Roma 1:30 - U Maganda A Baheta Ni Jesu-Cristo

³⁰ Mangsida hide tu kapareho de, maiyamut hide tu Diyos, awan hide ti galang sakay tunay hide ti kapalaluwan, palagi a magehyok ti madukás sakay awan sumunud tu dáddakál di hide.

Roma 1:30 Referans Kwoze

2 Timoteo 3:2

Káddemát ni panahunan ina ay magin makasadile u tolay hide, gusto diyay ay kaowan de u atanan a pilak, hambug hide. Mágkaseste hide, masássuwayan hide tu dáddakal de, awan hide ti utang a luub, nabusong hide dipo awan hide tumengge tu Diyos.

Judas 1:16

Iye hide a tolay ay awan makontento tu biyag de, maseste sakay u gugusto de a sunudán ay u kagustuwan nu pilas, mágkahambug sakay sanay hide a mangloko para maalap de u gusto de.

2 Pedro 2:18

Dipo u pangisip de ay tunay hide ti kalalake, pero awan labe ti seserbi u kákkagiyán de. Kákkagiyán de a awan madukás u kássunud tu kagustuwan nu pilas. Kanya maakit de a maggimet a huway ti madukás u bigu palla hide a immadág tu date de a madukás a kákkabiyag.

Santiagu 4:16

Pero nadid ay mágmadakál kamon sakay maghambug, madukás ina!

Santiagu 3:5

Konna labi hina u dila nu tolay; kabaditan a parte nu bággi, pero tunay ti kadakál u magimet na a kapalaluwan. Sakay isipán moy dálla a kayang-kaya a matutod nu badit a apoy u tunay a lawak a talon.

Tito 3:3

Dipo tu itod ay awan kitam be ti tukoy. Hikitam be tu itod ay masássuwayán sakay maigát ti págguluwan. Nalinlang kitam sakay naalipin kitam tu atanan a kalase nu kadukássan sakay mágkadangát a gimet, nabiyag kitam tu kadukássan sakay kassene. Kaiyamutan kitam nu agum sakay kaiyamutan tam be hide.

2 Tesalonica 2:4

Kalabanán na u atanan a sássambaán sakay diyos nu tolay hide, sakay ilangkaw na u sadile na. Mággetnod siya tu disalad nu Templo nu Diyos sakay ikagi na u sadile na a siya u Diyos.

2 Corinto 10:15

Awan me ipagmadakál u nagpagudan nu agum. Nan asaan me a tu káttibay nu pánnampalataya moy, ay lumawak palla u gawain me nikam, pero awan kame lummampas tu impagimet nu Diyos nikame.

Roma 3:27

Kaya awan kitam ti ipagmadakál, dipo u pángturing nikitam a matuwid ay bakán a tu kássunud tam tu Kautusan, nan tu pánnampalataya tam ni Jesus.

Roma 2:23

Ipágmadakál moy a hod nikam u Kautusan nu Diyos, pero awan moy labe inggagalang u Diyos dipo awan moy sássunudán u kinagi nu Kautusan a dapat a gimitán.

Roma 2:17

Nadid, kákkagiyán moy a hikam ay Judio, sakay maniwala kam tu Kautusan sakay ipágmadakál moy u rilasyon moy tu Diyos.

Gimet 5:36

Sakay awan beman awan palla nalay a limmitaw ti Teudas a nagkunware a essa a dakila a puno, sakay naakit na u áppat a datos a tolay a nák-agum nikuna. Pero namághiwewalay u tauhan na hide nikuna nabuno siya kaya nabaliawan u gurupo de.

Lukas 21:16

Itokyon kam nu dáddakal moy hide, kakkapatkakka moy hide, kapartidu moy hide sakay barkada moy hide. Sakay ipabuno de u agum nikam.

Mateo 16:21

Sapul hod ay impakapospos dán ni Jesus tu disepulus na hide a kailangan siya a umangay ti Jerusalem. Magdanas siya hod ti makpal a hirap tu kamát nu pinuno nu banuwan, pupuno nu saserdote hide sakay tu maisto hide nu Kautusan ni Moises. Sakay ipabuno de pa siya pero tu katállo a aldew ay huway siya a mabiyag.

Mateo 15:4

Halimbawa la, inyutus nu Diyos a ‘Igalang mo tama mo sakay tena mo,’ sakay inyutus na be a ‘Ni ti deya u magupos ti madukás laban nama na sakay tena na ay dapat ipabuno siya.’

Juan 7:7

Awan kam kaiyamutan nu tolay hide ti munduway, pero hikán ay kaiyamutan de, dipo inpeta ko nide a madukás u gimet de.

2 Corinto 12:20

Dipo mággaisipánnák a bakay tu káangay ko hina ay te ketanák a awan ko gusto nikam sakay te ketan kam be a awan moy gusto nikán. Bakay u medemáttan ko ay dimaan, seniyan, iyamután, makasadile, págsidaan, metmetan, pághambug, sakay kaguluwan.