1 Pedro 2:11 - Sharanahua: Diospan Tsain

¹¹ Uhuun yoramishtichin un mato yoisharapaiyai cuscan ua nicasharacapun. Non icoinra huamafo muran ifiashucai non atofu ipanacama. Noncai aton yoracoinfoma. Ascafia nan icoinra huafoma icaifo cuscan ayamacahuun. Mato amaquiri shinanchacamapaifiaifoan ascara shinanyamacahuun. Nanfoan maton nomuran mato chaca huamapaicani.

1 Pedro 2:11 Referans Kwoze

Gálatas 5:24

Cristo Jesús ahuun yorafoan chaca huapaonifo cuscan ihui coyan iquinanqui man mastanifo aton chaca nantifi cuyonon. Jesús ihui coyan iquinanqui noco nashoni nocon chacafori afu mastai cafisca non a cuscara shara inon. Non chaca huapaoni cuscacai non afanan asca huapaima.

1 Pedro 4:2

Anori shinanquicai man afanan chaca shinainma Upa Diosin mato amapaiyai cuscan fustisi man huapaitiro.

Hebreos 11:13

Nantifi na rama yorafohuunoa mato yoia cuscan afanan atohuunoa un mato yoi. Diosin ato yoiyoni cuscan fiashuma naanifo. Fiataiyamafiaquin Dios icoinra huanifoan chipo fiishcaquin. Ascacun Diosin ato yoiyoni cuscan aton nomuranshon oincoin cafiscai unimacoinnifo. Ascashon yoinifo isca huaquin, —Nunocai non ipanacama. Na mai anoashu nan mai futsa aria yora futsa cuscarafo nonran, —ishon yoinifo.

Romanos 8:13

Chaca nocohuun nuano non omitsiscapanaca nai. Ascafia Diospan Yoshin Sharahuunshon non chaca huamisi cuscan non shatuaino afanan chaca nocohuun nutiroma non Upa Dios fu nisharapacunon.

Santiago 4:1

¿Ahuuscain mafi ranan man fochishmanantanantiashu man sutunainmun? Maton nomuran shinanchacashufin man ascaicain. Chaca fusti fuchipai.

2 Timoteo 2:22

Ascan pushcofoan chaca huapaimisi cuscan mirifi asca huayamahuu. Nan chacafo huaifoan oin atomaquinoashu ichoriscatahuun chaca huashquima. Chaca huapaiquimarocon iscarafo fuchipaihuu. Jesús cuscara shara ipaiquin nan icoinra huafain futsafo noicoinfain isharacoinhuun. Futsaforifi Jesús aton chaca soashona aton nomuranshon shinansharaifoan Diosin tanasharapaiyaifo. Nanscarafo fu rafuhuun.

2 Corintios 7:1

Uhuun yoramishtichin Upa Diosin noco nannori yoiyotiani cuscan shara. Ascashu non isharanon. Nantifi nocon chaca non shatunon. Ahuarafoan nocon caya iyamarai nocon nomuran noco chaca huamatiro nanfo non shatucoianshu nan cuscara shara non itiro. Non Upa Dios noicoianshu a cuscara shara fusti non ipainon.

Romanos 12:1

Uhuun yoramishtichin un mato yoisharapaiyai cuscan acapun. Upa Diosin matohuun ramapaiquin mato shara huamisi. Ascacun marifi matohuunoa inancahuun mato ifo inon ahuun yonomati ipashcaquin. Man ascaino afanan chaca maton ifo itiroma ahuunacoin man inon. Shinancapon. Man cayacafi shinansharacoinquifin matohuun noiai cuscari marifi man ahuun noitiroquin. Man ascaino Upa Diosin fasi matoqui unimacoin.

Efesios 4:1

Ascan un nocon Ifo yonoshonaiton ua cunu muran iquimanifo. Ascacun uhuun yoramishtichin ua nicasharacapun. Un mato cayacafi shinanmapai. Upa Diosin mato catonni man Jesucristo tanasharanon. Ascacun nan mato amapaiyai cuscan acahuun futsafoan mato oinquin nocon Ifohuunoa shinansharanonfo.

Hechos 15:29

Diosicoinma tushu tamanchinafo piyamacahuun. Imi ayayamacahuun. Yoina yafi ina tumosishon imi foamano ahuun nami piyamacahuun. Maton ahuinma chotayamacahuun. Maton funuma chotamayamacahuun. Nan fusti non mato yoipai. Nantisi non mato yoi. Non cunua cuscan aashu man isharacointiroran, —ishon cununi.

Lucas 21:34

Ascacun oinfain. Un matoqui nocoriscatashquin. Man itisharayamano ahuarafo ahuuscarai futsui. Ascacun ahuara chaca huayamacahuun. Paunyanan monofafainyamacahuun. “¡Ohua! Un ahuuscarairan,” ishon shinanfafaiyamacahuun. Nanscafin nan ua icoinra huamafofo aaquin. Afo itisharafomano un nocoriscatashquin. Afo icai cuscan ayamacahuun. Oinfain. Masharo nicatsashu cunu muran iquitiro cuscan ayamacahuun.

1 Pedro 1:17

Ointiaquimayamacahuun man nocon Upa Dios cufifafainai cuscan nanton noco nantifi oinfafainni nanscarafosi. Nanscacun Diosin nanscasi huaquin nocohuun noi. Upa Diosin nan yonoshomisifo cuscan atoti inanpacushquin. Nan yonoshosharamisifosi ato paratama inanpacushquin. Ascan nan yonosharamafo funoshcani. Ascacun oinfain. Nuno mai ano niyoshon Diosquiri shinansharacahuun mato yonomapaiyai cuscan ashocahuun funoshcaquima. Man nonfin tapiaquin non nuno mai ano ipanacama. Non chipo Diosqui nocoshquin.

2 Corintios 6:1

Ascashon non Dios fu yonoi mato shara huamashquin. Nanscacun nicacoincahuun. Diosin matohuun ramapai. Cristohuunshon man maton chaca soashoni a cuscara shara inon. Diosin matohuun noicoinfiaiton potayamacahuun funoshcaquima.

2 Corintios 5:20

Nanscacun Cristo noco nichini non ahuun tsain mato yoinon. Non ahuun tsain mato yoiquifin nan Upa Diosicoinin mato yoia huaquin. Upa Diosifin nocohuunshon mato yoiquin. Cristo mato yoipaiyai cuscari non mato yoi. Ascacun noco nicacoincapun. Cristo mato nashoni chacafo mato soashoshquin. Ascacun maton chaca shatucahuun afanan Upa Dios fu rafushcaquin.

Hechos 15:20

Ascatamarocon non ato cunu fomatiro yoiquin isca huaquin, “Dioscoinma aton Diosiran huacashon tushu tamanchinafo. A oincaquin tushu piyamacahuun. Man ascara piaino futsafoanri mato oincaquin shinantiro marifi ato futan dioscoinma man fuchipai cufishquin. Ascan chaca itiro. Maton ahuinmari chotayamacahuun. Maton funumari chotamayamacahuun. Yoina yafi ina tumosishon ahuun imi foyamaino ahuun nami piyamacahuun. Imiri ayayamacahuun.”

Génesis 47:9

Ahuun fari yoini, —Uhuun fari ciento treinta. Nan ciento treinta farifiashu mun nan maitifi cahuacacaimisi. Uhuun upa yafi uhuun shunifo aton fari ua finonmainifoantan inifo. Unfin mun omitsiscapaoni, —ishon yoini.

1 Pedro 1:1

Unquian Pedro un Jesucristo fu rafumisishon ua yonopaiyai cuscan un ashoshquin. Un mato cunu fomai man tapinon. Man Jesús tanaino maton mai Jerusalén anoshon mato potanifo. Ascan man maitio pashcai futsufaini. Atirifi man Ponto ano foaino atirifiri man Galacia ano foaifoanno atirifi Capadocia ano foaifoanno atirifi Asia ano foaifoanno atirifiri man Bitinia ano foni. Upa Diosin inonpacoai cuscan mato catonni ahuun facufo man inon. Jesucristo mato nashoni maton chaca mato soashoshquin ahuun Yoshin Sharahuunshon mato chaca shatufain man tanasharanon. Ascano Upa Diosin matohuun ramapaiquin maton nomuran fasi unimafafaini.

Génesis 23:4

—Nunocai uhuun maima. Unricai mato caifoma. Ascan ua mai inancahuun uhuun ahuin mai huanon, —ishon Abraham ato yoini.

Efesios 2:19

Ascacun mancai afanan yora futsafo cuscarama. Natianricai man afanan Dios onanmisima cuscarama. Natianfin man Diospan yorafoquin. Nan mani futsafori Diospan yorafoquin. Ascacun ahuun facu futsafofin maton yorafoquin. Manfin nanscarafosiquin.

Hebreos 6:9

Uhuun yoramishtichin, un mato na rama cunushona cuscacai un anori matohuunoa shinainma. Ascan mancai ascarama. Un icoinra huai mancai nocon Numamisi Jesús cachiquiri huamisima. A tanasharashon nan mato yoia cuscacoin man amisi.

1 Pedro 4:12

Uhuun yoramishtichin omitsiscafiai mustairiyamacahuun. Shinanchacayamacahuun. Man tunucoiainton oinquin Upa Diosin tapitiro man Jesús tanacoian. Ascacun shinanqui isca huayamacahuun, —Ahuuscain un omitsiscaimun, —ishon anori shinanyamacahuun.

2 Pedro 3:1

Uhuun yoramishtichin afanan un mato cunu foma futsai. Nan na cunun un mato shinansharama futsapai man afanan ointiaquimanonma.

Génesis 21:34

Filisteofo mai ano fari ichapa Abraham nan mai ano iyopaoni.