28 ᐁᑯ ᐋᒃᕆᐸ ᐁᑖᑦ ᐹᓚ, ᑫᑳᑦ ᑭ ᔖᑯᒋᒥᓐ ᑭᒋ ᒃᕆᔅᑎᔮᓂᐎᔮᓐ᙮
ᐃᔅᐱ ᒫᑲ ᑳ ᑮ ᒥᔅᑲᐙᑦ, ᑮ ᐯᔑᐌᐤ ᐊᓐᑕ ᐊᓐᑎᐊᑭᒃ᙮ ᑮ ᐃᑭᓐ ᒫᑲ ᒥᑐᓂ ᐯᔭᑾᐤ ᐁ ᐱᐳᒃ ᑮ ᒫᐗᒋᐃᑐᐗᒃ ᐊᓯᒋ ᒫᒪᐎᐋᔭᒥᐋᐗ, ᓀᔥᑕ ᑮ ᑭᔅᑭᓄᐊᒪᐌᐗᒃ ᒥᒉᑦ ᐃᓕᓕᐗ᙮ ᑭᔅᑭᓄᐊᒪᐗᑲᓇᒃ ᒫᑲ ᓃᔥᑕᒻ ᒃᕆᔅᑎᔮᓇᒃ ᑮ ᐃᔑᓂᑲᑖᑲᓂᐎᐗᒃ ᐊᓐᑕ ᐊᓐᑎᐊᑭᒃ᙮
ᑭ ᑳ ᐃᑐᑕᐃᑲᐎᓇᐗᐤ ᒫᑲ ᐅᑎᔥᑲᐤ ᐅᑎᐯᓕᒋᑫᐗᒃ ᓀᔥᑕ ᑭᒋᐅᑭᒫᐗᒃ ᓂᓚ ᐅᒋ, ᐎᓚᐗᐤ ᓀᔥᑕ ᒉᓐᑖᐃᓚᒃ ᑭᒋ ᑭᔅᑫᓕᑕᒥᐋᑲᓂᐎᒋᒃ᙮
ᐁᓕᐌᒃ ᒫᑲ ᑮᔥᐱᓐ ᐊᐌᓇ ᐎᓴᑫᓖᑕᒥᐋᑲᓂᐎᑌ ᑖᐱᔅᑯᒡ ᑳ ᒃᕆᔅᑎᔮᓂᐎᑦ, ᐁᑯᔑ ᐁᑳᐎᓚ ᑲᑕ ᓇᓀᐯᐎᓯᐤ; ᒫᑲ ᐅᒪ ᐅᒋ ᐁᑯᔑ ᑲᑕ ᑭᔅᑌᓕᒣᐤ ᑭᒋᒪᓂᑐᐗ᙮
ᒫᑲ ᓂ ᑮ ᐌᐱᓀᓈᓐ ᐊᓂᐃ ᑭᒧᒡ ᑫᒀᓇ ᓇᓀᐯᐎᓯᐎᓂᒃ ᑳ ᐃᑕᑾᑭ, ᐁᑳ ᐁ ᐱᒧᑌᔮᒃ ᑲᑳᔦᓕᓯᐃᓂᒃ, ᐁᑳ ᓀᔥᑕ ᐁ ᐙᔦᔑᐃᐌᐎ ᑕᑯᓇᒶᒃ ᑭᒋᒪᓂᑐ ᐅᑦ ᐋᔭᒥᐎᓐ; ᒫᑲ ᐁ ᑭᔅᑫᓕᑖᑯᑖᔮᒃ ᑖᐺᐎᓐ, ᓂ ᒥᓗᐋᒋᒥᑎᓱᔅᑕᐙᓈᓐ ᒥᓯᐌ ᑕᑐ ᐃᓕᓕᐤ ᐅ ᒥᑐᓀᓕᒋᑲᓂᒃ ᐁ ᑲᓇᐙᐸᒥᑦ ᑭᒋᒪᓂᑐ᙮
ᐹᓪ ᒫᑲ ᑮ ᐃᑗᐤ, ᓂ ᐸᑯᓭᓕᒪᐤ ᑭᒋᒪᓂᑐ, ᓇᒪᐎᓚ ᑭᓚ ᐱᑯ, ᒫᑲ ᐊᓯᒋ ᒥᓯᐌ ᐊᓂᑭ ᑳ ᐯᑖᐎᒋᒃ ᐊᓄᒡ ᐁ ᑭᔑᑳᒃ ᒫᒪᐤ ᑫᑳᑦ ᑭᒋ ᐃᑎᒋᒃ, ᓀᔥᑕ ᒥᑐᓂ ᑖᐱᔅᑯᒡ ᐁ ᐃᑎᔮᓐ, ᐱᑯ ᐅᐅ ᒫᒫᒋᑯᐱᓱᐎᓇ᙮
ᒣᒀᒡ ᒫᑲ ᐁ ᐋᓕᒧᑕᒥᓕᒋ ᒀᔭᔅᑭᑖᑎᓯᐎᓂᓕᐤ, ᓇᐃᓕᑯᒀᑎᓯᐎᓂᓕᐤ, ᓀᔥᑕ ᑎᐹᔅᑯᓂᑫᐎᓂᓕᐤ ᑫ ᐅᑎᒋᐸᓕᓕᒃ, ᐱᓕᒃᔅ ᑮ ᓇᓇᒥᐸᓕᐤ, ᓀᔥᑕ ᑮ ᓇᔥᑴᐗᔑᐃᐌᐤ, ᑭᑐᑌ ᐊᓄᒡ, ᐃᔅᐱ ᓇᐗᒡ ᓇᐃᐸᓕᐃᑯᔮᓀ, ᑭ ᑳ ᓇᑐᒥᑎᓐ᙮
ᐌᓴ ᐦᐁᕋᑦ ᑮ ᑯᔅᑌᐤ ᒑᓇ, ᐁ ᑭᔅᑫᓕᒫᑦ ᐁ ᒀᔭᔅᑭᑎᓕᒋ, ᓀᔥᑕ ᐁ ᐸᓓᑭᓯᓕᒋ ᐃᓕᓕᐗ, ᓀᔥᑕ ᑮ ᓈᑲᑕᐌᓕᒣᐤ; ᐃᔅᐱ ᒫᑲ ᑳ ᐯᑕᐙᑦ, ᒥᒉᑦ ᑫᒀᓇ ᑮ ᑐᑕᒻ, ᓀᔥᑕ ᓯᑭᓓᓯᐤ ᐁ ᐯᑕᐙᑦ᙮
ᑭᒋᐅᑭᒪᐤ ᐋᒃᕆᐸ, ᑭ ᑖᐺᑕᐙᐗᒃ ᓈ ᐅᑭᔅᑭᐙᐃᑫᐗᒃ? ᓂ ᑭᔅᑫᓕᑌᓐ ᐁ ᑖᐺᑕᒪᓐ᙮
