Saray Tagleey 1:17 - Maung A Balita Biblia

¹⁷ “Inyonat ko ray limak, balet anggapoy ontulong ed siak. Anawag ed kaliber-liber so Katawan na saray onlaban ed siak. Marotak a bengatla so pangipapasen dad siak.

Maung a Balita Biblia

¹⁷ Inyonat ko ray limak, balet anggapoy ontulong ed siak. Anawag ed kaliber-liber so Katawan na saray onlaban ed siak. Marotak a bengatla so pangipapasen dad siak.

Saray Tagleey 1:17 Referans Kwoze

Jeremias 4:31

Akadngel ak na akis na singa biin mampapasakit lan mananak, eyag na sakey a biin mangibubuknak na pangulowan ton anak. Akis na Jerusalem ya abot-aboten toy linawa to, iyoonat toy lima to tan kuanto, “Pangaskasiyan ak! Onsasabi la ran mamatey ed siak!”

Isaias 1:15

“Onlingaw ak ed biek no itagey yo ray lima yo a mampikasi. Ag ta kayo dengelen anggan mansosoldungay pikakasi yo, lapud dala ya amin so lima yo.

Saray Tagleey 1:9

Sankanengneng so inkarotakan to, balet anggapoy walad sikato so agawad sikato. Makapasinagem so inkaplag to; anggapoy manligliwad sikato. Analo ray kalaban to, tan kekerewen to a kasian na Katawan.

Saray Tagleey 1:19

“Tinmawag ak ed saray kagampik, balet ag da ak tinulongan. Inaatey ed dalan iray papari tan saray pangulo, Legan a manaanap ira na naakan, pian ombiskeg ira.

Saray Tagleey 1:16

“Sikato yay makasengeg no akin et managagos ed matak so lua. Anggapoy nayarin manligliwad siak; anggapoy makaiter ed siak na biskeg na linawa. Tinalo ak na saray kalaban; saray totook anggapoy nakdaan a kayaryan da.

2 Saray Arari 25:1

Linmaban si Sedekias ed Ari Nabucodonosor na Babilonia. Kanyan diad kumaplon agew na kumaplon bulan na kumasyam a taon na panooley nen Sedekias, linmad Jerusalem si Nabucodonosor tan amin da ray sondalo to, ta dogpaan da. Nankampo rad paway na siudad, pinaliberan da na panagguardiaan,

Oseas 8:8

Nagmaliw a singa arum a bansa so Israel tan anggapoy kana ton singa nabtag a banga.

Ezekiel 36:17

Inkuanto, “Sika a toon ompatey, nen manaayam ed dalin da iray Israelita, dinotakan da may dalin da lapud maoges a kabibilay tan kagagawa ra. Impasen kon samay kagagawa ra et marotak onung ed ganggan a singa biin naliliberan.

Saray Tagleey 4:15

“Arawi kayo!” eyag da ray totoo. “Marotak kayo! Ag yo kami didiwiten!” Kanyan nanakar-akar irad saray bansa, ta anggapoy malabay a mamatuloy ed sikara.

Saray Tagleey 1:21

“Dengel mo pay panayay ko; anggapoy manligliwad siak. Panliketan na saray kalaban ko so impangiter moy gunigon ed siak. Ipasabim pa la may agew ya insipan mo; panirap mo pa ray kalaban ko a singa paniirap ko.

Saray Tagleey 1:2

Mannangnangis lawas; managagos ed aping toy lua. Diad amin da ray angaaro ed sikato nen saman, anggapoy manligliwa ed sikato ya anggan sakey ed sikara. Nantraidoran na saray kagampi to tan kalaban to ran amin natan.

Jeremias 34:22

Iganggan ko ra, et ompawil irad sayan siudad. Dogpaan da, dakepen da, insan da poolan. Saray baley na Juda et pagmaliwen ko ran singa kalawakan ya anggapoy manaayam. Siak, say Katawan, so nansalita.”

Jeremias 16:6

Ompatey ed sayan dalin iray mamayaman tan saray mairap-bilay, balet anggapoy manermen odino mangipompon ed sikara. Anggapoy manggerger na laman odino mangiskis na olo to a pangipanengneng toy paneermen to.

Jeremias 6:3

mankampod man iray arari tan saray sondalo ra. Ipaalagey da ray tulda ra ed kaliber-liber to, et balang sakey ed satan mankampo ed inerman a pasen a labay to.

1 Saray Arari 8:38

dengel mo pa ray pikakasi ra. No siopaman ed saray totoom ya Israelita, odino amin da, et iyonat day kalimaan da ed sayan Timplo diad pampikasi ra lapud impapuson ermen da,

1 Saray Arari 8:22

Kayari to ya, dia nid arap na saray totoo, nanalagey si Solomon ed arap na altar. Intagey to ray lima to

Jeremias 8:18

Ag napaabig so kaermenan ko; walay sakit ko diad pusok.

Jeremias 12:9

Saray pinilik a totoo et singa ra sakey a manok a niliktub tan sinibar na saray baga. Padago yo ray ayayep ed katakelan, ta pampera yo ran mangan!

Saray Tagleey 1:8

Mapalalon kaogsan so ginawa na Jerusalem, kanyan sikatoy adotakan. Balbalawen la natan na saray mangidadayew ed sikato, lapud anengneng dan alakseban. Manayay tan isasanib toy lupa to lapud kababaingan.

Ecclesiastes 4:1

Insan ak ninmengneng lamet ed amin a panaglames a nagagawad sayan mundo. Manakakis iray napapairap, tan anggapod sikaray tinmulong. Anggapod sikaray tinmulong, lapud walad diking da so pakayari da ray mamapairap ed sikara.

Isaias 54:11

Say Katawan kuanto, “O Jerusalem, sika a maniirap tan kaskasian a siudad, tan anggapoy manligliwad sika, saray mabmablin bato so ikanak ed pamaalagey ko lamet na saray pundasion mo.

Jeremias 15:5

Say Katawan kuanto, “Siopay mangasid sikayo, totood Jerusalem, tan siopay manermen ed sikayo? Siopay mambayag ya onsamar a manepet no antoy kipapasen yo?