Filipenses 4:6 - Sharanahua: Diospan Tsain

⁶ Ascano shinanchacayamacahuun. Ascatamarocon ahuara ahuuscarafiaino Upa Dios cuficahuun. Man yopai cuscari a yoicahuun. Man cufiaino Upa Dios yoicahuun isca huaquin, —¡Aicho! Upa, min ua nicasharamisi un yopai cuscan min tapishon min ua ashosharamisiran, —ishon cuficahuun.

Filipenses 4:6 Referans Kwoze

1 Pedro 5:7

Ascashon matohuunoa shinanfafaini mato cushusharashquin. Ascan man ahuarafo shinanchaca cuscan Upa Diosin yoicahuun maton nomuran unimamanon.

Mateo 6:8

Ascacun marifi ato cuscara iyamacahuun. Man Upa Dios yocataima man yopai cuscan man tapiaquin.

Salmos 62:8

Uhuun yorafoan, nocon Ifo Diosi nantishotapiquin icoinra huafafaincahuun. Nocon Ifoan nocon cushumisi. Ascan maton nomuran man shinain cuscan nocon Ifon nantifi yoicahuun.

Colosenses 4:2

Ascacun Upa Dios cufinquin unuyamacahuun. Cufinquin ahuara futsa shinancaquima. Upa Dios iconcoin fusti cufinquin isca huafafaincahuun, —¡Aicho! Upa Diosin min ua shara huafafainiran, —ishon cuficahuun.

Efesios 6:18

Ascacun Diospan Yoshin Sharahuunshon Dios unutama cufifafaincahuun. Aqui mutoi futsucaquima. Ahuara futsa ahuuscarai cuscan Upa Dios cuficahuun. Ointiaquimacaquima. Upa Dios cufifafaincahuun. Nantifi Jesús icoinra huafo ato cufishofafaincahuun.

Colosenses 3:17

Manfin nocon Ifo Jesús ahuun yorafoquin. Ascano nantifi man yoiai cuscan huafain man acai cuscan nantifiri yorafo ato ismacahuun matohuun caononfo. Ahuunshon Upa Dios yoinonfo isca huaquin, —¡Aicho! Min ua shara huashomisiran, —ishon yoifafaincahuun.

Lucas 18:1

Afanan Jesús ahuara futsahuunoa ato yoini ato tapimashquin, —Upa Dios unutama cufiriai atsananonfoma.

Lucas 12:22

Ascaino Jesús afu rafumisifo yoiquin isca huani, —Afanan un mato yoisharanon. Ua nicasharacahuun. Isca huaqui shinanyamacahuun, “Non ahua pimara,” ishon shinanchacayamacahuun. Ahuaricai non sahuuimaran iyamacahuun.

Salmos 51:15

Uhuun Ifon, ua shinanmasharahuu un mihuunoa yoisharanon.

Colosenses 3:15

Ascacun Cristo nicacoinsharacahuun maton ointi sharamanocai man fochishmanantanantiroma. Ascatamarocon ahuunoashu isharacoincain ahuun yora fusti cuscara man itiroquin. Ascacun Upa Diosin mato catonni ahuunoashu isharacain futsafoqui man shinanchacanonma. Ascaquin man Upa Dios yoitiro isca huaquin, —¡Aicho! Upa Diosin min uhuun ointi shara huashoran, —ishon yoifafaincahuun.

Efesios 5:20

Ahuara ahuuscarafiaiton nocon Ifo Dios yoiquin isca huafafaincahuun, —¡Aicho! Noco Ifo Diosin, min ua shara huafafainiran, —ishon Upa Dios yoifafaincahuun. Nocon Ifo Jesucristohuunshon anori Upa Dios yoifafaincahuun.

Lucas 10:41

—Martashtan, minfin tushu fusti shinanquin. Ahuarafo futsa huaquicai mian nicaima. Nan uhuun tsain sharafin María catoanquin. Ua nicaquin.

Lucas 18:7

Asca Diosicai a niaifo chaca cuscarama. Ascatamarocon fasi noco nicapai. Noco nicaicain atsanatiroma. A catoanfoan shafatishon yafi yamutishon cufiaifo cuscan ato nicacasmaima.

Mateo 10:19

Ascatan mato achifiafo shinanchacayamacahuun ahuuscashomain man ato cumasharaicai. Ascashon niaifofoan ointaifi mato yocaifoanno nantianri Upa Diosin mato shinanmani man ato cumasharanon.

Lucas 12:29

Ascacun shinanquin isca huayamacahuun, “¡Ohuashta! Unmun ahua piishquin uhuun tushuyamaino. Unricai ahua sahuuimaran,” ishon shinanchacayamacahuun.

1 Samuel 1:15

Ascaiton Anapan cumani, —Niaifo, uncai pauinma. Unfin fasi shinancoinquin. Nan un shinain cuscan un nocon Ifo Diosi yoia.

1 Corintios 7:32

Un mato anori yoi maton nomuran ahuaton fucash huanonma. Un mato ahuinyacain funuyayamacahuun huaima. Un mato cayacafi imapai nocon Ifo fusti finacoinquin man shinanfafainon. Ahuaton maton nomuran fucash huanonma. Un mato yoisharapai. Un mato yoi maton nomuran omitsiscamashquimaquian. Ascaquimarocon un mato shara huapai Dios fusti man yonoshosharanon. Man ahuara futsa shinanonma. Ascashon un mato yoia cuscan nocofunun ahuionmaton ahuun Ifo unimamapaishquin. Ascan nocofunun ahuinyashon ahuinri unimamapai. Nan ahuinin ahuara yopai cuscan huafain fununri nannoricoin shinantiro. Nanscarifi aquin ahuun Ifo fustitocai shinantiroma. Ascashofin ahuun Ifo unimamapaifain nantianri ahuinri unimamapai. Ascacun ainfo funuomaton ahuun Ifo Jesús fusti yonoshosharapai. Ahua futsacai shinainma. Ahuun Ifo fusti tanashquin. Diosin imapaiyai cuscan huafain nan fusti shinainquin. Ascan ainfon funuyashon ahuun funuri unimamapaiquin ahuara futsafori shinantiro ahuun Ifo fustisima.

1 Pedro 4:7

Ascacun tsain futsari un mato yoinon. Shinancapon. Nantifi manifoti man cuyoti chaima. Ascacun cayacafi shinansharacahuun. Ahua chaca shinantamarocon Upa Diosin mato shinanmapaiyai cuscan nan fusti shinancahuun. Ascashon Upa Dios cufifafaincahuun.

Mateo 13:22

Ascan ushu futsafo moshafo muran pacuashu foaisharatiroma. Nanscarifiai futsafoan Diospan tsain nicafiashon ahuara nan acai cuscan fustisi shinain. Ascashon pui ichapa yafi mafo ichapa noi afi paramuquicai afanan Dioshuunoa shinantiroma. Ascaquicai Diosin ato amapaiyai cuscan futsafo shara huatiroma.

Daniel 3:16

Ascaiton cumacaquin isca huanifo, —Niaifo Nabucodonosor, noncai nocohuunoa ahuara mia yoima min noco numanon.

1 Samuel 7:12

Ascatan nocoafono Samuel toquiri uhuapa nan Mizpa yafi Sen nushmancayan nichini. Ascashon nan toquiri nichimua anuni Eben-ezer onicoinnin tsainman yoia —Nantian nocon Ifo Diosin noco cushushararan, —ishon Samuel anuni.

1 Corintios 7:21

Diosin mato catonnitian man futsan ahuun oinmati icashu shinanchacayamacahuun. Ascafiatan maton ifoan mato nichipaiyaino amaquinoashu fotacahuun afanan tsoan oinmati ishquima.

Daniel 6:10

Ascan niaifoan cununi cuscan Daniel nicain ahuun pushu ano cani. Pushu cunu futsa fomancaya inashon shoi ventana Jerusalenhuuri fupuni. Nannoshon imisi cuscan ratoconun mai chachishon Daniel nocon Ifo Diosi cufini. Shafatifi cufinquin rafu non fusti huani. Nocon Ifo Diosi cufinquin ahuunoa shara yoiquin aichoran huani.

Mateo 6:34

Ascacun shinanchacaqui isca huayamacahuun. “¡Ohuashta! Uncai tapiama funamanri ahuara chaca finoainno raca un tunuima,” ishon anori shinantama shinanquirocon isca huafafaincahuun, “Upa Diosin shafatifi ua cushusharamisi cuscan funamanriri ua cushusharairan,” ishon shinanfafaicahuun.

1 Timoteo 2:1

Natian tsain futsa un mia yoinon. Ua nicasharapun. Upa Dios cufifafaihuun. Nanfin fasi shara finacoianquin. Ahua futsacai ascarama. Nantifi yorafohuunshon Upa Dios cufihuun ahuun Yoshin Shara yopaifo cuscan ato cufishohuun. Diosin atohuun ramapainon cufishofain Diosin ato amapaiyai cuscan cufihuun nanscasi huanonfo. Atohuunoa Upa Dios yoihuu isca huaquin, —¡Aicho! Upa Diosin min na yorafo shara huashoshquiran, —ishon cufinquin nannori yoihuu.

1 Timoteo 5:5

Ainfo funuoma ahuun yoraomashon Dios fusti shinanquin. Isca huaquin cufitiro, —Upa Diosin ua cushusharahuu, —ishon cufitiro. Shafatifi yafi yamutifiri Upa Dios cufifafaintiro.