Lukas 8:13 - U Maganda A Baheta Ni Jesu-Cristo

¹³ U nesabug a bine tu bito-bito hide ay u tolay hide a nágsaneg sakay masaya de a tinanggap u upos nu Diyos. Pero awan tatahoden u págtanggap de tu puso de, kaya awan nagnalay u pánnampalataya de. Tu káddemát nu pagsubuk tu biyag de ay pagdaka hide a summina.

Lukas 8:13 Referans Kwoze

Juan 5:35

Ti Juan ay kumán a demlag nu simbuwan a magdemlag tu itod, minasaya kam tu badit la a panahun tu demlag na.

Judas 1:12

Makasanike sakay makasida maski ni makatubang moy la hide a kuman ni magipun-ipun kam a mánnampalataya. Dipo iye hide a tolay ay awan ti págsawa ti kákkan, awan hide mababássog sakay awan dán hide ti iba a páppospusan nan u sadi-sadile dila. U baka-bakán hide a tagapagtoldu ay kumán a diklám a iyáppah la nu pahás, awan hide ti seserbi ta awan magin uden. Kumán be hide a kayo a awan magbunga maski ni sákbunga na dán, nabagut pate u gimot na sakay talaga a natay dán.

2 Pedro 2:22

Ni konna hod ay nebagay la nide u kakagiyan a, “U aso ni magota ay kanán nala be a huway u inyota na. Konna be tu babuy, ni digusán mu ay sumole labe tu lusak.”

2 Pedro 2:20

U tolay hide a nakatukoy dán ni Jesu-Cristo a Panginoon sakay Tagapagligtas ay immadág dán tu magkadukás hide a gimet ti munduwáy. Pero ni sumole hide tu gimet a madukás sakay paalipin hide a huway ti iye, ay mas grabi pa tu date u magin kalagayan de.

Hebreo 10:39

Pero awan kitam kasale tu immadág hide sakay nepahamak, nan tu sumampalataya hide tu Diyos sakay tu nágkaligtas hide.

Efeso 3:17

Tánni mágyan ti Cristo tu puso moy tu pamamag-itan nu pánnampalataya moy nikuna. Idáddasal kube a magin matibay sakay matatag kam tu págmahal moy tu Diyos sakay tu balang essa.

Santiagu 2:26

Patay u bággi a awan ti kaliduwwa; konna labi hod, u pánnampalataya a awan ti gimet ay patay.

1 Timoteo 1:19

sakay nakwa ay lagi a mabegsak u pannampalataya mo sakay malinis u kansensiya mo. Te sangan a tolay a awan sumunud tu konsensiya de kaya u pánnampalataya de ay nasida.

1 Tesalonica 3:5

Kaya ngane, nikuna a awanák dán makatiis ay nangutusák ti umangay hina tánni ilingán ni kumusta dán u pánnampalataya moy tu Panginoon. Mabalisaák bakay ni nalinlang kamon ni Satanas, ay ni mara konna hod i mangyariyay ay mawanan ti serbi u pángngaral me.

Colosas 2:7

Manatile kam nikuna sakay tulos-tulos a lumagu tu pákkakilala moy nikuna. Magpakatibay kam tu pánnampalataya a netoldu nikam, sakay lagi kam a magpasalamat tu Diyos.

Galacia 3:4

Awan dán beman ti halaga nikam u bagay hide a pinagtiisan moy? Tehhod palla wad.

Galacia 3:1

Hikam a taga Galacia hide, awan kam ti tukoy! Deya i nakaalumayaay nikam? Malinaw a nepakapospos ko nikam ni kodya a natay ti Jesu-Cristo tu kudus!

1 Corinto 15:2

Tu pamamag-itan ni iye ay naligtas kam, ni masibát kam a maniwala tu upos a impangaral ko nikam, maliban dálla ni awan talaga tunay u kássampalataya moy.

Juan 15:6

U awan manatile nikán ay konna tu pinget a malanás sakay ibábbut, káttapos ay ipunán a ibut tu apoy para tutudán.

Juan 15:2

Káttulán na u balang pinget a awan magbunga sakay linisan na u balang pinget a magbunga para mas lalu pa iye a magbunga.

Colosas 1:23

Pero kailangan a manatile kam a tapat sakay matatag tu pánnampalataya moy. Dyan moy pabayan a mawan u pag-asa a gábwat tu Maganda a Baheta a nasaneg moy. U Maganda a Baheta a iye ay nepangaral dán tu buo a mundu, sakay hikán ati Pablo ay naging tagapangaral ti iye.

1 Corinto 13:2

Sakay ni tehhodák a kakayanan a mángpahayag tu upos nu Diyos, sakay umintendi tu atanan a lihim, maski ni hed dán nikán u atanan a karunungan sakay mepaagton ko man u buked hide dipo tu grabi't kadakál nu pánnampalataya ko, ni awanák labe ti págmahal ay awanák ti kabuluhan.

Markos 6:20

dipo tukoy na a manteng ti Herodes ni Juan. Kilalanán nu hare a malinis a tolay ti Juan, sakay pilitán na a awan siya mepahamak. Gugustu na a mágsaneg ni Juan maski ni makabalisa nikuna u itáttoldu ni Juan.

1 Juan 2:19

Maski ni date tam hide a kaguman pero awan tam hide kaessa. Dipo ni talaga a kaessa tam hide ay kakaguman tam nakwa hide nadid. Pero summina hide, kanya nángpeta la a awan tam hide talaga a kaessa.

Lukas 8:12

U bine a nesabug tu bihebi nu dilan ay u nágsaneg hide. Pero dimmemát ti Satanas sakay inibutan na tu puso de u upos nu Diyos tánni awan hide maniwala sakay maligtas.

Lukas 8:14

U nesabug tu kasaetan ay u tolay hide a nágsaneg tu upos na pero tu kalayan ay dinaig hide nu kákkabalisa de ti biyag, kákkasoh ti kayamanan sakay págsasaya tu magkadukás hide a bagay. Kanya awan hide lummagu tu pánnampalataya de.