Gimet 2:43 - U Maganda A Baheta Ni Jesu-Cristo

⁴³ Makpal a himala sakay makataka-taka a bagay u ginimet nu Diyos tu pamamag-itan nu apostol hide. Kanya nabiyag hide a tehhod a pággalang sakay ánteng tu Diyos.

Gimet 2:43 Referans Kwoze

Juan 14:12

Kagiyán ko nikam u tatahoden: U deyaman a maniwala nikán ay makagimet be tu gággimitán ko, sakay mas pa ti iye u magimet na dipo angayák dán tu Ama.

Lukas 8:37

Nákkekagbi u taga Geraseno hide ni Jesus a lumakad dán siya tu banuwan de dipo grabi u ánteng de. Nákkekakagbi ni Jesus u lállake a pinalaya na tu mágkadukás hide a ispirito a ikuyog de siya. Pero kinagi nikuna ni Jesus, “Sole ka dán tu bilay moy sakay ibaheta mo u dakál a bagay a ginimet niko nu Diyos.” Di Jesus sakay tu disepulus na hide, ay simmakay tu abeng sakay limmakad dan hide. Nagsole ngane u lállake sakay imbábbaheta na tu buo banuwan u ginimet nikuna ni Jesus.

Lukas 7:16

Neántingan hide a atanan sakay nagpure hide tu Diyos. Kinagi de, “Dummemát dán nikitam u dakila a prupeta. Immangay he u Diyos para tulungan na kitam a tolay na hide.”

Markos 16:17

U sumampalataya hide ay atádden ti kapangyariyan a maggimet ti makataka-taka a bagay: tu ngahan ko ay magpalayas hide ti mágkadukás a ispirito sakay makapagupos hide ti iba-iba a upos.

Gimet 9:40

Pinaluwas ni Pedro u atanan a katolayan sakay limmuhud a nagdasal. Káttapos ay ummatubang siya tu bangkay sakay kinagi na, “Tabita, umikat ka dán!” Bimmulag ti Tabita sakay pákketa na ni Pedro ay immetnod siya.

Gimet 4:33

Tu begsák nu kapangyariyan nu Diyos ay tulos-tulos la a magpatunay u apostol hide tungkul tu kákkabiyag a huway nu Panginoon Jesus. Kanya pinagpala nu Diyos u atanan a mánnampalataya.

Gimet 9:34

Kinagi nikuna ni Pedro, “Eneas, pinagpiyya ka dán ni Jesu-Cristo. Tumaknág ka sakay isáddi mo i abák muwe!” Pagdaka a immikat ti Eneas.

Gimet 2:22

“Hikam a taga-Israel hide ay mágsaneg kam nikán! Ti Jesus a taga-Nazaret ay pinaangay nu Diyos nikam, sakay pinatunayan iye nu Diyos tu pamamag-itan nu himala hide sakay tu makataka-taka hide a ginimet na tu pamamag-itan ni Jesus. Mismo hikam u nakatukoy ti pangyayariyan iye dipo nangyare iye he nikam.

Gimet 5:5

Nikuna masaneg iye ni Ananias ay patay siya a natumba. Sakay atanan nu nakasaneg tu nangyare ay neántingan hide a tahod.