Zacarias 14:20 - Maung A Balita Biblia

²⁰ Diad satan a panaon nitatak ed anggan batingting ya arkos na kabayo ira yan salita, “Nisaklang ed Katawan.” Magmaliw a masanto iray bangan lotowan a singa saray yaung ed arap na altar.

Maung a Balita Biblia

²⁰ Diad satan a panaon nitatak ed anggan batingting ya arkos na kabayo ira yan salita, Nisaklang ed Katawan. Magmaliw a masanto iray bangan lotowan a singa saray yaung ed arap na altar.

Zacarias 14:20 Referans Kwoze

Exodo 39:30

Nanggawa ra na arkos a puron balituk a sikatoy masanton tanda na inkisaklang, tan tinatakan da na “Nisaklang ed Katawan.”

1 Pedro 2:5

Singger kayon singa mabilay iran bato, tan paikana kayo ed panggaway maispiritun timplo. Magmaliw kayon masanto a papari ed sayan timplo tan mangyapay kayoy maispiritu tan makapaliket iran bagat ed Dios diad panamegley nen Jesu-Cristo.

Isaias 23:18

Say kuartan natubo to ed nigosio et niyapay ed Katawan. Ag to isinup yan kuarta, no ag ingen ikana na saray manangigalang ed Katawan diad pansaliw da na tagano tan saray kawes a nakaukolan da.

Levitico 8:9

Insan to impatoon ed olo to so turban, tan diad arap na sayan turban impeket toy balituk ya arkos, say masanton tanda na inkisaklang, onung na ingganggan na Katawan ed kinen Moises.

Zacarias 9:15

Say Katawan a Makapanyarin-amin et iyagel to ray totoo to, tan deralen da ray kalaban da. Diad bakal oneyag iran singa abuek a totoo, tan paterteren day dala ray kalaban da; onagos so dala a singa say dala na bagat a walad yaung ya inibung ed altar.

Saray Bilang 4:14

Itapew dad saya iray amin a kagawaan ya ikakana ed altar: saray palangganan pananginay ngalab, saray tinidor, saray karyo, tan saray talyasi. Insan da sakbungan na pinon katat tan isolung da ray tiken a panagsakbatan.

Saray Bilang 4:7

Apisan da na asul ya abel so lamisaan a panangisaklangan na tinapay ed Katawan, insan da itapew diman iray plato, saray yaung a pananginay insinso, saray yaung a pananginay bagat, tan saray ankelag a pasig a pananginay bagat ya alak. Nepeg a walay tinapay lawas ed lamisaan.

Levitico 6:28

Dinan man a bangan panlambungan ed karni na samay ayep nepeg a betagen, tan no gansan kaldiro so ikana, nepeg a gisigisen insan orasan na danum.

Exodo 37:16

Nanggawa na saray puron balituk a kagawaan na samay lamisaan; saray plato, saray kupa, saray ankelag a pasig, tan saray yaung ya ikanad bagat ya alak.

Puyan 20:6

Maliket tan abindisionan iray akapinabang ed sayan onaan ya inkiolid bilay. Anggapoy pakayarid sikara na kumadwan patey. Magmaliw iran papari na Dios tan Cristo, tan manoley iran kaiba to ed loob na sanliboy taon.

Puyan 5:10

Ginawam iran sakey a panarian tan impagmaliw mo ran papari a manlingkur ed Dios tayo; tan manari rad tapew na dalin.”

Puyan 1:6

Ginawa to tayo met a sakey a panarian tan impagmaliw to tayon papari a manlingkur ed Dios tan Ama to. Say galang tan pakayari so wala ya anggad angga ed Jesu-Cristo! Amen.

1 Pedro 4:11

Sarag moy mampulong? Ipulong moy salitay Dios. Sarag moy manlingkur? Ikanam ed panaglingkur so biskeg ya inter na Dios ed sika; diad ontan, napagalangay Dios ed amin a bengatla, diad panamegley nen Jesu-Cristo. Kayaryan na Dios so galang tan pakayari ed ando lan ando! Amen.

1 Pedro 2:9

Balet sikayoy apilin totoo, papari na Ari, sakey a bansan masanto, tan totoo na Dios. Say Dios pinili to kayon mangipulong na makapakelaw iran gawgawa to. Sikato met so anawag ed sikayod kabilongetan tan angyakar ed sikayod makapakelaw a liwawa to.

COLOSAS 3:17

Antokaman sirin a gawaen o salitaen yo, gawa yo ran amin diad ngaran na Katawan a Jesus, tan diad panamegley to, misalamat kayod Dios Ama.

Saray Gawgawa 15:9

Namparay pangipapasen na Dios ed sikara tan sikatayo. Nilinisan to ray puso ra lapud anisia ra.

Saray Gawgawa 11:9

Nadngel ko lamet ya inkuan na bosis a nanlapud tawen, ‘Ag mo ipapasen a marotak so nilinisay Dios.’

Saray Gawgawa 10:28

Inkuanto, “Kabat yo a sebel ed sakey a Judio so mikaaro odino ombisitad aliwan Judio. Balet impaamtay Dios ed siak ya ag ko ipasen a marotak o ag manepeg a piolupan so anggan siopa.

Saray Gawgawa 10:15

Inkuan lamet na bosis, “Ag mo ipapasen a marotak so nilinisay Dios.”

Lucas 11:41

Iter yod saray mairap-bilay so walad saray tasa tan plato yo, et nalinisan onung ed ganggan para sikayo ray amin a bengatla.

Malakias 1:11

Igagalang ak na amin a totoo ed amin a sukong na mundo. Inerman a pasen saray totoo mamopool ira na insinso a para siak tan mangisasaklang ira na makapaliket a bagat. Igagalang da ak ya amin!

Sofonias 2:11

Taktakoten ira na Katawan. Pagmaliwen ton andi-kakanaan iray diriyos ed tapew na dalin, et balang bansa galangen toy Katawan diad dilin dalin to.

Obadias 1:17

“Balet wala ray pigaran makabatik ed Palandey na Sion, tan sikatoy magmaliw a masanton pasen. Saray totoon kabyangay boleg nen Jacob et kayaryanen da lamet so dilin dalin da.

Saray Salmo 110:3

Maabuloy iray totoom a milaban no agew a mibakal kad saray kalaban mo. Singa linaew ed kabkabwasan saray balolakim onla rad sika diad saray masanton pokdul.

1 Samuel 2:14

itorok toy tinidor ed lambungan, tan no antoy nala to sikatoy kayaryay pari. Amin ya Israelitan onlad Silo a mangibagat et onyay nagawad sikara.

Exodo 25:29

Manggawa ka na saray plato, saray kupa, saray ankelag a pasig, tan saray yaung ya ikanad saray bagat ya alak. Amin da ra ya et balituk.

Isaias 52:1

Jerusalem, mampabiskeg ka tan mampatalonggaring ka lamet! Masanton siudad na Dios, kawesan moy sikan dili na kagalangan! Ag lan balut looban na saray pagano iray puirtam.

Jeremias 31:40

Say intiron patar na pomponan ed saray bangkay tan bantakan na dotak, tan amin a kaalogan ed pandel na Kolus na Cedron ya anggad Puirta na Kabayo et magmaliw iran masanton pasen ed siak. Ag lan balut nigeba odino naderal yan siudad.”

Ezekiel 45:1

No apag-apagen so dalin tan iter ed balang tribu so betang to, say sakey a parti et nepeg ya isaklang ed Katawan. Nepeg a labinduan kilomitro so karokey to, tan samploran kilomitro so kaawang to. Magmaliw a masanto yan intiron pasen.

Zacarias 14:19

Sikato ya so dusan niiter ed Egipto tan diad amin a bansa ya ag da silibraan so Pista na Abung-abung.

1 Saray Arari 7:50

saray kupa, saray panagpotut na pabilo, saray yaung, saray plato a pananginay insinso, tan saray kawalin pananginay ngalab; tan saray bisagra na saray kaput na Sankasantosan a Pasen tan bisagra na saray kaput na saray puirtay Timplo. Balituk ya amin ira yan kagawaan.

Zacarias 8:3

Ompawil ak ed Jerusalem a masanton siudad ko, tan manayam ak diman. Natawag iman a pasen a matoor a siudad tan say palandey na Katawan a Makapanyarin-amin et natawag na masanton palandey.