Mateo 18:3 - El Nuevo Testamento en matsés

³ Tantia. Mibitedi abimbo chuinu. Mimbi tantiacpadenuidi naic tabadbuedi nadquid bacuën amën chiacpadombuen nacbimbuen ubi tantiaquiota. Mimbi adoenquio icshoembi Nuquin Papan namiacno mibi puduedmenquio iquendac.

Mateo 18:3 Referans Kwoze

Petedo 1 2:2

Adenquio yec tishac chucactsëc bacuëmpi shuma chishte bunquiacbimbuec Nuquin Papan Chiaid iste bunquiota. Bëdiactsëc tantiabuedi canidoacbimbuen aid isban isbanquin aidën chiacpadombuen natiadquio yanec Esus tantiaquidquio yanec aidbëd tabadtequid ictsiabi, queshun Nuquin Papan Chiaid isbanquiota.

Mateo 19:14

Adshobien Esusën: Padi. Ma bacuëbo ubi yacno bënu. Cuenmenda. Nëid bacuëbo amën chuisho tantiash badedi: Abimbo caic, quiacbimbuen ubi tantiaquid Nuquin Papan namiacno puduedtequido nendac. Bacuëbo bëdambo iqueque. Bec cho, cac bëbëpondash.

Codinto 1 14:20

Cun utsibo, mibitedi bacuëbon tantiacpaden tantiec tabadenda. Bacuëbo tantiabenabictsëcquidën icsambuen naid tantienquio yacbimbuec tabadta. Adec tabadquin caniaidën tantiacpaden bëdambuen naic tabadquin ismeta.

Uanën dada uaid 3:5

Adsho tantiashumbien Esusën: Mibi abimbo chuinu. Tantia. Nuquin Papan Mayanën tantiamiac chuca uadec acten mentoadabicquid yec Nuquin Papan namiacno puduedtiapimbo iquendac.

Uanën dada uaid 3:3

Adsho tantiashumbien Esusën naden chuipanëdash: Tantia. Mibi chuinu. Chuca uabi icquid yec Nuquin Papan namiacno mibi tabadtiapimbo iquendac.

Ducas 13:24

Nuquin Papa yacno puduedtequid shëcuë pistsëcquio iquendac. Aidëmpinquio puduednun Nuquin Papa tantiec bëdambuec tabadta. Utsibo dadpen puduedte bunequi ambi tantiaid utsi icnuc tsucusec puduedtiapimbo iquendac.

Hechos 3:19

Nëbi mimbi icsambuen naid ënshun Nuquin Papa tantiata. Ma mimbi icsambuen naidtedi tantienquio yec bëshumpanu.

Hechos 28:27

Umbi chiaid tantiashumbi natiapimbo iquec. Min matses pamumëdacbimbuen tantiate bunenquio iquec. Bëchicqueshun isenquio yacbimbuembidi isquin tantiatiapimbo iquec. Umbi chiaid tantiaquin umbi nabansho isquimbi padpiden ubi tantiabente bunenquio iquec. Aden tantiabenquin ambi icsambuen naid ënsho issun bëdambuen ismane, quec Nuquin Papa chushquiaid Isayasën chuipampic.

Uanën dada uaid 1:51

Tantia, mibi abimbo chuinu. Mibitedishun abu yacno bëcaduadacsho isendac. Adembidi auëshquio ubi Matsesën Tishaid cun dadan ictanec Nuquin Papabëd icquido bud budashic dectatonesho mimbi isendac, quepondash Esus abëd icquido chiec.

Mateo 5:20

Moisesën chiampid tantiamequidobëd padiseobo Nuquin Papan namiacno puduedtequidoen mimbi dampec. Aido abi bëdambocquid danmianashic ompodshon icsambuen naquido nec. Adash Nuquin Papan namiacno puduedtiapimbo iquendac. Adecbidi Nuquin Papan Chiaid niac niaquec tabadash Nuquin Papan namiacno mibitedi puduedtiapimbo iquendac, quequin Esusën chuibampanëdash.

Ducas 22:32

Aden mibitedi Mayan Icsa Satanasën iuatiadquio iquec, quequin tantiaquin Nuquin Papa naden chiombi: Simon ubëd icquidquio neque. Mayan Icsa Satanasën iua yannushe. Aidën: Nuquin Papan Chiaid niac niacmenu, casho adomenda, Papa, quequin chiombi. Adec ubëd icbuedi cuëshëdtsembosh chouashun padpidec cuëshëdenquio icquin cumapenen ubi tantiaquin ubëd icquid utsibo adombuembidi cuëshëdenquio icnuc cumapenen ubi tantiameta, capanëdash Esusën Petedo chuiquin.

Madcos 4:12

Aden chiaqui: Ëshën bëdambuen isquimbi ma isenquiocpanuna. Adembidi pabiaten bëdambuen tantiaquimbi ma abimbo chiaid tantienquio icuapanuna. Aidon abimbo tantiaquin ambi icsambuen naid ënnushe. Aden ambi icsambuen naid ënsho isash Nuquin Papa aidën icsambuen naid tantienquio yec bëshunnushe, quepanëdash Esus abëd icquido chiec.

Petedo 2 1:11

Adec bëdambuec tabadec uënësacsho: Ubi tantiaquid mibi neque. Ubëdi tabadec cho, queshun ambi ënenquio icquin namiacno abëdi tabadmequin Nuquin Papa matses cuidmenquiocquid icquin Nuquin Icbo Esuquidistun nuqui bëdambo icmendac padpidec uënëstiapimbo icnuc.

Hechos 14:22

Aidtedi yacno chouaquin Esus tantiaquido naden chuibampanëdash: Natiamiantequid iquendac. Adquid icnuc Nuquin Papan namiacno tabadtequid nebi, quequin Esus tantiec chieshtoenquio yec tabadta, capanëdash Pabadon.

Mateo 19:23

Adsho issun Esusën abëd icquido naden chuipondash: Tantia. Abimbo chuinu. Atona dadpen dayun uaquid atonauidtsëqui tantiec Nuquin Papan namiacno puduedtiapimbo iquendac.

Mateo 13:15

Umbi chiac tantiatiapimbo iquec. Min matses pamumëdacbimbuen tantiate bunenquio iquec. Bëchicqueshun isenquio yacbimbuembidi isquin tantiatiapimbo iquec. Umbi chiaid tantiaquin umbi nabansho issun padpiden ubi tantiabenuanushe. Aden tantiabenshun ambi icsambuen naid ënsho issun bëdambuen ismane, quiash Nuquin Papa chushquiaid Isayasën dada uapampic, quepondash Esus.

Mateo 6:16

Adshumbic buna mëmunte Esusën naden chuipanëdash: Tantia. Nuquin Papauidtsëqui tantianu, quequin buna mëmunquid chuinu. Muaquidën nacbimbuen ismenda. Muaquido: Buna mëmunquid nec, aton matses camenuec manimanictsëcquio yec nënquidbitsëcquiec mamënenquio iquec. Adec buna mëmunquid tanec muaic. Adsho issun matsesën bëdambocquid dannubi Nuquin Papan: Icsambo icquid nec, queshun bëdamboshëcquid menetiapimbo iquendac.

Mateo 6:5

Naden Nuquin Papa chiannetetsen Esusën chuibampanëdash: Bëdambo icquid danmianquidën nacpaden nainda. Aidon Nuquin Papan Chiaid chuibante shubun puduedshun utsibo tantiamenuenuidi nidtoshon cumapenec onquequin Nuquin Papa chiannepec. Adash umanuc puduenanec utsibo iccuededacno nidshun matses dadpen tantiamenuenuidi padpiden adembidi Nuquin Papa chiannec. Adquid aton matsesën: Bëdambo iquec, canubi Nuquin Papan: Bëdambo iquec, catiapimbocquin aido bëdamboshëcquid menetiapimbo iquendac.

Mateo 6:2

Mimbi atona nibëdquido meniaid utsibo chienda. Utsibo bëdambocquid danmianquidën nacbimbuen nainda. Adquido Nuquin Papan Chiaid chuibante shubun puduedshun ambi nabued aton matses chiendac. Adembidi matses dadpen capuacnoshon ambi nabued chiendac: Mabi bëdambocquid nec, canu, queshun. Aidon Nuquin Papan menete bëdamboshëcquid bedtiapimbo iquendac.

Mateo 5:18

Tantia. Abimbo chuinu. Abubëta nidaid nibëdanmiabi icnuc Nuquin Papan: Naden nata, quequin chuiquin dada uamiampid utsi uatiapimbo iquendac. Ambi chiampictedimbo namequin nainendac.

Mateo 18:2

tantiashumbien: Nëmbo cho, cac bacuë choacsho abi tabadacno nënantanquio tsaduntsëcshun Esusën naden chuipondash:

Mateo 18:4

Aden umbi chiacpadombuen nëid bacuën nacbimbuen nasho mibi Nuquin Papan: Bëdamboshë iquec, caindac.