40 ᓇᒪᐎᓚ ᓀᔥᑕ ᑭ ᐎ ᐯᒋ ᓈᔑᓇᐗᐤ, ᑭᒋ ᐋᔭᔦᒃ ᐱᒫᑎᓯᐎᓐ᙮
ᐁᐗᑯ ᐅᒪ ᒫᑲ ᓂᔑᐗᓈᒋᑕᒧᐎᓐ, ᐙᔅᑌᐎᓐ ᐁ ᑮ ᑕᑯᔑᓄᒪᑲᒃ ᐊᔅᑮᒃ, ᐃᓕᓕᐗᒃ ᒫᑲ ᐊᐙᓯᑌ ᑮ ᓵᑭᑖᐗᒃ ᐗᓂᑎᐱᔅᑭᓯᐎᓂᓕᐤ ᐃᔥᐱᔥ ᐙᔅᑌᐎᓂᓕᐤ, ᐁ ᒫᓛᑕᓂᓕᑭ ᐅᑦ ᐋᔨᑎᐎᓂᐗᐗ᙮
ᑮ ᐯᒋ ᓈᑌᐤ ᐊᓂᐃ ᑳ ᑎᐱᓚᐌᐎᓰᑦ, ᓇᒪᐎᓚ ᒫᑲ ᐅᒋ ᐅᑎᓂᑯ ᐊᓂᐃ ᑳ ᑎᐱᓚᐌᐎᓰᑦ᙮
ᒥᓯᐌ ᐊᓂᐃ ᑳ ᒥᓕᑦ ᐅᑖᐎᒪᐤ ᓂ ᑳ ᐯᒋ ᓈᑎᑾᒃ: ᐊᓇ ᓀᔥᑕ ᑳ ᐯᒋ ᓈᔑᑦ ᔮᓕᑌᓪ ᓇᒪᐎᓚ ᓂ ᑳ ᐗᓚᐎᐌᐱᓇᐤ᙮
ᐅ ᒋᕉᓴᓚᒻ, ᒋᕉᓴᓚᒻ, ᑳ ᓂᐸᐊᒋᒃ ᐅᑭᔅᑭᐙᐃᑫᐗᒃ, ᓀᔥᑕ ᑳ ᐱᒶᓯᓇᐗᒋᒃ ᐊᓂᑭ ᑳ ᐃᑎᔕᐊᒫᑲᐎᔭᓐ, ᑖᓐ ᐁᔅᐱᒋ ᒥᒉᑣᒃ ᑫ ᐎ ᒪᐗᓴᑲᓇᒀᐸᓐ ᑭᑦ ᐊᐙᔑᒥᔕᒃ, ᑖᐱᔅᑯᒡ ᐹᑲᐋᒀᓐ ᐁ ᒪᐗᓴᑲᓇᑦ ᐅ ᐹᑲᐋᒀᓂᔑᒪ ᔑᐹ ᐅ ᑕᑾᑾᓂᒃ, ᓇᒪᐎᓚ ᒫᑲ ᑭ ᐯᑌᓇᐗᐤ!
ᐊᒑᒃ ᒫᑲ ᓀᔥᑕ ᐅᔥᑭᑴᐙᓐ ᐃᑗᐗᒃ, ᐋᔅᑕᒻ᙮ ᐊᓇ ᒫᑲ ᑳ ᐯᑕᒃ ᐁᑯᔑ ᑲᑕ ᐃᑗᐤ, ᐋᔅᑕᒻ᙮ ᐊᓇ ᓀᔥᑕ ᑳ ᓄᑌᔮᐸᑴᑦ ᐁᑯᔑ ᑲᑕ ᐯᒋ ᐃᑐᑌᐤ: ᐊᐌᓇ ᒫᑲ ᐁᑌᓕᑕᒧᑴ, ᐁᑯᔑ ᒧᔐ ᑲᑕ ᐅᑎᓇᒻ ᐱᒫᑎᓯᐎᓂ ᓂᐱᓕᐤ᙮
ᐌᓴ ᑎᐸᐊᒫᑫᐎᓇ ᑳ ᒥᓕᐌᒪᑲᒃ ᒪᒋᑡᐎᓐ ᐁᐗᑯ ᓂᐱᐎᓐ, ᒫᑲ ᑭᒋᒪᓂᑐ ᐅ ᒥᓕᐌᐎᓐ ᐁᐗᑴᓕᐤ ᑳᑭᑫ ᐱᒫᑎᓯᐎᓐ ᐎᓚ ᐅᒋ ᒋᓴᔅ ᙭ ᑭ ᑎᐯᓕᒋᑫᒥᓇᐤ᙮
ᐁᐗᑴᓕᐤ ᒫᑲ ᐅᑦ ᐃᑌᓕᑕᒧᐎᓐ ᐊᓇ ᑳ ᑮ ᐯᒋᑎᔕᐅᑦ, ᒥᓯᐌ ᑕᑐ ᐊᐌᓇ ᑳ ᐙᐸᒫᑦ ᐅᑯᓯᓯᒫᐗ, ᓀᔥᑕ ᑳ ᑖᐺᔦᓕᒫᑦ, ᑭᒋ ᐋᔮᑦ ᑳᑭᑫ ᐱᒫᑎᓯᐎᓂᓕᐤ: ᓂ ᑳ ᐗᓂᔥᑳᓇᐤ ᒫᑲ ᒫᒋᒡ ᑭᔑᑳᓕᑫ᙮
ᐁᑳᐎᓚ ᐋᐸᑎᓯᒃ ᑭᒋ ᐋᔮᔦᒃ ᐊᓂᒪ ᒥᒋᒻ ᑳ ᓂᔑᐙᓈᑕᒃ, ᒫᑲ ᑭᒋ ᐋᔮᔦᒃ ᐊᓂᒪ ᒥᒋᒻ ᑳᑭᑫ ᐱᒫᑎᓯᐎᓂᒃ ᑫ ᐃᔅᑯ ᐃᑕᑾᒃ, ᐃᓕᓕᐎᑯᓯᓵᓐ ᑫ ᒥᓕᑖᒃ: ᐌᓴ ᐁᐗᑯ ᑳ ᓱᑲᑭᒥᑯᑦ ᐅᑖᐎᒫᐗ᙮
ᑖᓐᑌ ᑫ ᑮ ᐅᒋ ᑖᐺᑕᒣᒃ, ᑭᓚᐗᐤ ᑳ ᑭᔅᑌᓕᑖᑯᐃᑐᔦᒃ, ᓀᔥᑕ ᐁᑳ ᑳ ᓈᓇᑕᐙᐸᑕᒣᒃ ᐊᓂᒪ ᑭᔅᑌᓕᑖᑯᓯᐎᓐ ᑭᒋᒪᓂᑐᒃ ᐱᑯ ᑳ ᐅᒋᒪᑲᒃ?
ᑮ ᐃᔑᑎᔕᐌᐤ ᒫᑲ ᐅᑦ ᐊᑑᔅᑫᓛᑲᓂᒪ, ᑭᒋ ᓇᑐᒫᓕᒋ ᐊᓂᐃ ᑳ ᑮ ᐎᑯᒥᒥᒋ ᐎᑭᑐᐎᓂᒃ: ᓇᒪᐎᓚ ᒫᑲ ᐎ ᐯᒋ ᐃᑐᑌᓕᐗ᙮
ᓈᓇᑕᐙᐸᑕᒧᒃ ᑭᒋ ᒪᓯᓇᐃᑫᐎᓇ; ᐌᓴ ᐁᑯᑕ ᑭᑦ ᐃᑌᓕᑌᓇᐗᐤ ᐁ ᐋᔮᔦᒃ ᑳᑭᑫ ᐱᒫᑎᓯᐎᓐ: ᐅᐅ ᓀᔥᑕ ᐁᐗᒀᓂᐃ ᑳ ᑎᐹᒋᒥᑯᔮᓐ᙮
ᓇᒪᐎᓚ ᓂᑦ ᐅᑎᓀᓐ ᑭᔅᑌᓕᑖᑯᓯᐎᓐ ᐃᓕᓖᒃ ᐅᒋ᙮
ᑭᒧᑎᔉ ᓇᒪᐎᓚ ᐯᒋ ᐃᑐᑌᐤ ᐱᑯ ᐙ ᑭᒧᑎᒋ, ᓀᔥᑕ ᐙ ᓂᐹᔨᐌᒋ, ᓀᔥᑕ ᐙ ᓂᔑᐗᓈᒋᐃᐌᒋ: ᓂᓚ ᓂ ᑮ ᐯᒋ ᐃᑐᑖᓐ ᑭᒋ ᐋᔮᒋᒃ ᐱᒫᑎᓯᐎᓂᓕᐤ, ᓀᔥᑕ ᐊᐙᓯᑌ ᑭᒋ ᐌᓗᒋᑖᒋᒃ᙮
