Madcos 1:21 - El Nuevo Testamento en matsés

²¹ Adashic shubu dadpen icquid Capednaun caid yacno abëd icquidobëd nidpanëdash. Nidash chonoadtemaid uëshën Nuquin Papan Chiaid chuibante shubun puduedshun iccuededquido tantiamequin Nuquin Papan Chiaid Esusën chuibampanëdash.

Madcos 1:21 Referans Kwoze

Madcos 6:2

Ambo nidshumbic chonoadtemaid uëshën Nuquin Papan Chiaid chuibante shubun puduedshun Nuquin Papan Chiaid chuibanquin tauapanëdash Esusën. Aden chuibansho tantiashien tantiadempambo yec tabadec: ¿Mitsi padombuen dadpen tantiabempash nepeba? ¿Tsuntsin bëdambuen tantiamepashba? ¿Mitsipadquiec nadatiambo icquin nabanquin bëdanmianquid yampashba? quecuededpanëdash.

Madcos 1:39

Aden chuibanec nidaid cuëshë Cadidea caidën icquidtedi yacno capucuennequin Esusën Nuquin Papan Chiaid chuibante shubun shubunquiec puduedcuennequin Nuquin Papan Chiaid Bëda chuibampanëdash. Adembidi podobitsi icsa dapuduedaido dapuduenmebampanëdash.

Mateo 4:23

Adashic aton nidaid Cadidea yacnobi capucuennequin Nuquin Papan Chiaid chuibante shubun shubunquiec puduedcuennequin Esusën: Nuquin Papan namiacno tabadte iquec, quequin Chiaid Bëda chuibennepanëdash. Adshumbic daicsaidobëtabi nënquido bëdanmebampanëdash.

Hechos 17:2

Ambo tabadequi abi nidtedniacpadec chonoadtemaid uëshën Nuquin Papan Chiaid chuibante shubu yacno nidshun Pabadon Esus tantiamenuen Nuquin Papan naden chiampid chuibampanëdash: Nuquin Papan Chomiaid Quidistu Mesias caid abided cuidadec uënësash padpidec uincuenendac, quequin chiampid icnuc Nuquin Papan Chomiaidquio Quidistu Mesias caid Esus nec, quequin mibitedi chuibanec nebi, quequin Pabadon chuipanëdash. Aden chonoadtemaid uëshë 3tedec icquin chuibampanëdash.

Hechos 18:4

Ambo tabadec chonoadtemaid uëshën uëshënquiec Nuquin Papan Chiaid isadaidbon chuibante shubuno nidshun: Esus Nuquin Papan Madombo nec, quequin isadaidbobëta isadaidpembo tantiamenuen Pabadon chuibampanëdash.

Mateo 4:13

Nidashic shubu dadpen icquid Nasaded yacno tabadanec nidequi chian dapa cuëman shubu dadpen icquid Capednaun yacno nidash ambotsen tabaduapanëdash. Aid nidaid Netadi capampic. Aid anoentsëqui icquid nidaid utsi Sabudon capampic.

Ducas 13:10

Adashic chonoadtemaid uëshën Nuquin Papan Chiaid chuibante shubun puduedshun Esusën Nuquin Papan Chiaid chuibampanëdash.

Ducas 10:15

Adembidi nëmbo icquido Capednaun yacnocquido: Nuquin Papa yacno tabadtequido nebi ¿quequinda mibitedishun tantie? Padenquio. Umbi nadatiambocquin nabansho issumbi tantiesa icsho Nuquin Papan cuidquin chian annëdënquiacno mibitedi nësecaindac, quepanëdash Esus.

Ducas 4:16

Adashic abi caninëdacno shubu daëdpactsëcquid Nasaded yacno Esus niduapanëdash. Ambo nidash chonoadtemaid uëshën Nuquin Papan Chiaid chuibante shubu yacno abi puduedtedniacpadequi puduedash Nuquin Papan Chiaid isec onquenush nidtopanëdash.

Madcos 10:1

Esus abëd icquidobëd shubu dadpen icquid Capednaun yacnouësh puduanec nidec nidaid cuëshë Udea yacno matambidanec nidquin acte Odan caid potepanëdash. Ambo uëshë choacmi choash tabadsho isash padpidec matses dadpen chochopanëdash. Adec chochoacsho issun ambi chuidedniacpadembi Nuquin Papan Chiaid padpiden chuibanuapanëdash Esusën.

Madcos 2:1

Adashic iuepactsëc yash padpidec Capednaun yacno niduash Esus shubun puduedpanëdash. Adnubien: Esus chosh, quesho tantiash

Madcos 1:20

Aden nacnensho istuidtanquimbien Esusën ambi utsi chuibocpadombuembidi chiaquien aid daëdshuntsen aton papabëta abi nashunquido cano antabëdsho nianec Esusbëd nidannepanëdash.

Madcos 1:29

Adashic Nuquin Papan Chiaid chuibante shubu yacnouësh puduenanec Simonën shubu yacno nidec Santiaco yec Uan yec quec aidobëd Esus nidpanëdash. Aidën shubun icquidbidi aton utsi Andedes icpanëdash.

Madcos 1:33

Aden bëbëash Simonën shubu shëcuë cuëman puduedabi matses dedpen tabadcuededpanëdash.

Madcos 3:1

Adashic padpidec Nuquin Papan Chiaid chuibante shubun Esus puduedpanëdash. Ambo dada mëicsatsaid tsadnubi

Ducas 4:23

Adoaquien: Bëdanmequid iquec abibi daicsambo yanash bëdanmiadacsho isash: Bëdanmequidquio nec, quequin chiampid mibitedishun tantiapec. Umbi Capednaun yacnoshon nabambued tantiashun: Nëshunquiotsen adombuembidi nabantsiash, ¿quequinda mibitedishun tantie?