Hebreos 8:9 - Sharanahua: Diospan Tsain

⁹ Un ato shunifo Egipto anoshon iyoni. Nantianri un ato yoisharani uhuun tsain nicasharaifoan un ato cushusharafafainon. Un ato asca huafiaino uhuun tsain cachiquiri huanifo. Ascaifoan un ato potayoni. Ascacun ato shunifo un yoini cuscacai un ato funafo anori yoishquima. Ascatamarocon uhuun tsain shara futsa un ato yoishquin ua nicasharanonfo.”

Hebreos 8:9 Referans Kwoze

Gálatas 4:24

Diosin ainfo rafuhuunoa noco ahuara futsa yosipai. Ato shara huashononpacoai cuscan ato yoiyoni. Nanscarifi aquin yorafoti shara huashopai. Ascano Moiséshuunshon Israelifo yonopaiyai cuscan ato yononi. Ascashon machi ahuun anu Sinain anoshon ato yononi ahuun tsain tanasharanonfo. Moisés yononi cuscan tanasharapaifiacani tsoacai ascacoinmisima. Ascashu ahuun yonomatifo cuscara icafo. Nanfo Agar cuscarafo. Nanrifi yonomati ipaoni. Nan machi ahuun anu Sinain Arabiafoan anu futsa tuqui huanifo Agar huanifo. Agar ari icafo ahuun facufo cuscara. Nanfoan Moisés yononi cuscan tanapaifiaquicai anifoma. Ascashu nanfo ahuun yonomati cuscarafo. Nan pushurasi Jerusalén ano icafoan aton ahua cuscara.

Marcos 8:23

Ascano Jesús fusho mutsoinifoantan pushurasi pasoato iyoni. Nannoshon ahuun furoqui cumo michotan ayashon furo muunni. Ascashon yocani, —¿Min oinsharaimun? —ishon yocaiton.

Hechos 13:11

Natian nocon Ifoan mia onaintimai. Ipaitama min fusho acucahuani. Fari chashaino min afanan oinyoimaran, —ishon Pablonun yoini. Asca huatapaiyaino fushoriscatani. Ascashon cunacufaini, —Ua mutsoyopun ua iyoshquin, —ishon yoini.

Hechos 9:8

Saulo funinaca huapai fushoacucahuanaiton mutsoinifoannifo. Ascashon Damasco ano iyonifo.

Éxodo 34:10

Nan Moisés cufiain cusca nicaquin nocon Ifo Diosin cumani isca huaquin, —Un mato yoiai cusca man aiton un mato cushusharafafainshquin. Un min caifoan aton ointaifin un ahuamamishti huashoshquin. Un mato ashoai cuscacai mani futsafoan oinmisifoma. Un mia ashoai cusca mi fu icafoan oincaquin tapitirofo unfin ahuamamishti sharacoinfo huatiroquin.

Génesis 19:16

Ascashon yoifiafocai Lot cariscayamaiton nan rafutan Lot yafi ahuin non ainfacu rafu mutsofainifo ato pushu rasi anoshon ato ichoquini. Diosin atohuun ramapaiquin ato cushusharani.

Éxodo 32:8

Nan un ato yoia cusca man samamashta potacoianfo. Ascashon moipan facu cahua shara ointsa rami huafo. Nan rami huafo ointaifin ratoconun mai chachishon a cufincani. Ascashon ahuun ointaifiri toquirifo putsamuinia camaquishon inafo rutushon coafo. Ascashon yoiafo isca huaquin, “Naafin noco diosiquin. Nantofin noco Egipcio mai anoshon ihuuaquin,” ishon yoiafo.

Hechos 7:36

Nanno Dioshuunshon ahuarashta tsoan oinyomisima shara ato ismani yoran atiroma cuscan ato ismani. Unuhuan ahuun anu oshin anori tsoan atiroma cuscan Dioshuunshon ato ismani. Tsoan istaipamashon nanscasi huapaoni.