2 Timoteo 1:1 - Sharanahua: Diospan Tsain

^1-2 Uhuun facushtan Timoteo unquian Pablon afanan mia cunu fomai min tapinon. Un Jesucristo fu rafumisi. Apa Diosin ua nichipaiyai cuscan ua nichini manifoti ato tapimashquin ahuunshon Furun icoinra huashu non Dios fu ipatiroquin. Nannori Upa Diosin yoiyoni. Nocon Upa Diosin futan nocon Ifo Jesucristo mihuun noiquin mia cushusharafain mihuuri ramapaia. Ascashon min nomuran mia unimamanon.

2 Timoteo 1:1 Referans Kwoze

Hebreos 9:15

Moisés ato yononi cuscan sharafiacucai tsoan nicafafainpaonima. Nantianri nantififain chaca huapaonifo. Ascano nanfoan chaca huapaonifo cuscan Cristo fustiton aton chaca soashotiro. Ascafoancai Moisés ato yononi cuscan afanan ato yonotiroma. Ascacun natian Cristo atohuunoashu nani ato chaca soashoshquin. Nanfin ato Numamisi sharaquin. Ascan Cristo icoinra huafoti Upa Diosin ato yoitiro isca huaquin, —Uqui fucahuun uhuun facuhuunoashu uhuun yorafo iishcaquin, —ishon yoitiro. Nanto noco yoiyotiani cuscan Furunhuunshon noco catontiro ahuun yorafo non inon.

Juan 17:3

Mirus fusti min Diosincoin. Unfin Jesucristoquin nan mian nichini. Tsoan noco onancoianfin nipanacafoquin.

2 Corintios 1:1

Uhuun yoramishtichin un mato cunu fomai man tapinon. No futan Jesús tanamisi Timoteo futan un mato cunu fomai. Upan Diosin ua catonpaiquin ua catonni ahuun tsain Jesucristohuunoa un ato yoifoanfafainon. Un Jesucristo fu rafumisi. Nantori ua nichini. Icoinra huafo Corinto anoafoan yafi Diospan yorafo Acaya mai anoafori un mato nantifi yoisharai.

Juan 10:28

Omitsiscapanacafo muran focanima. Ua tanaifocai ari fonacafoma. Ascatamarocon un ato Upa Dios ya imapacunaca. Upa Diosin ato ua inan. Upan nantifi finoncoian. Upa Dios fu un fusti cuscaracoin. Ascancunfin tsoancai ua tanamisifo unmaqui yafi Upamaquiri imapacunacamaran, —ishon Jesús ato yoini.

Efesios 3:6

Ascan nan tsain sharacai tsoan Jesushuunoa tapiyopaonima. Ascan mani futsafori Upa Diosin yorafo itirofo. Ascacun natian matorifi Diosin tapimai. Israelifo yafi mani futsafo Jesushuunoashu Diospan yora fusti cuscarafo. Ascano Upa Diosin uhuun caifo Israelifo yoiyotiani cuscan Jesucristohuunshon manifoti nanscarifi huaquin inantiro.

Juan 6:40

Nan ratoranfoan un Diospan facun ua icoinra huaashufin no fu Upa Dios icari ipasharatiroquin. Un afanan mai ano oaitian a namisifo un ato funimashquin ufu nipasharanonfo. Ascarafin uhuun Upa Dios fuchipaiquin, —ishon Jesús ato yoini.

1 Juan 2:25

Noco yoiyotiani cuscan non afu ipasharatiroquin.

1 Timoteo 6:19

Ascashu chipo Diosiqui nocoaifotian ato inain cuscacai cuyopacunacama. Ascatari Dios fu isharapacutirofo.

2 Corintios 1:20

Upa Diosin noco yoiyotiani cuscan nantifi Cristo man noco ashomisi. Ascacun non nantifi yoimisi isca huaquin, —Non Jesús icoinra huashon. Noco yoia cuscan aquin non yoitiro. ¡Aicho! Nocon Ifo fasi sharacoinran, —ishon non yoimisi.

1 Corintios 1:1

Uhuun yoramishtichin un mato cunu fomai. No futan Jesús tanamisi Sóstenes u futan mato cunu fomai. Upan Diosin ua catonpaiquin ua catonni Jesucristo fu rafunon ahuun tsain Jesucristohuunoa un yoifoanfafainon. Ascan Jesucristo ua nichini un ahuun tsain shara nantifi manifoti un ato yoifoanfafainon. Corinto anoafoan manfin Diospan yorafoquin. Man ichananfafainmisi Diospan tsain tapisharashquin. Diosin mato catonni Jesucristohuunoashu man ahuun yora sharafo inon. Ascacun un mato cunu fomai. Mato fustisima un futsafori cunushoni. Nocon Ifo Jesucristo Ifo huacun un atorifi na cunu un ato tapimapai. Nan nocon Ifofin aton Iforiquin.

Romanos 6:23

Tsoa chaca ahuun ifono ahuunshon ato omitsiscapanacafo muran potashquin. Ascafia nocon Ifo Jesucristohuunshon Upa Diosin noco cashman numano non afu ipanon.

Romanos 5:21

Ipaoni chaca fustisi yorafoan aton ifo icaino ato namaquin futsani. Ascafiashu natian Upa Diosin nocohuun ramapaiyaino nocon Ifo itiro. Nocon Ifo Jesucristohuunshon nocon chaca noco soashotiro a cuscara shara non inon afu ipashquin.

Romanos 1:1

Uhuun yoramishtichin, Roma anoafoan un mato cunu fomai man tapinon. Unquian Pablo unfin Jesucristo ahuun oinmatiquin. Ua catonni un afu rafumisi un inon. Upa Diosin ua nichini ahuun tsain shara Furunhuunoa un yoinon. Jesús David ahuun funa ini. Caiantaima Diospan tsain shara inonpacoai cuscan ahuunoa cunushonifo.

Juan 6:54

Ratoranfoan uhuun nami pifain uhuun imi ayafain ufu nipashcaniquin. Ascan un afanan nai murannoashu oaitian un ato funimashquin Upa Dios icari nipasharanonfo.

Juan 5:24

Un mato iconcoin yoinon. Tsoan uhuun tsain nicasharafain Upa Diosin ua nichini icoinra huafin Upa Dios fu ipasharapacunacaquin. Un nan cuscara yora onaintimaima. Afanancai Satanás ahuun yora itiroma. Omitsiscapatamarocon natian afi Upa Diosin ahuun yoracoinquin afu ipashquin.

Gálatas 3:26

Natian nantifi Jesús icoinra huafo Diospan facufo.

Gálatas 3:28

Upa Diosin Cristohuunshon nantifi manifoti anoafo noco nanscarafosi oin. Uhuun caifo Israelifo yafi Israelifoma non yonomatifo yafi yonomatimafori non nocofunu yafi ainfofori nanscarafosi noco oin. Jesucristo noco Ifo icaino non ahuunoashu yora fusti cuscara itiro. Ascan nantifi icoinra huafotifin non ahuun yorafo.

2 Timoteo 1:9

Ascano Upa Diosin noco numani non ahuun Furun cuscara shara inon. Non ahuara shara huaa rafanancai noco numanima. Afin apaiyai cuscan noco numani. Nocohuun noiquin noco numani. Ahuarafo oni huataima Jesucriston nocohuun ramapaicain nocohuun noia.

2 Timoteo 1:10

Ascano nocon Numamisi Jesucristo noconi. Ascacun natian ahuunshon non tapitiro fasi nocohuun noi ahuatoncai noco namapacutiroma. Ascacun ahuun tsain sharahuunshon non tapitiro nocon chaca soashonano non afu ipanaca.

2 Timoteo 1:13

Un mia cayacafi tapimana cuscan icoinra huacoinhuun funoshquima. Nocon Ifo Jesucristo icoinra huafain ahuunri noicoinhuun. Ascacun ahuunshon nantifi noicoinhuun.

2 Timoteo 2:1

Timoteon uhuun facushtan Jesucristo ahuun curushhuunoashu min isharatiro chaca huashquima.

2 Timoteo 2:3

Ranushumua shara omitsiscatirofia ahuun niaifoan yoiai cuscan nicasharatiro a yoia cuscacoin aashquin. Nanscarifiai mirifi min no fu Jesucristohuunoashu omitsiscatiro.

2 Timoteo 2:10

Ascashon Diospan tsain nicasharatirofo. Ascaifoan atorifi Diosin catonshquin. Ascacufin nuno cunu muranshon un tunuicain futsafoan Jesucristo icoinra huanonfo afu ipashcaquin.

2 Timoteo 3:15

Nan facushtashon min Diosin tsain shara tapinifoanna. Nanfoan mia shinansharamatiro min Jesucristo icoinra huashu afu ipashquin.

Tito 1:4

Tito, un mia nocon Ifo Jesucristo icoinra huamani cuscan min Jesús icoinra huashu min uhuun facu cuscaracoin. Un Jesús icoinra huaa cuscan mirifi min nansca huani. Ascacun nocon Upa Diosin futan nocon Numamisi Jesucristo mihuun ramapaicain mia nomuran unimamanon.