Saray Salmo 40:6 - Maung A Balita Biblia

⁶ Ag mo labay iray bagat tan saray saklang; ag mo kekerewen iray bagat a popoolan o saray bagat a para kasalanan. Initdan mo ak ingen na layag a pandengel kod sika,

Maung a Balita Biblia

⁶ Ag mo labay iray bagat tan saray saklang; ag mo kekerewen iray bagat a popoolan o saray bagat a para kasalanan. Initdan mo ak ingen na layag a pandengel kod sika,

Saray Salmo 40:6 Referans Kwoze

Isaias 1:11

Kuanto, “Say abaloan yo labay ko ray bagat ya itutuloy yon isasaklang ed siak. Andi! Sinmawa ak la ed saray popoolan yon bagat tan saray taba na saray sankaabigan ya ayayep yo. Ag ko la labay so dala da ray bakan kalakyan, saray karniro tan saray kanding.

1 Samuel 15:22

Inkuanen Samuel, “Antoy lalon labay na Katawan: say pangonur, odino saray saklang tan saray bagat? Maung niy ononur ed sikato nen say mangibagat ed sikato na saray sankaabigan a karniro.

Saray Salmo 51:16

Ag mo labay iray bagat, ta no labay mo ra komun, isaklang ko la rad sika; ag mo pakaliliketay bagat iran popoolan.

Oseas 6:6

Say ag mangoman a panangaro yo so labay ko, aliwan saray ibagat yon ayayep. Labay ko nin naamtaan ak na saray totook nen say mangisaklang irad siak na bagat a popoolan.

Mateo 12:7

Ag yo komun imbaga a mankakasalanan iray anggapoy kasalanan no amta yo labat so kabaliksan na ibabagay Masanton Sulat, ‘Panangasi so labay ko, aliwan say bagat.’

Amos 5:22

No mangyakar kayod siak na saray bagat a popoolan tan saray bagat a trigo ag ko ra awaten. Ag ko awaten iray pinataba yon ayayep ya iyakar yon bagat ed siak.

Mateo 9:13

Laki la tan aral yoy kabaliksan na sayan ibabagay Masanton sulat: ‘Say panangasi so labay ko, aliwan say pangibagat na ayayep.’ Ag ak dia linman manawag ed saray matonung, no ag ingen linma ak dian manawag ed saray makasalanan.”

Isaias 66:3

“Saray totoo gagawaen day labay dan dili. Anggapoy pandomaan ed sikara so pamatey na baka ya ibagat tan say pamatey na too ya ibagat; say pangibagat na kordiro tan say pamekpek na aso ed tenger; say pangisaklang da na bagat a trigo tan say pangibagat day dala na baboy; say pangibagat da na insinso tan say pampikasi rad talintaoy diriyos. Maliket irad makapaingungot a klasiy panangigalang ed Dios.

Say Libro nen Job 33:16

Say Dios ipaparengel tod saray totoo iray sasalitaen to, tan patatakoten to ra lapud saray pasakbay to.

Saray Salmo 50:8

Ag ta kayo pamapasnukan lapud saray bagat yo tan saray bagat a popoolan a lawas yon iyaakar ed siak.

Exodo 21:6

say amo tod satan awiten tod pasen a panangigalangan. Diman say amo pasaralen to may aripen ed puirta odino diad lusek na puirta, insan to tebengan ed layag. Diad ontan magmaliw lan aripen to ya anggad ag to ipatey.

Say Libro nen Job 5:9

Ag natalusan iray gagawaen ton makapakelaw a bengatla, tan andi-tonda iray gagawaen ton milagro.

Saray Salmo 71:15

Ibawag koy inkatonung mo; tongtongen ko lawas so panangilaban mo, anggaman ya ag ko natalusan a sigput.

Saray Salmo 139:17

O Dios, mairirap kon talusan iray kanunotan mo; amayamay iran tuloy!

Saray Salmo 139:18

No bilangen ko ra, dakel ni ra nen say buer. No ombangon ak, wala ak nid abay mo.

Isaias 25:1

Katawan, sika so Dios ko; Igalang ta ka tan idayew koy ngaran mo. Makapakelaw iray ginagawam a bengatla; matoor mon sinumpal iray plano ya abayag lan ninunot mo.