Cadasia 6:12 - El Nuevo Testamento en matsés

¹² Muaquin chuiquido: Mibitedi Moisesën chiampicpadombuen namenu, quequin shui dëbid dëtemete bunquido nec. Mabi cun matses isadaidbon: Bëdambo iquec, canu, queshun mibitedi adometiadquio iquec. Esuquidistu cueste napotiaidën dectanaid chuibansho chieshënquin cuidnushe, quequin tantiaquido aido neque. Muaquin chuisho tantienda.

Cadasia 6:12 Referans Kwoze

Cadasia 5:11

Cun utsibo, umbi aidon chiacpaden: Shui dëbid dëtemiaiduidtsëqui Nuquin Papan bëdambuen istsiashe. Dëtemeta, quequin chuiquin Esus chuibanenquio icsho isadaidbon chieshënenquio ictsenoshi. Abi tantiaquid cuidmenquio icnuec cueste napotiaidën diadec Esuquidistu uënëspanëdash, quequin chuibansho mabi chieshëmpaboc.

Codosas 2:23

Matsesën bëdambuen tantiacbimbuen chiaid aidtedi nec. Nëid umbi tantiaid neque. Aid bëdambuen ismenuen naden nanuna, quequin aid matsesën chiec. Adshumbic: Chuiquid icte bunenquio iquebi, quequin muaquin mibi namete bunec. Adembidi: Umbi tantiaidën ubi bëdambuen istsiash, quequin ambibi tantiacpaden nabanec aton dada daicsaic damëyadbudec. Aden aidon tantiaidtedi nashun abi bunaiduidi tantiaquin ambi natemaid isuidtiapimbo icquin naic tabadec.

Codinto 2 11:13

Aido Esuquidistun: Ubi chuibenneta, caid nebi, quec muaquido nec. Adquid icquin muaquin mibi chuibanec.

Hechos 15:1

Adnubien nidaid Udea caid yacnouësh choquido Esus tantiaquid utsibo Antioquia yacno chochoash tabadquin: Nuquin Papan: Naden nata, quequin Moises chuiquin dada uamiampicpaden shui dëbid dëtemesa Nuquin Papa yacno puduedtemaid nendac, quequin chuibampanëdash.

Cadasia 2:3

Ubëd icquid Tito isadaidpembo quidieco matses icshobi shui dëbid dëtemeta, cainquio icpondash chuiquid tapabon.

Ducas 16:15

Adec tabadsho issun Esusën: Bëdambuen nacbimbuen ismequido mibitedi icsho mimbi ompoquin naidtedi Nuquin Papan tantiec. Adembidi: Bëdambuen naquidquio nec, quequin matsesën isaidi Nuquin Papan bëdambuen istiapimbo iquec, quepanëdash Esus.

Pidipos 3:18

Umbi chuidenniondacpadombuen mibitedi padpiden shubiquimbi chiec nebi. Mibi yacno utsi utsiec icsambuec tabadquid iquec. Abided cuidadec cueste napotiaidën dectamëdaid Esuquidistu tantiaquid nebi, quebuedi aid chieshënquidbimbuec icsambuec tabadec.

Pidipos 2:4

Mimbi tantiacpadombuenuidi nainquio icquin utsin tantiacpadombuentsen nata. Mitsanauidi tantienquio icquin utsibo nashuntetsen tantiata.

Pidipos 1:15

Aidon ubi bëdambuen tantiaquin Esuquidistun naid chuibanec. Aid tantiembi, queshun aidën naid chuibennesho bedshun quënën tsadunac chuibantiapimbo icnuc: Umbitsen chuibannu, quequin ubi bëdambuen tantiaquin Esuquidistun naid chuibanac caosh. Nuquin Papan namiac quënën tsadunaid icquin: Esusën naid chuiquin: Abimbo caimbi, quequin utsibo chuibanac, quequin aidon umbi naid tantiac caosh. Padnuen utsibon ubi chieshënquimbi: Umbimbo bëdambuen namenu, quequin Esuquidistun naid chuibanac caosh.

Cadasia 6:13

Aden shui dëbid dëtemequidombi Moisesën chiampidtedi natiapimbo iquec. Adquid yec aido: Umbi chiacpadombuen nëidon naosh, quenuembien mibitedi shui dëbid dëtemetiadquio icchitec. Aden mimbi nabanquin ismiac umbi chiacpadombuen tantiaquin nabanquido nec, quiash: Ubiuidtsëqui bëdambocquid nebi, quenuec neque. Aidën chiacpadombuen nainda.

Cadasia 2:14

Aden icsambuen naquin Esusën chiacpadombuen nainquio icshobimbi Esus tantiaquidtedishun tantianuc Petedo naden chuipondac: Isadaidbo icquimbi mimbi nuquin matsesën chiaid niacquin isadaidpembon codocaid pec aidbëdi mibi bëdambuec tabadoc. Adec tabadbuedi nëbi aidbëd mibi cuëshëdoc. Adsho isash mimbi nianaido: Petedon matses isadaidbo tabadacbimbuec tabadshoen Nuquin Papan nuqui bëdambuen istsiash, quequin icsambuen chuitsiash, queshun Petedo chushcapondambi.

Codinto 2 10:12

Ubiuidtsëqui bëdambuen tantiaquin chuibanquid nebi, quequidopadquidpenquio nebi. Utsiboen aden chuiquid bëdambuen tantiesambo nec. Ubiuidtsëqui bëdambuen tantiaquidquio nec, quequidien icsambuen tantiaquidbidi nec.

Hechos 15:5

Aden chiac utsi utsiec Esus tantiaquid padiseobo: Nuquin Papan: Naden nata, quequin chiampid tantiaquin isadaidpembotsen shui dëbid dëtemetiadquidi nec. Adashic: Nuquin Papan: Naden nata, quequin Moises dada uamiampidtedi nabanmetiadquidi neuaic, quequin chuipanëdash.

Uanën dada uaid 7:18

Ambembi chuiquidën: Mabi matsesën: Bëdambo mibi iquec, canu, quequinuidtsëqui tantiaquin chuibanendac. Umbien: Ubi chomiondaidquio ma matsesën tantianu, quequin aidën chiaidquio abimbo chiec nendac.

Ducas 20:47

Aido niante ampeshunquin shubu bedshunquido nec. Adembidi: Bëdambocquid nec, camenuen iuen Nuquin Papa chuibudec. Adquid Nuquin Papan cumapenquien cuidtequidombo nendac, quepanëdash Esus.

Mateo 23:28

Adembidi bëdambuec tabadquid mimbi danmec. Matses ismec bëdambuec tabadshumbic ompodshon Nuquin Papan Chiaid niacniacquin mimbi icsambuen nabanec, quepondash Esus.

Mateo 23:5

Aidon Nuquin Papa tantiaquidquio danmequin matses ismenuenuidi naic. Nuquin Papan Chiaid dada uaidëmpi sauedten sauedtsash bëdectamëdash abiuc daëdi pëdectamëdshun matses ismenuenuidi naic. Adecbidi: Nuquin Papa chiannequidquio nec, mabi canu, queshun sedquid shoyonaid ënapempactsëcnuc aton dashcute cuididicash matses ismenuec matses tabadacno capucuennepec.

Mateo 6:16

Adshumbic buna mëmunte Esusën naden chuipanëdash: Tantia. Nuquin Papauidtsëqui tantianu, quequin buna mëmunquid chuinu. Muaquidën nacbimbuen ismenda. Muaquido: Buna mëmunquid nec, aton matses camenuec manimanictsëcquio yec nënquidbitsëcquiec mamënenquio iquec. Adec buna mëmunquid tanec muaic. Adsho issun matsesën bëdambocquid dannubi Nuquin Papan: Icsambo icquid nec, queshun bëdamboshëcquid menetiapimbo iquendac.

Mateo 6:2

Mimbi atona nibëdquido meniaid utsibo chienda. Utsibo bëdambocquid danmianquidën nacbimbuen nainda. Adquido Nuquin Papan Chiaid chuibante shubun puduedshun ambi nabued aton matses chiendac. Adembidi matses dadpen capuacnoshon ambi nabued chiendac: Mabi bëdambocquid nec, canu, queshun. Aidon Nuquin Papan menete bëdamboshëcquid bedtiapimbo iquendac.

Mateo 6:5

Naden Nuquin Papa chiannetetsen Esusën chuibampanëdash: Bëdambo icquid danmianquidën nacpaden nainda. Aidon Nuquin Papan Chiaid chuibante shubun puduedshun utsibo tantiamenuenuidi nidtoshon cumapenec onquequin Nuquin Papa chiannepec. Adash umanuc puduenanec utsibo iccuededacno nidshun matses dadpen tantiamenuenuidi padpiden adembidi Nuquin Papa chiannec. Adquid aton matsesën: Bëdambo iquec, canubi Nuquin Papan: Bëdambo iquec, catiapimbocquin aido bëdamboshëcquid menetiapimbo iquendac.

Mateo 5:10

Bëdambuec tabadsho issun utsibon chieshënquin mëyanaid icsho Nuquin Papan bëdambo icmequin uënësacsho ambi namiacno tabadmendac.

Mateo 23:27

Moisesën chiampid tantiamequidobëd padiseobo, bëdambocquid danmianquido yec icsambocquido icsho Nuquin Papan cuidtequidombo mibitedi nendac. Adquid yec nadacbimbuec mibitedi iqueque. Tantia. Chuinu. Utsibo: Bëdambuec tabadquido nec, cameteuidi bunsho issun Nuquin Papan mibitedi cuidendac. Nadacbimbuec mibitedi iquec. Uënësaido chococacno bëdambuen nacnenac bëdambo isadec ënden pisenambi.