Uan 1 1:3 - El Nuevo Testamento en matsés

³ Aidi ubëd icquidobëtan isquin chuibansho tantiondashun chuibanec nebi. Ma mibitedi ubëd icquidobëd abentsëc yacbimbuec ma tabadnu, quequin chuibanec nebi. Adecbidi abentsëc yacbimbuec Nuquin Papabëd yec aton mado Esuquidistubëd yec quec ubitedi tabadacpadecbidi ma mibitedi tabadnu, quequin chuibanec nebi.

Uan 1 1:3 Referans Kwoze

Codinto 1 1:9

Ambi chiampicpadombuen naquidquio Nuquin Papa nec. Aidëmbi aton mado Esuquidistu Nuquin Icbo tantiamequin aidbëd abentsëc yacbimbuecnuc tabadmec.

Uanën dada uaid 17:3

Matsesën: Abipadquid utsi nibëdnuc Nuquin Papa abentsëcquiobi iquec. Adembidi Ambi Chomiondaidquio Esuquidistu nec, quequin tantiasho nuquibëd ënëdenquio yec tabadtequido icmendambi, Papa.

Hechos 4:20

Umbi isbuedbëta umbi tantiabued chuitequidquio nec. Aidi chuibanquin ëntiapimbo iquebi, quepanëdash Petedobëd Uan.

Uanën dada uaid 17:21

Mibëd ubi tëshnanenquio yacpadecbidi nuquibëd tëshnanenquio icquid aido icmeta, Papa. Adoac tantiananec abentsëc yacbimbuec tabadsho issun nuqui tantiesabon: Abimbuen cachitec. Nuquin Papan Chomiaidquien Esus nepanëdash, quequin tantiendac, Papa.

Pidipos 2:1

Abi tantiasho Esuquidistun: Utsibo chieshtomenquio icquin bëdambuen nabanmeta, caid icquin utsibobëd tantiananquin nabanquin dayacquio icmendac. Adecbidi mibitedi tantiananquin dayacquio icmiaid icquin natiamiaid utsibo icsho bëdambo icmendac. Adembidi Nuquin Papan aton Mayan abëd icmequin bëdambuec tabadquid icmiaidobidi nendac. Adecbidi utsibo natiasho issun nashunte bunquid icta.

Codinto 2 13:14

Adembidi: Nuquin Papan tantiaidquio nebi, quequin tantiaquiota. Adembidi: Aton Mayan Bëda ubëd iquec, quequin tantiec mibitedi tantiananquiota. Amen. Aidted chuiquin dada uaombi.

Uan 1 1:7

Nuquin Papan chiacpadombuen nabanquid yec Esus tantiaquid utsibobëd abentsëc yacbimbuec tabadquid nuquitedi nendac. Adquid nuqui icmenuec nuqui icsambuen naidtedi bedshunec abided cuidadec Nuquin Papan Mado Esuquidistu uënëspondash. Adec intac mëyanec uënësondaidënquio nuqui icsambuen naidtedi uqendac. Nuqui icsambuen nabued tantienquio yec bëshunendac.

Uan 1 1:1

Nidaid uabi yec icpampidi matsessun Esuquidistun chuibansho abëd icquidobëtan tantiapondambi. Aidi abëd icquidobëtan ispondambi. Adembidi mishpondambi. Aidi Nuquin Papabëd ënëdenquio yec tabadte chiannequidquio nepondash. Aidi Nuquin Papa tantiamianquidquio icsho mibitedi chuiquin dada uaic nebi.

Ebedeo 3:14

Tauambuen nuqui Esus tantiabenondacpadombuen chieshtoenquio icquin tantiec uënësabi yacpadembi ënenquio icquin tantiaquido yec Esusbëd tabadtequido nuqui nendac.

Pidipos 3:10

Aden tantiabenshun Esuquidistu tantiate bunquiebi. Nadatiambocquid icquin Nuquin Papan uincuenmiac nadatiambocquidbidi icquin Esusën bëdambuen tabadmetsiashi, quec Esus tantiate bunquiebi. Nuquin Papan chiacpadombuen nasho natiamequin mëyanac Esus uënëspanëdash. Adombuembidi Nuquin Papan namiacpadombuen nasho mëyanquin cuessunniac bëdambo ictsiabi.

Petedo 1 5:1

Tantia. Esus tantiaquidon chuiquido icsho mibitedi chuinu. Mibi padquid Esus tantiaquidon chuiquid nebi. Mëyanquioquin Esuquidistu natiamequin uënës uasho isondambi. Aidi abitedishun Icbo iquec padpidec nidaidën chouashun bëdamboshë yacno ubi tabadmendac, quiash bëdambo iquebi.

Ebedeo 3:1

Cun utsibo, Nuquin Papan: Cun matses nec, queshun ambi tantiacpadombuen Esus tantiamiaido mibitedi nec. Adoaido icquin Esuquidistu tantiaquionona. Nuquin Papan: Ubi chuibenneta, caid Esus nec. Adecbidi matses Nuquin Papa bëdambuen ismenuen nëish iua cuessunneshun pichicaquidon chuiquid tapabimbuecquid Esus nec, queshun aidquio tantiaquionona.

Codosas 1:13

Ënden Mayan Icsa Satanasën iuaquin namiaido yec inchëshquio yacno tabadacbimbuec tabadsho Nuquin Papan nuqui mënchicpondash. Aden mënchicshun ambi tantiaidquio aton Mado Esuquidistun namiaido nuqui icmiondash.

Hechos 20:27

Aden mibi Nuquin Papan: Naden ubi yacno matses tabadmenu, quequin chiaid ompoenquio icquin abitedi chuibanombi.

Uan 1 1:5

Esuquidistun Nuquin Papan naid chuibansho tantiondashun mibitedi chuiuaimbique. Tantia. Nuquin Papa bëchamauanquiecquid yec bëdamboshë icquid nec. Adquid yec inchështiapimbo yacbimbuen icsambuen naisambo nec.

Ebedeo 2:12

Nuquin Papan chuiquin dada uamequin chuimiacpadec nadecbidi Esus onquendac aton Papa chiec: Mimbi naid chuiquin cun utsibo tantiamembi, Papa. Aidobëd tabadequi mibi tantiec cuëdënebi. Nuquin Papa bëdambo iquec, quec cuëdënebi, quependac.

Timoteo 1 6:2

Iua utsitsen chuiquin: Mibi iuaquid Esus tantiaquidbidi icsho: Ubipadquid icnuc aidën chiacpadombuen natiapimbo iquebi, cainda. Ubipadquid umbi tantiaid cun buchi caid neque. Aidën chiacpadombuen nanu, quequin mibi iuaquid tantiaquin bëdambuen nashunta, quequin iuabo chuita.

Pidipos 1:7

Adquid yanshun ubi chieshënenquio icquin mimbi ubi tantiaquiec. Adsho mibitsen tantiaquiembi. Nëbi quënën tsadunondac abi tsadebi. Aden quënën tsadunaqui Nuquin Papan Chiaid Bëda chuibanquin tantiamiac: Abimbo caic, queshun ma tantiabennu, quequin chuibanembi. Adembidi chuiquid tapabo tantiamequin chuidenniondambi. Adquid icsho mibitedishun ubi tantiaquin mimbi ubi nashunoc.

Epeso 3:6

Ambi matses tantiamenquio icpampid nad iquec: Esusën naid ambi Chiaid Bëda chuibansho Nuquin Papan matses utsi utsien Esus tantiaquido icmec. Adoac aidobëd isadaidbo dada abentsëc yacbimbuec tabadsho issun ambi chiampicpadombuen bëdambuen isquin uënësacsho abëdi tabadmendac.

Codinto 1 1:30

Adquid icnuc Nuquin Papanuidtsëqui tantiamiac mibitedi Esuquidistubëd abentsëc yacbimbuec tabadquido nec. Adembidi aidëmbi nuquitedi bëdambuenshë tantiaquid icmequin abimbo chuiquid icmec. Adoshon icsambuen naisabimbuecnuc Esusën Nuquin Papa nuqui bëdambuen ismec. Adoaid yec Esuquidistubëd bëdambocquid icsho cuidenquio ictequid Nuquin Papa yacno tabadtequido nuqui nendac. Esus abided cuidadaid icnuc Nuquin Papan nuqui cuidenquio iquendac,

Tesadonica 1 1:10

Adshumbic: Nuquin Papa yacnouësh aton mado Esus nidaidën padpidec chosho istiadquio iquebi. Ubi cuidmenquio icnuec abided cuidadec uënësacsho Nuquin Papan uincuenmiaid Esus choec, queshun aidquio tantiabenac caosh, quequin mibitedishun naid chioshi.

Codinto 1 15:1

Tantia, cun utsibo. Esuquidistun: Ubi chuibenneta, caid icquin mibitedi umbi chuibanondaid bëshunenquio icquin tantiadonec tabadta. Umbi Esuquidistu abided cuidadec uënësaid Chiaid Bëda chuibansho tantiashun mimbi tantiabempondac. Adondashun chieshtoenquio icquin aid tantiadonec mibitedi tabadec.

Doma 15:27

Aden ambi tantiacpaden naid bëdambo iquec, caombi. Edusaden yacnoshon isadaidbomba Esus tantiapanëdash. Adshumbic aidon chuibenniac matses utsibontsen tantiabempanëdash. Aden abi nashunquin chuibanquido caic: Piucquid nibëdec, quiac caoshe. Aido ma menenu. Nashunnuna, quesho tantiashun: Bëdambo iquec, caombi.

Hechos 13:41

Umbi Chomiaid isquidon chiaqui aid tantiate bunenquio mibitedi icpec. Adquid yec: Tantiadempambo iquec, quec mamënshunmënquido icsho cuidquin abëdi tabadmetiapimbo iquendac. Adquid icmane, queshun aid tantiaquiota, quepanëdash Pabado iccuededquido chiec.

Hechos 13:32

Adembidi aid isnëdaidbëtambi Esusën naid Chiaid Bëda mibitedi abimbo chuibanquin ubitedishun naique. Tantia. Chuinu. Nuquin Papan: Matses ubëd tabadmequid chomendambi, quequin nuquin tsusedpabo chuipampic.

Hechos 2:42

Aden Esus tantiabenshun Esusën: Ubi chuibenneta, caidon Esus chuibansho tantiec abëd icquido menenanec tabadquimbi Esus uënësaid tantiaquin actequid acshun pan cuëshë pebededtednepanëdash. Adembidi Nuquin Papa chiannepanëdash.

Uanën dada uaid 17:25

Icsaisambo mibi icsho ubi tantiesabon mibi tantiatiapimbo icnubi mibi tantiaquiembi. Adnubi mimbi ubi tantiamiaidon: Nuquin Papan Chomiaidquio nec, quequin ubi tantiosh, Papa.

Uanën dada uaid 17:11

Ubi mibi yacno nidan nidaidën ubëd icquido abi tabadsho dayun uata, Papa. Ubi chieshënquidon aido chieshtomenushe. Aido dayun uata. Nadatiambocquin nabanquin aido bëdambuec tabadmeta. Nuqui tantiananquiacpadquiec abentsëc yacbimbuec tabadacpadec ma ubëd icquido tantiananquiec abentsëc yacbimbuec ma tabadnu. Aido bëdambuen dayun uata, Papa.

Uanën dada uaid 19:35

Adsho umbimbo isondambi, caimbi. Umbi dada uaid issun ma adembidi mibitedishun Esus tantianu, queshun abimbo chuiquin nëid dada uaic nebi.

Petedo 2 1:16

Nadatiambocquin nabanquid yec Nuquin Icbo Esuquidistu: Padpidec chouaindabi, quiondash, quequin ubitedishun chuibanaid ambembi muaquin chuibanaidpenquio nec. Umbimbo bëchamauanquiecsho isondaidquio mambi mibitedi chiec nec.