1 Timoteo 1:5 - U Maganda A Baheta Ni Jesu-Cristo

⁵ U layunin ni bilinan iye ay magkahod kitam ti págmahal a gábwat tu malinis a puso, malinis a isip, sakay ti matapat a pánnampalataya.

1 Timoteo 1:5 Referans Kwoze

1 Timoteo 1:19

sakay nakwa ay lagi a mabegsak u pannampalataya mo sakay malinis u kansensiya mo. Te sangan a tolay a awan sumunud tu konsensiya de kaya u pánnampalataya de ay nasida.

Galacia 5:22

Pero u tolay a mabiyag ayun tu pággiyya nu Banal a Ispirito ay mapagmahal, tehhod a kasayaan, tehhod a kapayapaan, magtággád ti hirap, mabait, maggimet ti maganda a bagay tu agum hide a tolay sakay tehhod a katapatan

2 Timoteo 2:22

Kaya iwasan mo u mágkadukás hide a hilig nu kabataan. Sikapán mo a gimitán u tama, magin matapat sakay mapagmahal. Sakay mabiyag ka ti mapayapa a kaguman nu tolay hide a mágdasal tu Diyos ate malinis a puso.

2 Timoteo 1:5

Awan ko malimunan u tapat mo a pánnampalataya a konna tu pánnampalataya nu apo mo a bakás a ti Loida sakay nena mo a ti Eunice. Sakay hanggan nadid, ay siguraduwák a konna palla hod u pánnámpalataya mo.

2 Timoteo 1:3

Magpasalamaták tu Diyos a pagserbiyan ko ti tapat, konna tu ginimet nu nuno ko hide. Awan taka kalimunan a ipagdasal aldew ay ti gibi.

1 Pedro 3:21

I dinuman itod a lonso ay sa itod u mage letrato nu págbautismo a mángligtas nikam. Tu pamamag-itan nu kákkabiyag a huway ni Jesu-Cristo. U págbawtismo a iye ay bakán a para linisán u dangát nu bággi tam nan iye ay tanda a nagsise kitamon tu kasalanan tam hide. Dipo ti iye ay maare kitamon a iligtas nu Diyos dipo ti Cristo ay huway a nabiyag.

1 Pedro 3:16

Pero magin magalang kam sakay magin mahinahun ni magpaliwanag kam. Dipo bilang tagapagserbi ni Cristo ay diyan tam pabayan a makagimet kitam ti liwat, tán u tolay hide a mangdáddusta nikitam ay mapasanike tu kákkagiyán de a kontara nikitam.

1 Pedro 1:22

Nadid ay malinis kamon tu kasalanan moy hide dipo tu kássunud moy tu tatahoden sakay nagin tapat kamon tu págmahal moy tu kákkapatkákka moy hide. Nakwa ay tatahoden u págmahal moy.

2 Pedro 1:7

u pagkamaka-Diyos ay dagdagen moy ti págmalasakit tu kákkapatkákka hide ni Cristo; sakay tu págmalasakit ay dagdagen moy ti págmahal.

Roma 10:4

Dipo awan de tukoy a ti Cristo u katupaden nu Kautusan. Dipo tu ginimet na, u atanan a manampalataya nikuna ay imbilang nu Diyos a awan ti kasalanan.

Tito 1:15

Malinis u atanan a bagay tu tehhod a malinis a isip, pero tu mágkadukás sakay tu awan mánnampalataya ay awan ti bagay a malinis dipo madangát u konsensiya sakay u pággisipan de hide.

1 Timoteo 3:9

Kailangan a matapat hide tu pánnampalataya a impakapos-pos nikitam nu Diyos sakay tehhod a malinis a isip.

2 Corinto 1:12

Essa a bagay u mepagmadakál me: nabiyag kame ti matuwid sakay tapat tu atubang nu atanan a tolay, lalu dán nikam. Nagimet mi iye dipo tu kagbi nu Diyos bakán a tu pamamag-itan nu karunungan nu mundu. Sakay mapatunayan nu isip me a tatahoden u ipagmadakál me.

1 Pedro 4:8

U mahalaga tu atanan ay magmahalan kam ti tapat, dipo u págmahal ay makapagpatawad maski sakodya a kakpal u kasalanan.

Santiagu 4:8

Umadene kam tu Diyos tánni umadene siya nikam. Kanya hikam a makasalanan hide, iyemang moy dán u pággagimet ti madukás, sakay u pabagu-bagu hide ti isip, diyan kamon magduwwa-duwwa ti isip a sumunud tu Diyos.

Gimet 23:1

Nadid, lináttángngan ni Pablo u pinuno hide, sakay kinagi na, “Kákkapatkákka ko hide, tukoy nu Diyos a natupad ko u atanan a gusto na a gimitán ko a maganda u kaluuban ko hanggan nadid a aldew.”

1 Juan 3:3

Kanya ni ti deyaman u te konna he a pag-asa ay dapat a mabiyag a tehhod a kalinisan, konna ni Cristo.

Hebreo 10:22

kanya umadene kitam tu Diyos a tehhod a katapatan sakay matibay a pánnampalataya nikuna, dipo nalinis dán nu dige ni Cristo u isip tam a kumán a na ugisan dán u bággi tam tu malinis a dinom.

1 Corinto 13:1

Nadid, ni makapagupusák man tu iba-iba a upos sakay tu upos nu anghel hide, ni awanák ti págmahal ay kumánnák la a bating-tingan oni pompiyang a makán tánnugán.

Roma 14:15

Ni masakitan u kapatkákka mo dipo tu kákkanán mo, awan dán ayun tu págmahal u gággimitán mo. Dyan mo ipahamak u kapatkákka mo ni Cristo dipo la tu pagkain, dipo natay ti Cristo para be nikuna.

Roma 9:1

Nadid, hikán a mánnampalataya ni Cristo ay te kagiyánák nikam. Tatahoden u kagiyán ko awanák magbule-bule, sakay u Banal a Ispirito u mangpatunay a malinis u konsensiya ko a tatahoden u kagiyán ko.

Gimet 24:16

Kanya gimitán ko u atanan nu makaya ko tán awanák magkasala tu atubang nu Diyos sakay tu tolay hide.

Gimet 15:9

Eessa u pangileng nu Diyos nikitam sakay hide; pinatawad na hide tu kasalanan de dipo tu pánnampalataya de.

Mateo 12:35

U mabait a tolay ay magupos ti maganda dipo maganda u he tu isip na. Sakay u makasalanan a tolay ay magupos ti madukás dipo madukás u he tu isip na.

Mateo 5:8

Pinagpala nu Diyos u tolay hide a awan dán ti agum a pagserbiyán nan u Diyos la, dipo hide u maketa nikuna.

1 Juan 3:23

Sa iye u utus na: Maniwala kitam tu Anak na a ti Jesu-Cristo sakay magmahalan kitam konna tu inyutus nikitam ni Cristo.

Hebreo 13:18

Ipagdasal moy kame, makagi me nikam a malinis u konsensiya me, sakay gusto me a mabiyag ti matuwid tu atanan nu panahun.

Hebreo 9:14

Pero mas dakál u magimet nu dige ni Cristo! Tu pamamag-itan nu awan ti katapusan a Ispirito ay inyalay na tu Diyos u sadile na bilang alay a awan ti kapintasan. U digi na u manglinis tu puso ay tu isip tam tán adággen tamon u gimet hide a awan ti kabuluhan sakay pagserbiyan tam u Diyos a biyag.

Galacia 5:6

Tu nákpagkaessa dán ni Jesu-Cristo ay awan dán mahalaga ni awan nature oni nature u essa a tolay. U mahalaga ay u pánnampalataya ni Cristo a ketan tu gimet dipo tu págmahal.

Roma 12:9

Magmahalan kam a tehhod a katapatan. Kaiyamutan moy u madukás sakay palagi kam a maggimet ti maganda.

1 Timoteo 1:18

Anak ko a Timoteo, iyintrega ko niko i bagayan iye ayun tu nehula dán tungkul niko. Tánni tu pangtupad mo ti hidenye ay magkahod ka ti tapang a umatubang tu kumontara hide tu tama a toldu,

1 Juan 3:10

Hed tam he a matukuyan ni deya u anak nu Diyos sakay ni deya u anak ni Satanas: Ni deya man u awan maggimet ti maganda sakay awan magmahal tu kapatkákka na ay bakán a anak nu Diyos.