1 Corintios 12:18 - Sharanahua: Diospan Tsain

¹⁸ Ascafiacai Diosin noco ascara onihuanima. Nanfin apaiyai cuscan noco onihuaniquin. Ascashon nan noco tuchipaiyaino nocon cayahuu noco tuchiqui futsani.

1 Corintios 12:18 Referans Kwoze

1 Corintios 12:28

Ascan nantifi nan Jesús icoinra huafoti Upan Diosin noco catonni ahuunshon ahuara futsa futsa huaquin non ashonon. Cristo nuno mai ano niyoatian futsafo catonni afu rafunonfo. Ascashori ato nichini ahuun tsain ato yosifoanfafainonfo. Cristo afu rafumisifo catonquin tau huani. Ascashon chipo Diosin tsain yoimisifo catonfain Diosin tsain tapimamisifo catonfain tsoan oinyomisima cuscara ahuunshon atirofo catonfain Jesushuunshon isinincaifori cayahuamafain futsafo ashofafainmisifo catonfain futsafo yonosharamatirofori catonfain futsafoan nan tsain futsaman ahuun Yoshin Sharahuunshon yoitirofo nanfori Diosin ato catonni. Nantifi catoan ahuunshon yorafo ashonsharanonfo.

1 Corintios 12:11

Nanfofin Diosin Yoshin Sharapan ahuun yonoquin. Nan icoinra huafotifin Diosin Yoshin Sharapan ato amapaiyai cuscan acaniquin. Naantofin nan noco amapaiyai cuscan noco huamatiroquin.

Romanos 12:3

Upa Diosin uhuun ramapaiquin ua maton muran nichini un mato tapimanon. Ascan un nantifi mato yoisharapai. Cacapaimisi iyamacahuun. Diosin mato imapaiyai cuscan fusti shinancahuun. Ahua futsa ipaiyamacahuun. Man Dios icoinra huatiro cuscan afin mato shinanmanaino cayacafi shinansharacahuun. Man icoinra huaa cuscan nan fusti Upa Dios ashocahuun.

1 Corintios 3:5

Ahuuscaimun atirifiton man isca huaquin, —Non Pablo yafi Apolos tanairan, —man ica. Apolos fucai un ahuama. Nonfin nocon Ifo Diosin ahuun oinmatiquin. Nocohuunshonfin man Jesús icoinra huaniquin. Diosin noco catonni noco yonomapaiyai cuscan noco yonoshquin Furunhuunoa man tapinon.

Lucas 12:32

Ascano uhuun yorafoan ratuyamacahuun. Maton Upa Diosin mato cushushara. Nantifi ahuuna matori inain. Unimacai mato inanshquin.

1 Corintios 12:24

Diosin nocon caya noco onihua cuscan huafain fasi non cushushara. Ascashon non yoitiro isca huaquin, —Un na yopacoinran, —ishon. Nanscarifi aqui ratoran Diosin yorafofiacun nacai ahuamaran huafiafo nancaifin Diosin ahuun fasi noiquin. Ascacun atohuunoa non yoisharafain non ato yopacoin.

Lucas 10:21

Ascano ato yoiqui anaititan Diosin Yoshin Sharahuunoashu unimacoinquin Apa Dios yoiquin isca huani, —Upa Diosin, min fasi sharacoin. Nantifi nai murannoafo futan mai anoafoan aton Ifofin minquin. Ascano nan mapo sharayafo yafi cunu tapiafocai min tsain shara min ato tapimanama. Ascafia nan cunu tapisharafoma nan facu cuscarafoqui. Ascashon nanfoan un ato isma cuscan yafi un ato yoiai cuscan ua icoinra huafo. Nanfofin min ato tapimanaquin. Icon, Upan, minfin nanscara fuchipaiquin, —ishon apa yoini.

1 Corintios 15:38

Ascashon non ahuun ushu fanafia Diosin foaimatiro. Afi apaiyai cuscan fana futsa futsatapafo huaa. Nanscashori ahuun tashofo yafi ahuun caya cuscarafo ato onihua.

Apocalipsis 4:11

Ascan minfin isharamisiquin. Ascacun mihuunoa fusti non yoitiro isca huaquin. Min nocon Ifocoin. Min nocon Dios. Tsoa futsacai mia cuscara sharama. Min isharapacunaca. Ascacufin non mia fasi noicoinquin. Ascan minfin min shinanpasi ahuamamishti huatiroquin. Min nantifi ahuamamishti onihuani. Min apaiyai cuscan fusti nantifi min onihuani. Ascacun minhuunoashu fusti nitiroforan,” ishon nan Jesús tanamisifo veinte cuatro yorafoan yoiafo.

Efesios 1:9

Ascano Upa Diosin afi apaiyai cuscacai tsoa tapimayonima. Ascafia noco tapimana nocohuun ramapaiquin nocoqui Cristo nichini. Ascano Upa Diosin afi shinanyoni cuscan Furun Cristo nan nichipaiyaitian afanan nichishquin nantifi ahuun yorafo nai murannoafo yafi mai anoafori ato ichanan huashquin Cristo arus fusti aton Ifo inon.

Efesios 1:5

Nocohuun noicoinquin afin apaiyai cuscan noco huani Jesucristohuunoashu norifi non ahuun facufo inon. Nanscara afi fuchipaiyoni.

Romanos 12:6

Upa Diosin nocohuun noiqui cashman noco imapaiyai cuscan non ahuunshon futsafo ashosharatiro. Noco imapaiyai cuscacai non ascarafosima. Upa Diosin man atirifi catoan ahuun shinanhuunshon icoinra huaa futsafori ahuun tsain yoinon. Mato catoncun man icoinra huashon mato yoia cuscan futsafori ahuun tsain yoicahuun.

1 Corintios 12:17

Nocon cayahuu furo fustiacumun ahuuscashon non nicacuanaquin. Nanscarifiai nocon cayahuu pafiqui fustiacumun non ahuuscashon shutucuanaquin.

1 Corintios 12:19

Nocon caya ahuara fusti ya icainocai shara icuanama.