Mikias 7:2 - Maung A Balita Biblia

² Anggapo lay nakdaan ya anggan sakey a matonung a too ed bansa, anggapo lay toon matoor ed Dios. Balang sakey a too et manaalagar na pankanawnawa ton mamatey ed kapara ton too. Balang sakey et labay ton erelen so siopaman a kadalaan to.

Maung a Balita Biblia

² Anggapo lay nakdaan ya anggan sakey a matonung a too ed bansa, anggapo lay toon matoor ed Dios. Balang sakey a too et manaalagar a pankanawnawa ton mamatey ed kapara ton too. Balang sakey et labay ton erelen so siopaman a kadalaan to.

Mikias 7:2 Referans Kwoze

Saray Salmo 12:1

Tulongan mo kami pa, Katawan! Anggapo lay maung a toon atilak; naandipat la ray totoon napanmatalkan.

Isaias 57:1

Ompatey iray matonung, et anggapoy toon makatalus odino mangabagey. Balet no ompatey ira, anggapo lay makasigensigen ed sikara.

Jeremias 5:26

“Manaayam ed kawalaan da ray totook iray totoon maoges; mantatalaran iran singa totoon mangipapanat na iket a manerel na saray manok, balet inyan da ray patit da a manerel na totoo.

Isaias 59:7

Maoges lawas iray plano yo, tan agaylay siglat yon manumpal. Bengat-bengat kayon mamapatey na saray totoon anggapoy kasalanan. Deral tan bagbag so ititilak yo ed inerman a laen yo,

Probirbio 1:11

No bilang ta ikuanda, “Gala, ta mananap itayoy pateyen tayon too! Dogpaan tayo ray totoon anggapoy kasalanan, pian walay panliketan tayo!

Jeremias 16:16

Say Katawan kuanto, “Mangibaki ak na saray amayamay a sumisigay a mangerel ed sarayan totoo. Insan mangibaki ak na saray amayamay ya umaanup a manganup ed sikara diad palandey tan pokdul, tan anggan diad saray abut ed saray ankakabaleg a bato.

1 Samuel 24:11

Nengneng mo, ama, nengneng mo yay sankabembenan kon parti na saloy na kawes mo! Apatey ta ka la komun, balet saya labat lay ginerger ko. Diam nanengneng ya anggapoy kanunutan kon onlaban ed sika o pasakitan ka. Aanapen mo ak a pateyen anggaman ya anggapoy ginawak a maoges ed sika.

Mikias 3:10

Ipapaalagey yoy siudad na Dios, say Jerusalem, diad pundasion na panagpatey tan kaogsan.

Saray Tagleey 4:18

Babantayan kami na kalaban; ag kami anggan makakar ed saray dalan. Sinmabi lay oras mi, sinmabi lay anggaan mi.

Jeremias 5:16

Mamatey ya andi-panangasi iray pumapana ra tan matalonggaring ya amin so sondalo ra.

Probirbio 12:6

Makapatey iray salita na totoon maoges, balet makapangyagel iray salita na totoon matonung.

Saray Salmo 57:6

Saray kalaban ko pinatitan da ak na iket, a pangerel dad siak; mapalaloy kapapagaan ko. Angotkot iray abut ed dalanen ko, balet sikaran diliy naplag.

1 Samuel 26:20

Ag mo komun aabuloyan a napatey ak ed arum a bansa, ya arawi ed Katawan. Akin et say ari na Israel anapen to ak a pateyen a singa sakey a lies? Akin et anapen to ak a singa sakey a manok ya atap?”

Saray Salmo 10:9

singa lion a manaalagar ed amutan to. Tatalaranan to ray mairap-bilay, sisingkaten to rad patit to, insan to ra igagayugoy ya iyarawi.

Isaias 9:19

Lapud pasnuk na Katawan a Makapanyarin-amin, say pananusa to et ondadalang a singa pool ed intiron dalin tan papateyen to ray totoo, tan balang sakey iyaagel toy sikaton dili.

Jeremias 8:6

Tinmalineng ak a maung, balet aliwan katwaan iray sinalita yo. Anggapoy anggan sakey ed sikayon maermen ed kaogsan to; anggapoy anggan tinmepet, ‘Antoy ginawak a kaogsan?’ Balang sakey itutuloy toy dilin kabibilay to, singa sakey a kabayon maples ya ombabatik ya onlad bakal.

Ezekiel 22:12

Wala ray totoom a miuupan mamatey na arum a totoo. Saray arum mapalaloy panagpaabang day kuarta ed saray kapara ran Israelita tan onyayaman irad panaganamut day pankanawnawa ra. Alingwanan da ak.” Say Katawan a Dios so nansalita.

Ezekiel 24:6

Sikato ya so kuan na Katawan a Dios: “Pakaskasi so siudad a kawalaan da ray totoon managpatey na too! Kapara toy latiyan a kaldiro ya ag balut naorasan. Sansakey a nanaala so tegteg na karni tan anggapoy akeraan a karga to.

Oseas 5:1

“Dengel kayod sayan salita, sikayo ran papari! Manimano kayo, sikayo ran totood Israel! Dengel kayo, sikayon kabyangay pamilya na ari! Nepeg yo komun so manintinsia onung ed katonungan—kanyan sikayo so nasintinsiaan a nadusa! Nagmaliw kayon patit diad Mizpa, nagmaliw kayon sakey ya iket ya akapanat ed Palandey na Tabor;

Mikias 2:8

Say Katawan inmebat, “Dodogpaan yon singa kalaban iray totook. Onsesempet iran nanlapud bakalan iray lalaki ta abaloan dan arawi rad kaatapan no wala rad kaabungan, balet wadtan kayon manaalagar a manakew na akasolung a kawes da.

Mikias 3:2

balet kabosul yo so kamaungan tan inaro yo so kaogsan. Kakataten yon mabilay iray totook tan bibingbingkasen yoy laman da.

Zacarias 11:6

Say Katawan kuanto, “Ag ko la kasian so siopaman a too ed tapew na dalin. Paoleyan kod saray manoley da iray amin a totoo. Deralen na sarayan manoley so mundo, tan ag ko iyagel ed pakayari ra.”)

Saray Salmo 12:2

Mantitilaan la ray totoo; manlolokowan tan mampapalikdowan ira.

Isaias 3:5

Mampapairapan tan manlalamesan so balang sakey ed sikara. Saray tobun-balo ag da pagalangan iray pangulowan da, tan saray andi-kakanaan a totoo ag da italtalek iray walad pakaoley.

Oseas 6:9

Singa olup na saray matakew a mananeb na sakey a too iray papari. Mamapatey ira na too anggan diad dalan a mamaarap ed masanton pasen na Sikem. Gagagalaen da so panggagawa rad sayan kaogsan!

Saray Gawgawa 24:9

Akikasakey ira may Judio ed kinen Tertulo, tan pinaneknekan dan tua ya amin so imbaga to.