2 Corintios 6:16 - Sharanahua: Diospan Tsain

¹⁶ Cristo icoinra huafo ichanancashon Upa Dios cufitirofo. Nantianricai icoinra huamafo atofu ichanantirofoma ahuara ramihuacashon cufishcaquin. Nan rafucai ositirofoma. Futsafoancai Upa Dioscoin cufipaicanima. Ascan nonfin Diosin pushu cuscaraquin. Nocon Diosfin natian niaquin. Diosin yoini isca huaquin, “Unfin atofu iquicai. Ato fu rafucacaishquin. Un aton Dios icano. Nanfo uhuun yorafo inonfo.

2 Corintios 6:16 Referans Kwoze

Apocalipsis 21:3

Ascan Upa Dios tsaoa ano oi ashcafinin un nica. Yoia isca huaquin, —¡Aicho! Natian Upa Dios yorafo fu iishquin. Ato muran iishquin nanfo ahuun yorafo inon. Aafin aton Diosiri iishquin.

Hebreos 8:10

“Un Israelifo yoishquiai cuscacai cunu fustihuunshon un ato tapimashquima. Ascatama aton nomuran uhuun tsain shara nanumafain aton nomuran cunui cafisca huaano. Nan un ato yonoai cuscacoin anonfo. Ascano un ato Upa Diosincoin iishquin. Nanfo uhuun yorafo iishcani.

1 Corintios 6:19

¿Man tapiamamun Diospan Yoshin Shara no fu ica? Nocon cayafi ahuun pushu cuscaracoinquin. Nanno ica. Upa Diosin ahuun Yoshin Shara matoqui nichini. Nan pushu ifofin fusticoin. Nanscarifiai Diospan Yoshin Shara fusti maton Ifo. Mafincoincai man ifohuamutiroma. Manfin ahuunafoquin.

Romanos 8:11

Jesús naafiacun Upa Diosin Yoshin Shara funimani. Nan Yoshin Shara matofu rafuaino matori funimashquin maton caya afanan nisharanon.

Apocalipsis 21:7

Tsoan ua cachiquiri huatamarocon nan naitian ua tanasharacun nantonacaifin nantifi un mia yoia cuscan ahuunari iishquiquin. Naanfin un cashman inanshquin. Unfin ahuun Dios iishquin. Aafin uhuun facu iishquin.

1 Juan 4:15

Ascan tsoan yoiquin isca huai, —Jesusfin Diospan Furunquin, —huafin Upa Diosin afu ipanacaquin. Ascarifiai Upa Dios fu ipatiroquin.

Juan 6:56

Ratoranfoan uhuun nami pifain uhuun imi ayai ufu rafupacunaca.

Hebreos 3:6

Ascafia Jesuscai Upa Diospan oinmatima. Ascatama nancairocofin Furuncoinquin. Ascashu ahuun yorafoan ato Ifocoin. Nan Apa yononi cuscan ahuun yorafo cushusharacoinmisi. Ascacun Upa Diosin tapipai nonmain Jesús icoinra huashon noco yoiyotiani cuscan non ratutama manasharaicai nan Jesús afanan oaitian. Ascashu non nanscacoiashu non ahuun facufo ipatiroquin.

1 Pedro 2:5

Man aqui oashu nan toquiri uhuapama nia cuscarafo man itiro. Nan Diosin pushu huatiro cuscai. Iquisi toquiri mutsisipa uhuapa shara fia. Nanfin nocon Ifo Jesús. Apan catonquin tau huani chipo nocorifi catonni Jesús cuscara shara non inon. Ascan Jesushuunoashu norifi non Diospan pushu cuscara. Tsoa na pushu muran opai isharacointiro. Ascan nonfin ahuun pushu anoa ahuun yonomatifoquin. Ascashon noco amapaiyai cuscan fusti non Jesushuunshon ashosharatiro. Non Diosin Furuhuunshon isharamisi. Ascacun non yonoshonai cuscan Upa Diosin nocoqui unimacacaini.

2 Timoteo 1:14

Upa Diosin min nomuran ahuun tsain shara mia nanumana cuscan afohuunoa shinanfafaihuun funoshquima. Ascano ahuun Yoshin Shara nantishotapiquin no fu rafui. Ahuunshon Diosin mia tapimana cuscan min nomuranshon min mucusharatiro funoshquima. Futsafori tapimashquin.

1 Juan 4:12

Tsoan Upa Diosin oinyamafiamisishaquin noinanquin non tapitiro no fu ica. Non asca huafafainquin Diosin noco noiai cuscan norifi ahuunshon futsafori non noitiro.

Romanos 9:26

Afanan ato yoini iscahuaquin, “ ‘Mancai uhuun yoramaran,’ ishon Diosin mato yoiaran, huanifo. Ascafia chipo atohuunoa yoishcaquin, ‘Upa Diosin niaton man ahuun facuforan,’ ishon yoishquicani.”

Romanos 8:9

Ascafia mancai aton cuscarama. Chaca afanan maton ifoma. Diosin ahuun Yoshin Sharafin mato fuqui. Nantofin mato yonomisiquin. Ointiaquimayamacahuun. Tsoan Jesús ahuun Yoshin Shara fu iyamaino ahuun yora itiroma.

Efesios 2:20

Upa Diosin ahuun yorafofin nan pushu shara huamua cuscarafoquin. Non pushu tau huaquin quishi mutsisipacoin non yopatiro. Chipo nantifi pushun canofo non ichanan huatiro. Nanscarifi aquin Jesús fu rafumisifo futan Diospan tsain yoimisiforifi nan pushu cano shara cuscarafoquin. Pushu cano shara yamainocai non ahuuscashon fomancayan shara huatiroma. Nanscarifiai Jesús fu rafumisifo non Diospan tsain yoimisifoanri noco yoiyamainocai non ahuuscashon icoinra huacuanama Diospan yorafo iishquin. Ascano Cristo Jesusfin nocon pushu quishi mutsisipacoin cuscaraquin. Pushu quishi yamainocai non pushu huatiroma. Nanscarifi aquin Cristo yamainocai non Diospan yora icuanama. Ahuunoashufin nan pushu shara huamua cuscara non itiroquin. Nonfin nocon Ifohuunoashu pushu mutsisipacoin cuscaraquin ahuashtacai chaca amuran iquitiroma. Pushu yonomisiton ahuarafo fitiro pushu huashquin. Nanscarifi aquin natian Upa Diosin icoinra huafoti ahuun Furunhuunshon noco nannorisi shinanmaino non ahuun pushu cuscara shara inon ahuun Yoshin Sharahuunoashu non afu iishquin.

Éxodo 34:14

Urus fustifin un mato Ifo Diosiquin. Ua fusti noifain ua fusti cufincahuun. Ua man noiai cusca ahuara futsafo noiyamafain nanfori cufinyamacahuun. Unfin mato fu rafuaquin maton Ifo fusti iishquin. Uhuun anufin mato Ifo Dios fustiquin. Tsoa futsacai u fu maton ifo itiroma. Ahuara futsa man ifohuapaiyaiton nanscarafo cufinquin man uhuun ointi isinmatiroran, —ishon nocon Ifo Diosin yoini.

Éxodo 20:3

Nan yora futsa iyamarai ahuara futsafocai maton Diosin itiroma.

Mateo 6:24

Ascan oinmatinincai ahuun ifo nanno rafu nantian yonoshotiroma. Futsa noifain futsa noicasmatiro iyamarai futsa nan yoia cuscacoin huashotiro. Ascashon futsa, “Nacai ahuamaran,” ishon shinantiro. Tapicai huatiroma ratocaimain nicasharaiquin. Nanscarifiai Dios yonoshopaiquicai man pui noitiroma maton ifo inon.

Apocalipsis 2:1

Ascatan Jesús ua yoiqui isca huaquin, —Ua icoinra huafo Efeso anoa aton Diosin tsain yoimisi un yoipaiyai cuscan ua cunushoquin isca huai. “Unquian maton Ifo Jesús un nantifi Uhuun Upa Diosin tsain yoimisifo un atofu icacaimisi ato cushusharashquin. Ascacun un mato yoipaiyai cuscan ua nicasharacahuun.

Mateo 16:16

Ascaiton Pedronun cumani, —Minfin Cristoquin. Nan Diosin nipanacaton mia catonni min ahuun facuran, —ishon yoaiton.

Juan 14:23

Jesús cumani, —Tsoan ua noi un mato yosiain cuscan ua nicacointiro. Uhuun Upa ahuun noiaino urifi un ahuun noi. Non afu rafupacushquin.

1 Corintios 10:21

Man nocon Ifo Jesús fu rafupaicain a yoshin chacafo fu man rafutiroma. Ascashuri nan rafu man ositiroma. Man Jesús icoinra huafo fu ichanancashon man ato futan ayafain Jesús noco nashoni cuscan shinanshquin. Man asca huatacai nantianri aa Jesús icoinra huamafo fu man ichanantiroma nan yoshin chacafo shinanshquinma.

Santiago 4:5

Diospan tsain cununi isca huaquin, —Uhuun Yoshin Shara un mato ya rafumaniran, —ishon cununi. ¿Man shinanmun ipaitsi noco cunushoni? Man ahuara futsafo noiaiton oinquin ahuun Yoshin Shara fasi ahuun ointi isincointiro.

Lucas 5:36

Ascashon afanan Jesús ato yoiquin isca huani, —Tsoancai sahuuti shuni fashnucun poto funapan icushtiroma. Asca huashon poto funapan icushuano ustui futsuashu chacanai finatiro. Aquirifi sahuuti shuni anaitiriscatiro. Afanancai funa cuscara itiroma. Nanscarifiai un mato yosiai cuscan nicacoinshocai man apaoni cuscan afanan man huatiroma. Tsoan ua tanacoinshon ipaoni cuscan cachiquiri huacointiro. Ascashu funa cuscara shara iishquin.