Saray Taga Roma 12:9 - Maung A Balita Biblia

⁹ Nepeg ya anggapoy pankonkonwari so panangaro yo. Bosul yoy kaogsan, pabli yoy kamaungan.

Maung a Balita Biblia

⁹ Nepeg ya anggapoy pankonkonwari so panangaro yo. Bosul yoy kaogsan, pabli yoy kamaungan.

Saray Taga Roma 12:9 Referans Kwoze

Saray Salmo 34:14

Arawian yoy kaogsan tan manggawa kayoy kamaungan; pampilalekan yod intiron puso so kareenan.

1 Pedro 4:8

Manonad amin, manaarowan kayon maung, ta sakuban na aro so dakerakel a kasalanan.

1 Timoteo 1:5

Say getma na sayan ganggan mi et say pamawala na panangaron manlapud puson malinis, malinew a konsinsia, tan tuan pananisia.

1 Pedro 1:22

Natan ta alinisan yo lay sikayon dili lapud itotoluk yod katwaan, tan diad ontan et wala lad sikayoy puron panangaro ed saray agagi yod pananisia, papetang tan manlapud otel na puso yoy panaarowan yo.

1 TESALONICA 5:21

Subok yoy amin a bengatla tan pili yo ray maung.

Saray Salmo 101:3

tan ag kon balut abuloyay kaogsan. Kabosul koy gagawaen da ray totoon onaarawid Dios; anggapoy pibabalik ed sikara.

Saray Salmo 97:10

Inaro na Katawan iray mamobosul na kaogsan; iyaagel toy bilay na saray totoo to, ilalaban to rad pakayari da ray totoon maoges.

Amos 5:15

Bosul yoy kaogsan, aro yoy kamaungan, et nanengneng yod satan ed saray korti ya ontalona so katonungan. Angangko kasian na Katawan iray totoon atilak nin mabilay ed sayan bansa.

Saray Hebreo 12:14

Gawa yoy anggaay nayarian yo a mikaarod amin a too tan mampasanto kayo, ta no ag ya gawaen na siopaman, ag to nanengneng so Katawan.

2 CORINTO 8:8

Ag ko igaganggan yad sikayo; balet labay kon nipatnag, diad panamegley na pangipanengneng koy pananulong na saray arum, so katooran met na panangaro yo.

1 TESALONICA 5:15

Ag kayo ombabawid saray nanggaway maoges ed sikayo, no ag ingen manggawa kayo lawas na pankaabigay sakey tan sakey ed sikayo tan amin a katoowan.

2 CORINTO 6:6

Impaamta min kumikimey kamiy Dios diad panamegley na malinis a panagbilay, diad kakabatan, anos, tan panangasi; ontan met diad panamegley na Ispiritu Santo, matwan panangaro,

Saray Hebreo 1:9

Inarom so kaptekan, balet kabosul moy kaogsan; kanyan say Dios a Dios mo pinili to ka, tan initdan to kay liket na kagalangan, a lalon baleg nen say inter tod saray kakaibam.”

Saray Salmo 119:104

Nanaarumay kakabatan ko lapud saray ganggan mo, kanyan kabosul koy amin a maoges a kagagawa.

Ezekiel 33:31

Kanyan saray totook mantitipon iran ondengel na ibagam, balet ag da susumpalen so ibagam a gawaen da. Walad bibil da ray salitan napnoy aro, balet itutuloy day panagagom da.

Probirbio 8:13

Say pangigalang ed Katawan kabaliksan toy iyarawid kaogsan; kabosul koy panagpaatagey tan panaglastug, say maoges a kagagawa tan saray salitan tila.

Saray Salmo 119:163

Kabosul tan kagulak so antokaman a tila, balet inarok so ganggan mo.

Probirbio 26:25

Nayarin marakep so panagsalita to, balet ag mo sisigsiaen, ta ontan lay bosul a popokoken tod puso to.

Saray Salmo 55:21

Marlas a singa mantikilya so panagsalita to, balet napnoy panagbosul so puso to; singa larak a panagpoyuk iray salita to, balet matdem iran singa ispada.

Saray Salmo 36:4

Mangiplaplanoy maoges no mandokdokul; anggapoy maung a gagawaen to; ag ton balut ipopolisay so kaogsan.

1 TESALONICA 2:3

Ta say pantatanggoyur mi et ag niletneg ed lingo, o maoges a getma, odino pilalek miy mangibalang.

Saray Gawgawa 11:23

Nen sinmabid man tan anengneng toy pamibindision na Dios ed sikara makaliliket, tan binilin to ran amin a mansiansia ran matoor tan matwa ed Katawan diad intiron puso ra.

Juan 12:6

Inkuanto ya, aliwan lapud panangasi tod saray mairap-bilay, no ag ingen lapud sikato et matakew. Sikatoy managegnay kuarta et angaala na natitipon.

Saray Salmo 45:7

papablien moy inkatonung tan bobosulen moy kaogsan. Kanyan say Dios, a Dios mo, pinili to ka tan initdan to kay liket a baleg nen say inter tod saray arum ya arari.

Mateo 26:49

Kasabi nen Judas, dinago ton tampol si Jesus tan inkuanto, “Say kareenay walad sika komun, Maistro,” insan to inanguban.

Santiago 3:17

Balet say kakabatan a nanlapud Dios et ononaona, malinis. Maaro met ed kareenan, maoyamo, makaaro, mapangasi, makolid panaggaway kaabigan, anggapoy labien to, tan aliwan mansimpisimpitan.