Hechos 21:24 - El Nuevo Testamento en matsés

²⁴ Nëbimbobi Edusaden yacno padpidec mibi choac. Nëid dadatedi buanec Nuquin Papa tabadte shubu dapa yacno nidash acte bëdambocquidën dapanshun mimbi ënden chiondacted piucquid meneshumbic aidonatsen meneshunta. Ma mimbi naondacpadombuen mibëd nidquidontsen ma matasmenu. Mimbi adosho issun: Pabado icsambo icquid nec, quequin chuibuedombi: Nuquin Papan: Naden nata, quequin chiacpaden naquidquio Pabado nec, quequin tantiatsiash.

Hechos 21:24 Referans Kwoze

Hechos 21:26

Aden chiaquien badiadash Nuquin Papa tabadte shubu dapa yacno dada 4ted buanec nidacsho Pabadobëta aido acte bëdambocquidën dapampanëdash. Adoac Nuquin Papa tabadte shubu dapan puduedshun chiec: Nëidon ambi Nuquin Papa chiactedec ushquin nainshun ¿tedectsishun piucquid menepec? quequin Nuquin Papa tabadte shubu dapa yacnocquid Pabadon chuipanëdash. Aden chianec niduapanëdash.

Hechos 24:18

Aden menenuec Nuquin Papa tabadte shubu dapa tsicatequin daquënë uaidën puduedobi. Adembidi Nuquin Papan: Naden nata, quequin chiacpadombuen nainquin nabanombi, quec ubi icsaid ucacbimbuen acte bëdambocquidën dapanmenuec puduedash ubentsëqui icsambuen nainquio yec capusho ubi chushcabuedon istuidposhi.

Hechos 18:18

Adashien Pabado nidaid cuëshë Codinto yacno iuec tabadash Esus tantiaquido nianec nidaid cuëshë Sidia caid yacno nidec Pabado puduampanëdash. Aidbëdi Aquidabëd aton chido Pisida Codinto yacnouësh nidec Codinto nidaid cuëshën icquid shubu dadpen icquid Senquedeas yacno chopanëdash. Ambo tabadquin: Nuquin Papa tantiaquioquin aidtedec ushquin nainombi, queshun utsibo ismenu, quequin Pabadon aton manëdaid nibëdquiecnuc matasmepanëdash. Adashic auëshquio cano dapa antabëdtoanec nidpanëdash.

Codinto 1 9:20

Cun matses isadaidbo yacno nidash aido tabadacpadec tabadobi: Ma aidontsen Esuquidistu tantiabennu, quiash. Aido Moisesën chiampicpadec tabadsho isashini adecbidi tabadoc. Aidon: Moisesën chiampiduidi nasho Nuquin Papan bëdambuen isec, quequin tantianubi umbien: Esuquidistu uidtsëqui tantiasho Nuquin Papan bëdambuen isec, quequin tantiec.

Cadasia 2:12

Ambo choshon matses utsibon codocaid pec aidobëd bëdambuec tabadpondash. Adnubien Santiacon: Ambo istan, cac cun matses Moisesën chiampid tantiaquido chochopondash. Aido chochosho isash: Moisesën chiampid niacquin isadaidpembon codocaid pesho chushcanushe, quec dacuëdquin pete meniaid isuidampondash Petedon. Adec abëtan Esus tantiaquido isadaidpembobëd cuëshëdquin icsambuen napondash.

Uanën dada uaid 11:55

Ambo tabadnubien tsusedpabon: Ma cun mado uënësmenquio icnu, queshun obeca caniactsëc cuessunniampid tantiate uëshë anoentsëqui yannuc Edusaden yacno cun matses nidannepondash. Cuëdënquin bedanabi icnuc mishtemaid mishquidoba Edusaden yacno nidannepondash. Mabi nëish iua cuessunneshun pichicaquidon nesmenu, quiash mishtemaid mishquid nëish iua cuessunneshun pichicaquidën nesmiabi icquid cuëdëntemaid nec, quedennec, quianec nidannepondash.

Uanën dada uaid 3:25

Adnubien Uambëd icquido cun matses isadaidbo utsibëd: Mimbi icsambuen chiec, quec chushcananec: Uanëmbien Nuquin Papa tantiabenquido bëdambuen acten mentobanosh, quesho tantienquio yec Moisesën acten mëpamëdte chiampiduidi tantiec chushcanampanëdash.