Nehemias 2:17 - Maung A Balita Biblia

¹⁷ Balet natan inkuankod sikara, “Nengneng yoy gunigon a walad sikatayo, lapud aderal-deral so Jerusalem tan saray puirta to. Pasimbaloen tin ipaalagey so padir na siudad tan pansamputen tayo la yay kababaingan tayo.”

Maung a Balita Biblia

¹⁷ Balet natan inkuankod sikara, Nengneng yoy gunigon a walad sikatayo, lapud aderal-deral so Jerusalem tan saray puirta to. Pasimbaloen tin ipaalagey so padir na siudad tan pansamputen tayo la yay kababaingan tayo.

Nehemias 2:17 Referans Kwoze

Ezekiel 5:14

Balawen tan arawian kayo na balang sakey ya ondalan a toon taga saray bansan walad kaliber-liber yo.

Nehemias 1:3

Imbaga rad siak a baleg so paniirap da ray akaligtar tan akapawil lad baley da; memelag-melagen met ira na saray totoon sangkaili a manaayam ed kaliber-liber da. Imbaga ra met ed siak ya ageba ni ray padir na Jerusalem tan ag ni apasimbalon nipaalagey iray puirtan apoolan.

Saray Salmo 79:4

Luludlureyen da kami ray kakaabay min bansa; elek-elekan tan balbalawen da kami.

Saray Tagleey 3:51

Nanaermenay pusok diad pakanengneng kod nansumpalan da ray bibii ed siudad.

Saray Tagleey 2:2

Andi-panangasi a dineral na Katawan ya amin iray bario na Juda. Diad pasnuk to inggegeba to ray tirinsira na Juda. Impelag tod kababaingan so nanarian tan amin iray manoley to.

Jeremias 24:9

Iyakar kod sikara yan deral pian ontakot iray amin a bansa ed mundo. Ludlureyen ira na saray totoo, sutil-sutilen da ra, balbalawen da ra, tan ikana ran sakey a samba so ngaran da anggan iner a pasen a pangikayatan kod sikara.

Saray Salmo 79:12

Katawan, bales mo pan mamimpito iray arum a bansa, lapud saray impanpapabaing dad sika.

Saray Salmo 44:13

Sankanengneng na saray kakaabay mi so ginawam ed sikami, kanyan eelek-elekan tan luludlureyen da kami.

1 Samuel 11:2

Inmebat si Nahas, “Mipaknaan ak ed sikayo no ontoluk kayon sukiten koy kawanan a mata na balang sakey ed sikayo, pian napabanday so intiron Israel.”

Nehemias 2:13

Labi ni nen pinmaway ak ed siudad tan dinmalan ak ed Puirta na Patar diad sagur. Insan linma ak ed abalaten tan dinalan koy Bubon na Dragon nen tinmuloy ak ed Puirta na Dotak. Legan kon manaakar ninengneng ko ray atebagtebag a padir tan saray puirtan dinederal na apoy.

Nehemias 2:16

Anggapod saramay opisyal diman so akaamtad nilnilak tan no anto ray ginagawak. Anggapo niy bengatlan imbagak ed siopaman ed saray kaparak a Judio—diad saray papari, saray pangulo, saray opisyal, odino siopaman a mankimey.

Nehemias 3:15

Pinasimbalon impaalagey nen Sallum a lakin anak nen Col-hoza tan manoley na distritoy Mizpa so Puirta na Sobul. Tinarungan to, inlira to ray puirta, insan to inyan iray balewet. Diad Dipositoway Danum na Seloe impaalagey toy padir ya akiketeg ed tanamanan na ari, ya anggad saray balitang a mampaleksab manlapud Siudad nen David.

Esdras 9:9

Naaripen kami, balet ag mo kami pinaolyan ed saman a kipapasen. Lapud ag mangoman a panangarom initdan mo ray impirador ed Persia na puson maabagey ed sikami, kanyan inabuloyan da kami nin mambilay tan mangipaalagey lamet na Timplom ya aderal-deral. Inabuloyan da kami met a mambilay ya arawid kaatapan diad Juda tan diad Jerusalem.

Saray Salmo 44:14

Ginawa mo kamin panelekan na saray arum a bansa; mameyeng-peyeng irad panlelemlemew dad sikami.

Saray Salmo 102:15

Takotan na saray bansa so Katawan; takotan na amin ya ararid tapew na dalin so pakayari to.

Mikias 7:11

Sikayo ran totood Jerusalem, onsasabi lay panaon na pangipaalagey lamet ed saray padir na siudad. Diad satan iran agew onawang so dalin yo.