Levitico 4:3 - Maung A Balita Biblia

³ No say Pangulon Pari so nankasalanan tan impilanur to ray katoowan, nepeg a mangyapay na sakey a kilaw a bakan kalakyan ya anggapoy deral na laman to, insan to ibagat ed Katawan a para kasalanan to.

Maung a Balita Biblia

³ No say Pangulon Pari so nankasalanan tan impilanur to ray katoowan, nepeg a mangyapay na sakey a kilaw a bakan kalakyan ya anggapoy deral na laman to, insan ibagat ed Katawan a para kasalanan to.

Levitico 4:3 Referans Kwoze

2 CORINTO 5:21

Ag nankasalanay Cristo, balet lapud pankaabigan tayo, nibilang a makasalanan pian diad pikasakey tid sikato, nibilang itayon matonung ed arap na Dios.

Levitico 9:2

Inkuantod kinen Aaron, “Mangala ka na sakey a kilaw na bakan kalakyan tan sakey a kordiron kalakyan ya anggapoy deral na laman da tan ibagat mo ra ed Katawan, say baka bagat a para kasalanan tan say kordiro bagat a popoolan.

Levitico 4:14

tan no akabatan la imay kasalanan ya agawa, saray katoowan mangisaklang ira na kilaw na bakan kalakyan a sakey a bagat a para kasalanan. Iyakar da so baka diad Tuldan Ayamay Katawan;

Saray Hebreo 5:3

Lapud wala met so dilin kakapoyan to, nakaukolan a mangibagat aliwa labat a para saray kasalanan na too, no ag ingen pati saray dilin kasalanan to.

Esdras 8:35

Amin a pinmawil a nanlapud arum a bansan nibantakan da et angisaklang irad Dios na Israel na saray bagat a popoolan. Angibagat ira na labinduan bakan kalakyan para amin ya Israelita, anemaplo tan siam a karniron kalakyan, pitomplo tan piton kordiro; angibagat met ira na labinduan kanding pian napaandi ray kasalanan da. Amin da ra ya et bagat a popoolan ed Katawan.

Saray Taga Roma 8:3

Say ag nagawaay Ganggan lapud kakapoyay inkatoo, ginawa lay Dios. Dinusa toy kasalanan ed inkatoo diad panamegley na impangibaki toy dilin Anak to a linma dian too a makapankasalanan, tan nagmaliw a bagat para kasalanan.

Ezekiel 43:19

Saray papari labat a kabyangan na tribu nen Levi a say sengeg da et si Sadoc so onlad kawalaan ko a manlingkur ed siak. Siak a Katawan a Dios so nangganggan ed saya. Itdan mo ra na sakey a kilaw a bakan kalakyan ya isaklang dan bagat a para kasalanan.

Exodo 29:21

Mangala ka na daiset a dala a walad altar tan say daiset a larak a panagpoyuk, tan iwalsik mo ra ed saray kawes di Aaron tan saray anak to. Diad ontan si Aaron, saray anak to, tan saray kawes da et nisaklang iran masanto ed siak.

Exodo 29:14

Balet poolan mod paway na kampo so laman na bakan kalakyan, say katat to tan say pait to; sikatoy bagat a para kasalanan.

Exodo 29:7

Insan mo alaen so larak a panagpoyuk, ikalbom ed olo to, tan poyukan mo.

Saray Bilang 8:8

Insan irad satan mangyakar na sakey a kilaw a bakan kalakyan tan say kaukolan a bagat a trigo a salanti say arinan nikames ed larak na oliba; mangyakar ka met na sananey a bakan kalakyan ya ibagat a para kasalanan.

Levitico 16:11

No ibagat nen Aaron imay bakan kalakyan a para saray kasalanan to tan saray kasalanan da ray kabyangay pamilya to,

Levitico 16:6

Mangibagat na sakey a kalakyan a baka a pangekal ed saray dilin kasalanan to tan saray kasalanan da ray kabyangay pamilya to.

Levitico 8:12

Kinonsagra toy Aaron diad impangikalbo tod olo to na larak a panaglana.

Levitico 5:6

tan say dusay kasalanan to et say pangibagat tod Katawan na sakey a kabatyan a karniro odino kanding. Say pari isaklang to so bagat a para kasalanan to yan too.

Exodo 30:10

Maminsan ed kapag taon gawaen nen Aaron so sirimonya a panlinis ed sayan altar diad pangiporanis tod saray pinagsaklur na altar; say iporanis to et say dala na ayep ya imbagat a pangekal na kasalanan. Gawaen ya a tinaon ed kapigan man a panaon. Sayan altar et nepeg a sigput a masanto, tan nisaklang ed siak a Katawan.”

Saray Hebreo 9:12

Amimpinsan a linmoob ed Sankasantosan a Pasen si Cristo, tan duga la man. Aliwan dala na saray kanding tan saray kilaw a baka so inawit ton ibagat, no ingen ag say dilin dala to, tan lapud saya inggamuran to itayoy karondon ya andi-anggaan.

Levitico 4:5

Insan samay Pangulon Pari mangala na daiset a dala to may baka tan inyakar tod dalem na Tulda.

Levitico 4:23

tan no nipakabat la ed sikato so kasalanan ya agawa to, mangyakar na kanding a kalakyan ya anggapoy deral na laman to insan to ibagat.

Levitico 4:28

et no nipakabat la ed sikato so kasalanan ya agawa to, mangyakar na kanding a kabatyan ya anggapoy deral na laman to insan to ibagat.

Saray Bilang 16:22

Balet di Moises tan Aaron dinmakmomo ra ya anggad dalin tan kuanda, “O Dios, sika so nanlapwan na amin a bilay. No mankasalanan so sakey a too, mampasnuk ka kasi ed amin a totoo?”

2 Saray Awaran 29:21

Angala ray pitoran bakan kalakyan, pitoran karniro, pitoran kordiro, tan pitoran kanding ta isaklang da ra a pangekal na saray kasalanan na pamilyay ari tan saray totood Juda, tan panlinis na Timplo onung ed ganggan. Imbaga na ari ed saray papari, a kabyangan ira na boleg nen Aaron, ya isaklang dan bagat ed altar ira may ayayep.

Levitico 1:3

No sakey ed saray baka to so isaklang ton bagat a popoolan, nepeg a bakan kalakyan ya anggapoy deral na laman to. Nepeg ton isaklang so baka diad lolooban na samay Tulda pian awaten na Katawan so mangisaklang.

Levitico 1:10

No sakey ed saray karniro odino kanding so ibagat na samay too, nepeg a sakey a kalakyan ya anggapoy deral na laman to.

Levitico 6:18

Diad amin a panaon ya onsabi siopaman ed saray lalakin kabyangay boleg nen Aaron et nayarin mangan ed saray akeraan ed bagat a trigo tan sikatoy betang da lawas ed saray bagat a popoolan ya insaklang ed Katawan. Siopamay arum a maniwit ed sayan bagat napasakitan na pakayari na inkasanto na bagat.

Levitico 9:3

Insan ibagam ed saray totood Israel a mangala ray sakey a kanding a kalakyan, ta ibagat da a para kasalanan, sakey taon a baka tan sakey taon a kordiro ya anggapoy deral na laman da, ta isaklang da ran bagat a popoolan,

Levitico 16:3

Nayarin onloob ed Sankasantosan a Pasen kayari ton angawit na kilaw a bakan kalakyan ya ibagat ton para kasalanan tan say sakey a karniron kalakyan ya isaklang a bagat a popoolan.”

Levitico 16:5

Saray Israelita mangiter ira ed kinen Aaron na duaran kanding a kalakyan ya ibagat a para kasalanan tan sakey a karniron kalakyan ya isaklang a bagat a popoolan.

Ezekiel 40:39

Diad sayan lolooban a kuarto walay apatiran lamisaan, duara ed kapag dapag na kuarto. Diad sarayan lamisaan so pamapapateyan na saray ayayep ya ibagat, a nayarin bagat a popoolan odino bagat a para kasalanan odino bagat a pambayar.

Ezekiel 44:27

insan onloob ed patiod dalem na Timplo tan mangisaklang na bagat a para kasalanan to, pian nayarian toy manlingkur lamet ed Timplo. Siak a Katawan a Dios so nansalita.