌᑦ, ᓀᔥᑕ ᑭᒋᒪᓂᑐᐗ ᐁ ᓈᑖᑦ;
ᑖᐱᔅᑯᒡ ᐅᑖᐎᒪᐤ ᐁ ᐃᔑ ᑭᔅᑫᓕᒦᑦ, ᐁᑯ ᓀᔥᑕ ᐁᔑ ᑭᔅᑫᓕᒪᒃ ᐅᑖᐎᒪᐤ: ᓂ ᐱᒥᑎᑖᓐ ᒫᑲ ᓂ ᐱᒫᑎᓯᐎᓐ ᒫᓂᔥᒑᓂᔕᐤ ᐅᒋ᙮
