Saray Hebreo 10:11 - Maung A Balita Biblia

¹¹ Inagew-agew a manalagey tan manlingkur so balang pari da ray Judio, tan mamimpigan mangisaklang na nampaparan bagat. Balet ag makapaandiy kasalanan ira yan bagat.

Maung a Balita Biblia

¹¹ Inagew-agew a manalagey tan manlingkur so balang pari da ray Judio, tan mamimpigan mangisaklang na nampaparan bagat. Balet ag makapaandiy kasalanan ira yan bagat.

Saray Hebreo 10:11 Referans Kwoze

Saray Hebreo 10:4

Ta ag balut makapaandi na saray kasalanan so dala na saray bakan kalakyan tan saray kanding.

Saray Hebreo 5:1

Balang Pangulon Pari et apilid saray totoo tan niganan mangilaman ed sikara diad panlingkur ed Dios. Mangyapay na saray saklang tan saray bagat lapud saray kasalanan.

Saray Bilang 28:3

Saraya so bagat a popoolan ya iyapay yod Katawan: para bagat ya inagew-agew, duaran sakey taon a kordiron kalakyan ya anggapoy deral na laman da.

Saray Hebreo 7:27

Si Jesus aliwan singa saray arum a pangulon papari a nakaukolan day mangibagat ya inagew-agew, onona para saray kasalanan da, insan para saray kasalanay katoowan. Amimpinsan ya angibagat si Jesus, tan angga lad angga ya, nen imbagat toy sikaton dili.

Isaias 1:11

Kuanto, “Say abaloan yo labay ko ray bagat ya itutuloy yon isasaklang ed siak. Andi! Sinmawa ak la ed saray popoolan yon bagat tan saray taba na saray sankaabigan ya ayayep yo. Ag ko la labay so dala da ray bakan kalakyan, saray karniro tan saray kanding.

Saray Hebreo 10:1

Say Ganggan anino labat tan aliwan nagnap a pakanengnengan na saray maung nin bengatla ya onsabi. Ag ton balut nayarian a gawaen a nagnap iray onsingger ed Dios diad panamegley na saray bagat ya isaklang a tinaon-taon.

Daniel 12:11

“Manlapud samay panaon ya apatonda so inagew-agew a panagbagat, salantiy manlapud samay panaon na Makapataktakot a Managderal, sanlibo, duan lasus tan siamaplon agew so onlabas.

Daniel 11:31

Pagmaliwen na arum a sondalo to a marotak, onung ed ganggan, so Timplo. Patondaen day inagew-agew a bagat tan ilira da so Makapataktakot a Managderal.

Daniel 9:27

Pitoy taon a saman a manoley et nawalaan na malet a sipanan ed amayamay a totoo, tan kalabas na kapalduad sayan panaon, patondaen toy pangisaklang na saray bagat. Nipasen ed sankatageyan a parti na Timplo so Makapataktakot a Managderal tan mansiansiad man ya anggad onsabi so inggetar na Dios a pangangga na samay angipasen diman.”

Daniel 9:21

Legan kon mampipikasi, maples a tinmikyab ed kawalaan ko si Gabriel ya anengneng kod samay inmonan pasingayew ed siak. Oras lad saya na panangisaklang na bagat ed labi.

Daniel 8:11

Nilabanan to so anggan say Prinsipi da ray mangatatawen a sondalo, pinatonda toy inagew-agew a panagbagat ed sikato, tan dinederal toy Timplo.

Ezekiel 45:4

Magmaliw a masanto yan parti na bansa, nibiig a para saray paparin manlilingkur ed Katawan diad Timplo to. Dia nipaalagey iray abung da tan walay parti a para Timplo.

Saray Bilang 29:6

Isaklang yo ra ya a kaaruman na bagat a popoolan para ononan agew na bulan a katekep toy bagat a trigo tan say inagew-agew a bagat a popoolan a katekep toy bagat a trigo tan say bagat ya alak. Sarayan bagat a popoolan et makapaliket ed Katawan so balingit da.

Saray Bilang 28:24

Onya met so pangisaklang yon pitoy agew ed Katawan na sakey a bagat a popoolan a makapaliket ed Katawan so balingit to. Iyapay yo ya a kaaruman na inagew-agew a bagat a popoolan tan say bagat ya alak.

Exodo 29:36

Inagew-agew a nepeg mon ibagat so sakey a karniron kalakyan, pian napaandi so kasalanan; saya et linisan to so altar. Insan mo lanaan na larak na oliba, pian napasanto.

Mikias 6:6

Antoy awiten kod Katawan a Dios na tawen, no onla ak a mangigalang ed sikato? Mangawit ak na saray sankaabigan a kilaw na baka ya isaklang kod sikato ran bagat a popoolan?

Saray Hebreo 8:2

Manlilingkur a Pangulon Pari ed Sankasantosan a Pasen, a salanti diad tuan tulda ya impaalagey na Katawan, aliwan say too.

Saray Hebreo 8:4

No wadya komun ed dalin, ag la nakaukolan a mampari ni, ta wala la ray paparin mangibabagat onung ed Ganggan.