Jeremias 49:13 - Maung A Balita Biblia

¹³ Sinambaan kon dili a say siudad na Bozra et magmaliw a makapataktakot a nengnengen tan sakey ya andi-kakanaan; ludlureyen na saray totoo tan ikana ray ngaran to a sakey a samba. Ando lan andon naderal iray kaliber-liber ton baley. Siak, say Katawan, so nansalita.”

Maung a Balita Biblia

¹³ Sinambaan kon dili a say siudad na Bozra et magmaliw a makapataktakot a nengnengen tan sakey ya andi-kakanaan; ludlureyen na saray totoo tan ikana ray ngaran to a sakey a samba. Ando lan andon naderal iray kaliber-liber ton baley. Siak, say Katawan, so nansalita.

Jeremias 49:13 Referans Kwoze

Isaias 34:6

Naames so ispada to na dala tan taba ra a singa dala tan taba na saray nibagat a kordiro tan kanding. Mangibagat so Katawan ed siudad na Bosra; gawaen to ya a pamatey na dakerakel a totoo ed dalin na Edom.

Genesis 22:16

“Sambaan kod dilin ngaran ko—say Katawan so mansasalita—a bindisionan ta ka na amayamay a kaabigan. Lapud ginawam ya, tan ag mo insiblet ed siak so bogbogtung ya anak mo,

Amos 6:8

Say Katawan a Dios a Makapanyarin-amin et masimoon ton inter yan pasakbay: “Kabosul koy panagpaatagey da ray totood Israel; kagulak iray ankakabaleg a kaabungan da. Ipalimak ed saray kalaban so manonan siudad da tan amin a bengatlan logan to.”

Amos 1:12

Lapud saya mangyakar ak na apoy ed siudad na Teman tan poolan ko ray tirinsira na Bozra.”

Jeremias 49:22

Say kalaban dogpaan toy Bozra; singa agilan onsibar ya akabuskag iray payak to. Diad satan ya agew saray sondalo na Edom ontakot ira a singa biin mampapasakit.”

Jeremias 44:26

Balet natan dengel kayod samba, a siak a Katawan et ginawak diad makapanyarin ngaran ko ed sikayon amin ya Israelita a walad Egipto: Ag ko lan balut abuloyan so siopaman ed sikayo a mangikanay ngaran ko diad pansamba to a kuanto, ‘Nitay Katawan a Dios a mabilay!’

Isaias 63:1

“Siopa yay onsasabin nanlapud siudad na Bozra ed Edom? Siopa yay mapagalang ya akakawes na ambal-balanga, a manaakar a sankataruk toy pakayari tan biskeg?” Sikato so Katawan, makapanyarin mangilaban, ya onsasabin mangibawag na pananalo to.

Isaias 45:23

Tua so sipan ko, tan ag balut naoman. Sasambaan kod siak a dili; Ondagod siak so balang sakey tan ontalimukor irad arap ko tan sambaan dan matoor irad siak.

Obadias 1:18

Saray totoon kabyangay boleg nen Jacob tan Jose et magmaliw iran singa apoy; deralen da ray totoon kabyangay boleg nen Esau a singa pamool na apoy ed dayami. Anggapoy makaliktar a kabyangay boleg nen Esau. Siak, say Katawan, so nansalita.

Joel 3:19

“Magmaliw a disirto so Egipto, tan magmaliw a dalin ya aderal-deral so Edom, lapud dinogpaan day dalin na Juda tan pinapatey da ray totoo ton anggapoy kasalanan.

1 Saray Awaran 1:44

Nen inatey si Bela sinalatan nen Jobab a lakin anak nen Zera, tan taga Bosra.

Jeremias 18:16

Ginawa ran makapataktakot yan dalin, a nabalaw ya anggad angga. Nataktakot ya amin iray ondalan, lapud saray nanengneng da; ipeyeng-peyeng day olo rad pankelaw da.

Jeremias 19:8

Iyakar kod sayan siudad so onyan makapasinagem a deral pian balang sakey ya ondalan et natalagnaw tan nikelawan.

Jeremias 51:14

Say Katawan a Makapanyarin-amin et sinambaan tod sikaton dili a mangyakar na amayamay a lalakin ondogpa ed Babilonia a singa ra dakerakel a dorun, tan iyeyag day panalo ra.

Jeremias 48:24

Kiryot, tan Bosra. Sinmabi lay sintinsia ed amin da ray siudad na Moab, arawi may asingger.