Puyan 3:1 - Maung A Balita Biblia

¹ “Isulat mod anghil na iglisia ed Sardis: “Sikato yay ibabaga na walad sikatoy pitoran ispiritu na Dios tan saray pitoran bitewen. Amtak so gagawaen mo; amtak ya ipapasen da kan mabilay anggaman ya inatey ka!

Maung a Balita Biblia

¹ Isulat mod anghil na iglisia ed Sardis: Sikto yay ibabaga na walad sikatoy pitoran ispiritu na Dios tan saray pitoran bitewen. Amtak so gagawaen mo; amtak ya ipapasen da kan mabilay anggaman ya inatey ka!

Puyan 3:1 Referans Kwoze

1 Timoteo 5:6

Balet say biin balo a mambibilay ed minumundon liket, inatey la anggaman a mabilay ni.

Santiago 2:26

Inatey so laman ya anggapoy ispiritu; ontan met ya inatey so pananisia ya anggapo ray gawa.

Puyan 1:4

Nanlapud kinen Juan yan sulat a para saray pitoran iglisia ed Asia: Nawalaan kayo komuy bindision tan kareenan a manlapud Dios—say Dios natan, nen saman, tan say onsabi—manlapud saray pitoran ispiritu a walad arap na trono to,

COLOSAS 2:13

Sikayo ran inatey lapud saray kasalanan yo, tan lapud Hintil kayo ya anggapod silong na Ganggan, say Dios so amilay ed sikayo a kaolup yoy Cristo; pinirdona to la ran amiy kasalanan tayo.

Judas 1:12

Makarotarotak ira diad pirongo rad sikayo, lapud makapabaing a panangan da. Say laman da labat so nununoten da. Singa ra lorem ya ipapalig-palig na dagem, balet ag mangipelag na oran. Singa ra met kiew ya ag mambunga anggan panaoy panagbunga; aliling day kiew ya abagut anggad lamut, tan inate-atey la.

Puyan 2:19

Amtak so gagawaen mo, say panangarom, say inkatoor mo, say panlilingkur mo, tan say inkaanos mo. Amtak a dakel ni natay gagawaen mo nen say ginagawam nen inmonan panaon.

Lucas 15:24

Ta inatey yan anak ko, balet mabilay la; abalang, balet nalmo la.’ Ginmapo sirin so panliliket da.

Puyan 1:16

Sankabembenan toy pitoran bitewen ed kawanan a lima to, tan ompapaway ed sangi toy sakey a matdem ya ispadan nantopag so tarem. Say lupa to singa liwaway agew ed kaptangan.

TAGA-EFESO 2:5

Anggaman ya inatey ti la lapud kasusumlang tid ganggan, binilay to itayo a kaiba tiy Cristo. Nilaban kayo lapud baleg a panangaroy Dios.

Lucas 15:32

Balet nakaukolan a manliket tan mampista itayo, ta inatey yay agim, balet mabilay la; abalang, balet nalmo la!’”

TAGA-EFESO 2:1

Nen saman inaatey kayo lapud insusumlang yod ganggan tan impankakasalanan yo.

Puyan 2:13

Amtak a manaayam kad kawalaan na trono nen Satanas. Anggaman ontan, siansian matoor kad siak. Ag mo binenegay pananisiam ed siak ya anggan nen si Antipas a matoor kon tasi et pinatey dad kawalaan mo a panaayaman nen Satanas.

Puyan 1:20

Sikato yay niamut a kabaliksan na pitoran bitewen a nanenengneng mon sankabembenan ko tan saray pitoran balituk a panangipatoonay lamparaan: saray pitoran bitewen sikaray anghil na pitoran iglisia, tan saray pitoran panangipatoonay lamparaan sikaray pitoran iglisia.

Puyan 4:5

Manlalapud man ed trono so kirmat, saray tanul, tan dalagorug na karul. Walay pitoran mandarlang a lamparaan ed arap na trono; sikara yay pitoran ispiritu na Dios.

Puyan 1:11

Inkuanto, “Isulat moy nanenengneng mo, tan ipawit mo ed saray pitoran iglisia a walad Efeso, Esmirna, Pergamo, Tiatira, Sardis, Filadelfia, tan Laodicea.”

Juan 1:33

Ag ko ni kabat nen saman, balet say Dios ya angibakid siak a maminyag ed danum kuantod siak, ‘Say nanengneng mon toon dadapoay Ispiritu tan panayaman to sikatoy maminyag na totoo ed Ispiritu Santo.’

Juan 1:16

Diad inkapno toy aro, pinalangkapan to itayon amin na ag nasabsabaan a kaabigan.

Puyan 5:6

Insan anengneng koy sakey a Kordiron manalalagey ed pegley na samay trono, a niliber na saramay apatiran mabilay a pinalsa tan saramay mamatakken. Singa pinatey so nengneng to may Kordiro. Pitoray saklur to tan pitora met so mata to, a sikaray pitoran ispiritu na Dios a nibakid sankamundoan.

1 Pedro 1:11

Sinali ran inanap no kapigan tan no panoy isabi to yan panaon. Say Ispiritu nen Cristo a walad sikara intoro to yan panaon, nen impasakbay to ray kairapan a liknaen nen Cristo tan say kagalangan ya ontombuk.

Saray Gawgawa 2:33

Niatagey ed nikawanay Dios, tan inawat toy Ispiritu Santo ya insipan na Ama to. Inter nen Jesus yan Ispiritu Santo ed sikami, onung na nanenengneng tan narerengel yo natan.

Juan 20:22

Kapangibaga tod saya, iningasan to ra tan kuanto, “Awat yoy Ispiritu Santo.

Juan 3:34

Ta say imbakiy Dios ipulong toy salitay Dios, ta ag nasabsabaay pangiter na Dios ed sikato na Ispiritu.

Puyan 2:9

Amtak iray kairapan mo; amtak a mairap-bilay ka balet, diad tuay tua, mayaman ka! Amtak met no panoy pamapaoges dad sika ray mangibabagan Judio ra, anta andi; kabyangan iray olupan nen Satanas!

Puyan 2:2

Amtak iray ginagawam; tan amtak no panoy impankekesaw tan impanaanos mo. Amtak ya ag mo ra naanosay maoges a totoo. Sinubok mo ray mangibabagan apostol ira anta andi, tan nalmoan mon matila ra.

Puyan 3:2

Kanyan liing ka, tan pabiskeg moy atilak nid sika, pian ag natuloyan ya ompatey. Nalmoan ko ya aliwan nagnap iray ginagawam diad pakanengneng na Dios ko.

Puyan 3:8

Amtak so gagawaen mo; amtak a melag so pakayarim, balet inonur moy bangat ko tan matoor kad siak. Kanyan nilokasan koy puirta ed arap mo, tan anggapoy makapangikaput.

Puyan 3:15

Amtak iray ginagawam; amtak ya aliwa kan ambetel odino ampetang. Agaylay pampirawat kon ambetel o ampetang ka komun!