Codosas 1:9 - El Nuevo Testamento en matsés

⁹ Aden Epapadasën chuiboc mibitedi tantiaquin ubitedishun ënenquio icquin naden Nuquin Papa chiannembi: Mimbi tantiacpadombuen min Mayanën bëdambuen tantiamiac: Nuquin Papan chiacpadombuen nate bunebi, quequin ma bëdambuen tantianu. Tantiamequiota, Papa, quequin chiannembi.

Codosas 1:9 Referans Kwoze

Santiaco 3:17

Padnuen Ambi tantiacpadombuen Nuquin Papan bëdambuen tantiamiaid yec nadquio iquec. Icsambuen nate bunesa nec. Adecbidi utsibobëd bëdambuec tabadquid nec. Adecbidi utsi nashumënquid nec. Adecbidi chushcanesa nec. Adecbidi utsi natiambo icsho uënësquiocquid nec. Adecbidi chuiquidën: Nanuna, cac badedquio: Ai, adonona, quequid nec. Adecbidi cuidmenquiocte bunquid nec. Adecbidi bëdambuen nabanquid nec. Adecbidi: Nëid bëdambuen isquimbi utsi chieshënembi, quesa nec. Adecbidi: Esus tantiaquid nebi, quec muesa nec.

Santiaco 1:5

Bëdambuen tantienquio iquembique. Ubi dadpen bëdambuen tantiaquid icmeta, quequin Nuquin Papa chuita. Aden abi chuisho: Ma bëdambuen tantianu, queshun chushcainquio icquin mibi dadpenquio bëdambuen tantiamendac.

Codosas 4:5

Esus tantiesabon ubi tabadsho isec, quiash Esus tantiec bëdambuec tabadta. Adec tabadquin Esus tantiesatsen chieshtomenquio icquin tantiamenu, quequin Esuquidistun chiaidquio chuibanta.

Ebedeo 13:21

Aden abi tantiaquido icsho Esusën nëish iua obeca dayun uacbimbuen dayun uaquin Nuquin Papan ambi tantiacpadombuen bëdamboshëcquiduidquio icmendac. Adoac Nuquin Papa bunacpadombuen ma napanuna. Adembidi abi bunacpadombuen ma icmepanuna, queshun Esuquidistunuidtsëqui nac. Esuquidistu bëdamboshëcquidquio yec nibëdantiapimbocquid nec, quequin ënenquio icquin chiannenuna. Amen.

Petedo 1 2:15

Nuquin Papa mibitedi bëdambuen naic tabadmete bunquid nec. Adquid icsho tantiesabo icquin mibitedi icsambuen chuishunte bumbuedombi mibi icsambuen chuishunenquio iquendac.

Tesadonica 2 1:11

Aidobëtambi Esus isembi, quequin mibitedi tantiaquin Nuquin Papa ënenquio icquin naden chiannembi: Mimbi Esus tantiamiaido neque. Bëdambuec tabadmeta, Papa. Aido: Esus tantiec mimbi chiacpadombuen natiadquio iquebi, quequin mibi chuisho ambi chiacpadombuen nameta. Nadatiambocquin naquidquio mibi neque. Adota, Papa.

Tesadonica 1 5:17

Adembidi ënenquio icquin Nuquin Papa chianneta.

Uan 1 5:20

Nadembidi nuqui tantiec. Nuquin Papan Madombo choshon chuibanec: Nuquin Papambo nadquio iquec, quequin tantiamepondash. Adash: Esuquidistu Nuquin Papan mado Nuquin Papapadquidbëd abentsëc yacbimbuec nuquitedi iquec. Aidi Aton Papapadquid icquin abi tantiaquido icsho Nuquin Papa yacno ënëdenquiocnoc tabadmendac, quequimbidi nuqui tantiec.

Codosas 3:16

Esuquidistun naid chuibanaid bëdamboshëcquid tantiaquido mibitedi neque. Aid bëshunenquio icquin tantiec bëdambuec tabadta. Adembidi bëdambuen tantiaquin Esus tantiaquid utsibobëd tantiananec Esuquidistun chiaid chuinanec: Bëdambuec tabadnuna, quec chuinanta. Aden naic chuiquid tapa Dabidën dada uampid cuëdëntebëta cuëdënte utsi Nuquin Papan mibi bëdambo icmiaidbëtabi ambi naid utsi chiec cuëdëndedneta.

Ebedeo 10:36

Utsin mëyanquin natiamiaqui Nuquin Papan Chiaid chieshtoenquio icquin tantiadedneta. Adec tabadquin abi bunacpadombuen nabanacsho ambi chiampicpadombuen Nuquin Papan abi yacno mibitedi tabadmendac.

Pidipos 1:4

Aden mibitedi tantiaquin Nuquin Papa chiannec cuishonquebi.

Pidemon 1:4

Pidemon Nuquin Icbo Esus tantiaquidquio nec. Adquid icquin Nuquin Papa tantiaquid utsibo tantiaquin nashunquid nec, quequin utsibon chuisho tantiombi. Aden tantiash: Bëdambo iquebi, queshun mibi tantiaquin ënenquio icquin Nuquin Papa chiannembi.

Epeso 6:6

Min icbon isnuc aidën chiacpadombuen mimbi bëdambuen nabanacpadombuembidi min icbon isenquiocnoc adembidi nabanuata. Esuquidistu: Cun Icbo nec, quequin chieshenquio icquin Nuquin Papa bunacpadombuen naimbi, quequin nidaidënshun min icbon chiacpadombuen nabanta.

Doma 12:2

Esus tantiesabon nacpadombuen naic tabadenda. Adembidi aidon tantiacpadombuen nainquiocquin bëdambuen tantiabenash mibitedi bëdambuec tabadquid yanendac. Adash Nuquin Papa bunacpadec tabadquin bëdambocquid yec abi bunaidquio yec icsambocquidpenquio yante yec quequin mibitedishun tantiendac.

Tesadonica 1 1:3

Aidon Esus tantiaquin mimbi chiacpadombuen matses tantiaquin nashumbanondash, Papa, quequin Nuquin Papa chiannembi. Abi yacno abi tantiaquido buannuec Nuquin Icbo Esuquidistu padpidec choec, quesho utsibon chieshënaqui chieshtoenquio icquin Esusën naid abi chuibanondash, quequin ubëd icquidobëtan ënenquio icquin mibitedi tantiembi.

Uan 1 2:17

Adec Esus tantiesabo icquin ambi icsambuen naidbëdi abi bunaidtedi nibëdanendac. Padnuen Nuquin Papan chiacpadombuen naic tabadquid ënëdenquio yec Icbobëd tabadtequid nendac.

Petedo 1 4:2

Aden mimbi tantiacpadombuen nainquio icquin Nuquin Papan tantiacpaden nate bunquidquio mibitedi iquendac.

Codosas 4:12

Epapadas mibi yacnoshon Esus tantiec mibëd iccuededondaid Esuquidistun namiaid icquin aid chuibanquidquio nec. Aidëmbidi: Aido cun utsibimbuecquido icsho tantiec tsadebique. Chui, quesho tantiashun dada uaimbi. Aidëmbidi ënenquio icquin mibitedi tantiaquin Nuquin Papa naden chiannec: Icsambuen namenuequid icnuc mibi bunacpaden tantiamequin mimbi Codosas yacnocquido chieshtomenquio icquin Esuquidistu tantiec tabadme, Papa, quequin Epapadasën Nuquin Papa chiannec.

Codosas 1:6

Aden Chiaid Bëda chuibanquid mibi yacno nidshun chuibanac mibitedishun: Abimbo caic, queshun tantiabempanëdac. Mibitedi chuibanacpadombuembidi matses utsi utsiec yacno chuibenniac adembidi dadpenshun: Abimbo caic, queshun Esuquidistu Nuquin Papa bëdambuen ismequid tantiabempanëdash.

Epeso 5:17

Mimbi icsambuen tantiacpaden nabanenda. Aden nainquiocquin: ¿Mitsipadec Nuquin Papa bunacpadec tabadte icpec? quequin tantiec tabadta.

Epeso 5:10

¿Adambi bëdambuen napeba? quequin ënenquiocquin tantiadednequin Nuquin Papa bunacpadombuen nabanec tabadtedneta.

Epeso 1:8

Adomiac Nuquin Papan nuquitedi bëdambuen isquin ambi bëdambuen tantiaid tantiamequin utsi dadpen bëdambuen tantiamendac.

Uanën dada uaid 7:17

Nuquin Papan chiacpadombuen nate bunquidën bëdambuen tantiatsiash. Umbi Nuquin Papan Chiaid chuisho tantiash: Nuquin Papan Chiaidquio chiec nec, quequin tantiatsiash. Umbi ambembi chuisho tantiash: Nuquin Papan Chiaidpenquio chiec nec, quequin abimbo tantiatsiash.

Codinto 1 1:5

Nuquin Papan bëdambuen isaido icsho Esuquidistun abibi tantiamequin ambi naidbëta Nuquin Papan Chiaid bëdambuen tantiamequin mibitedi bëdambuen chuibanmec.

Hechos 12:5

Adnubien Esus tantiaquido iccuededquin Petedo quënën tsadunmiaid tantiaquin Nuquin Papambo tantiaquin chuibededec tabadpanëdash.

Pidemon 1:6

Nuquin Papa nadembidi chiembi: Ubëtan Esus tantiaquid nec. Adquid icsho ma Esusën bëdambuen isquin ambi nabocpadombuen bëdambuen nabanmec bëdambuec tabadmeta, quequin mibi tantiaquin Nuquin Papa chiannembi.