Codosas 1:14 - El Nuevo Testamento en matsés

¹⁴ Nuqui icsambuen naid Nuquin Papa bëshunmenuec aton Mado abided cuidadec uënëspanëdash.

Codosas 1:14 Referans Kwoze

Epeso 1:7

Matses bëdambuen iste bunquidquio icquin Nuquin Papan namiac Esuquidistu aton intac chididiquec uënësaidën nuquitedi icsambuen naid bedshunquin nuqui icsambuen naid tantienquiocnoc Nuquin Papa bëshunmendac.

Ebedeo 9:22

Cuessunniaidën intac daseccatequid nec. Nuquin Papana icsa uaid bëdambo icmenuen dadpen intaquën daseccabantequid nendac. Adecbidi cuessunniaidën intac chiuidenquiocnoc matsesën icsambuen naid tantienquio yec Nuquin Papa bëshunenquio iquendac.

Ebedeo 9:12

Matsesën nëish iua cuessunneshun intac bedshun buanec Nuquin Papa tabadte shubu uashunaid quënë bëdamboshëcquidën puduedenquio Esuquidistu icpanëdash. Aidi matsesën icsambuen naid bedshunash abided cuidadec uënësacsho cudan siac aton intac chiuidash Nuquin Papa yacnombo aid ismec puduedpanëdash. Adec abentsequi puduedshun abi tantiaquido nuqui icsho ënenquio icquin Nuquin Papa bëdambuen ismequin nuqui icsambuen naidtedi bëshunmec.

Esusën Uan ismiaid 5:9

Adashic nadec cuëdënte chucan cuëdëncuededposh: Mimbiuidtsëqui Nuquin Papan sananaid dada uaid bedshun bitaccaid chicquin isbanquin Nuquin Papan chiacpadombuen namendac. Nuquin Papan chiacpadec matses cuidmenquio icnuec mibided cuidadec intac chididiquenuc uënës uaondaid mibi nec. Nëbi icsambo icbuedombi abi icsaid bedshunquid tantiasho Nuquin Papan bëdambuen isendac nëidtedi: Nëidic matses utsibo dadpenquio. Nëidic onquete utsin utsinquiec onquequido. Nëidic shubu daëdpactsëcquido utsi utsiec yacnocquido. Nëidic nidaid utsi utsiec yacno tabadquido. Aidtedishun abi tantiasho Nuquin Papan bëdambuen isendac.

Cadasia 3:13

Abitedishun Moisesën chiampiduidi natiapimbo yec icsambuec tabadsho isash abided cuidadec uënësquin Esuquidistun nuquitedi icsambuen naid bedshunquin bëdambo icmepondash. Naden chuiquin Nuquin Papan dada uamiampid iquec: Cueste napotiaidën dectanmiaid Nuquin Papan cuidaidquio nec, quequin dada uamepampic.

Mateo 20:28

Adecbidi Matsesën Tishaid icsho mabi matsesën nashunnu, quecpenquio chondabi. Adenquio icquin matses nashunquin Nuquin Papa icsambuen naquidobi cuidmenquio icnuec ubided cuidadec uënësendabi, quequin Esusën ubitedi chuipondash.

Esusën Uan ismiaid 1:5

Adembidi Esuquidistun mibi bëdambuen isquin bëdambo icmendac. Nuquin Papan bëdambuen iste tantiamequidquio aidi nec. Abia aton dada uënëstiapimbo icquid icmequin uincuenmiaidquio nec. Adquid yec abitedishun Icbombo nec. Aidënuidtsëqui nidaidën tabadquidën chuiquid tapa abitedimbo namendac. Aidi nuqui tantiaquidquio yec nuqui cuidmenquio icnuec nuqui icsambuen naid bedshunash abided cuidadec intac chididiquec uënëspondash.

Epeso 5:2

Nuqui tantiaquidquio Esuquidistu nec. Adquid icnuc utsibobëd tantiananec tabadta. Nuquitedi tantiaquidquio yec abided cuidadec uënëspanëdash. Adec abi uënësaid nuadte bëda shëdtequid pichicacbimbuen nasho isash Nuquin Papa: Bëdambo iquec, quepanëdash.

Uan 1 2:2

Matsesën icsambuen naid tantienquio yec bëshunquin ma Nuquin Papan cuidenquio icnu, quiash matses abitedishun icsambuen naid bedshunec abided cuidadec Esuquidistu uënëspondash.

Petedo 1 3:18

Chieshënquin natiamiaqui Esuquidistu mëyadquiec nuqui icsaid bedshunec abided cuidadec abentsequi uënëspondash. Aidi icsaisambo iquequi icsambuen naquido tantiec mëyadbudec uënëspondash: Ma Nuquin Papa yacno tabadtequido icpanu, quiash. Adec aton dada icsabudec uënësambi aton mayan uënësesambo icnuc aton dada uincuempanëdash.

Uan 1 2:12

Tantia. Cun bacuëbobimbuecquido icsho mibitedi chuiquin dada uanu. Esuquidistu abided cuidadec uënësaid tantiaquid icsho isash mimbi icsambuen naid tantienquio yec Nuquin Papa bëshunac.

Tito 2:14

Nuqui cainaid nuqui icsambuen naidtedi bedshunec abided cuidadec Esus uënëspanëdash. Adec uënësaid tantiaquid yansho: Cun matses caido yec bëdambuec tabadquid nendac, quequin chiaid tantiameta, Tito.

Timoteo 1 2:6

Aidi abi tantiaquid cuidmenquio icnuec abided cuidadec uënëspanëdash. Aden Nuquin Papan ambi tantiacpadënquio Esus chomepanëdash. Matses abitedi cuidenquio icquin bëdambuen iste bunquin Abëd tabadmequid Nuquin Papa nec, matses camenuen Esus uënësmepanëdash.

Codosas 2:13

Ënden Nuquin Papan matsespenquio icquin icsambuen naic tabadec uënësacbimbuec mibitedi icpanëdac. Adquid icquin Nuquin Papan ënden: Naden nata, quequin chiaid tantienquio icquin niacquido mibitedi icpanëdac. Adquid icbuedi Esuquidistu tantiaquid yansho issun: Ubëd tabadtequid nec, queshun mimbi icsambuen naidtedi tantienquio yec bëshunquin Nuquin Papan mibitedi bëdambuen isendac.

Epeso 4:32

Adecbidi bëdambuec tabadquin utsibo uënësquio icquin tantiaquin nashunnanta. Esuquidistunuidtsëqui nac mimbi icsambuen naid tantienquio yec Nuquin Papa bëshunacpadquiec utsin mibi icsambuen naid tantienquio yec bëshunuata.

Hechos 20:28

Nëbi nidebique. Ubi nidan chieshtoenquio icquin Esus tantiec bëdambuec tabadta. Adembidi mimbi chuibanaido Esus tantiaquido chuiquin: Chieshtoenda. Esus tantiec bëdambuec tabadta, cadednequin bëdambuen chuibanta. Nuquin Papan Mayan Bëdan aido chuibanquid mibitedi icmioshe. Adota. Aido Nuquin Papa yacno tabadmenuec Esuquidistu abided cuidadec intac mëyanec uënëspanëdash.

Hechos 10:43

Adembidi Nuquin Papan oncamiaidon Esus tantiaquin: Nuquin Papan Chomiaid Quidistu Mesias iquendac, quequin chuiquin dada uapampic. Aden chiampid icnuc aid tantiashouidtsëqui ambi icsambuen naid tantienquio yec Nuquin Papa bëshunendac, quequin chiampid iquec, quepanëdash Petedo Codnedion shubun iccuededquido tantiamequin chiec.

Codosas 3:13

Mimbi nacpadombuen utsibon nainquiocsho issun: Tantienquiocquid nec, quenquio icquin adembi chuiban. Adecbidi utsin mibi icsambuen chieshënquin nasho isash aidën naid tantienquio yec bëshunta. Nuquin Papa umbi icsambuen naidtedi tantienquio yec bëshunosh, quec adta.

Hechos 2:38

Adoaquien Petedon: Mimbi icsambuen naid ënshun: Esus cun Icbombo nec, quequin abimbo tantiaquin acten mentometa: Ma umbi icsambuen naid tantienquio yec Nuquin Papa bëshunnu, queshun. Adoacsho aton Mayan Bëda mibi menendac.

Uan 1 1:9

Padnuen Nuquin Papa chiec: Icsambuen naombique. Ubi bëdambo icmequin ubi bëdambuen ista, Papa, quesho tantiashun ambi chiacpadombuen naquin nuqui bëdambuen isendac. Nuqui icsambuen naidtedi tantienquio yec bëshunquin icsambuen naisabimbuecnuc nuqui bëdambuen isendac.

Hechos 26:18

Aden chuibanac utsin utsinquien pashuacbimbuec icbuedombi tantiendac. Icsambuen naquid nebi, quequin tantienquio icbuedëmbi: Icsambuen naquid nebique. Ubi icsaid tantienquio yec bëshunta, Papa, quendac adquid. Mayan icsa Satanasën iua icbuedi Nuquin Papan bacuëbo yanendac. Adquid yansho ambi icsambuen naid ënmiac Nuquin Papan bëdambo icmiaid ubi tantiaquid utsibobëd iquendac, quequin Esusën chuipondashi.

Esusën Uan ismiaid 14:4

Aido nidaidën tabadec: Icsamane, queshun utsibon papa canun nacnenaid tantienquiocquido neposh. Adembidi utsibon Obecabimbuecquid tantiatiapimbo icnubi aid tantiaquidombo icnëdaid neposh. Adquid icquin Obecabimbuecquid ënenquio icquin abi nidacsho tsibanquin tantiaquidombo neposh. Adnëdaid icquin nëish iua pichicaquin ismiacbimbuen Nuquin Papabëta Obecabimbuecquid cuishoncamequioposh.

Ducas 5:20

Dada shëquëquenquiocquid umbi bëaid Esusën bëdanmendac, quequin tantiaquin bëquidon ambi bëaid imbudsho isash dada shëquëquenquiocquid caic: Mado, mimbi icsambuen naidtedi tantienquio yec bëshunobi, quepanëdash Esus.

Codinto 1 1:30

Adquid icnuc Nuquin Papanuidtsëqui tantiamiac mibitedi Esuquidistubëd abentsëc yacbimbuec tabadquido nec. Adembidi aidëmbi nuquitedi bëdambuenshë tantiaquid icmequin abimbo chuiquid icmec. Adoshon icsambuen naisabimbuecnuc Esusën Nuquin Papa nuqui bëdambuen ismec. Adoaid yec Esuquidistubëd bëdambocquid icsho cuidenquio ictequid Nuquin Papa yacno tabadtequido nuqui nendac. Esus abided cuidadaid icnuc Nuquin Papan nuqui cuidenquio iquendac,