Jeremias 14:2 - Maung A Balita Biblia

² “Say Juda et walad kaermenan, ompapatey iray siudad to, mandokdokul ed dalin iray totoo to lapud kaermenan, tan onkekerew na tulong so Jerusalem.

Maung a Balita Biblia

² Say Juda et walad kaermenan, ompapatey iray siudad to, mandokdokul ed dalin iray totoo to lapud kaermenan, tan onkekerew na tulong so Jerusalem.

Jeremias 14:2 Referans Kwoze

Isaias 3:26

Manermen tan manakis iray puirta na siudad, tan say dilin siudad magmaliw a singa biin labus-lakseb a manyodyorung ed dalin.

Jeremias 8:21

Asugat so pusok lapud asugat iray totook. Maneermen ak; sigput a nakalan ak na biskeg na linawa.

1 Samuel 5:12

Anggan saray totoon ag inatey et apelpelsaan ira, tan inmakis iran kinmerew na tulong ed saray diriyos da.

Zacarias 7:13

Lapud ag ira dinmengel nen nansalita ak, ag ko ra inebatan nen nampikasi ra.

Jeremias 11:11

Lapud saya, siak, say Katawan, papasakbayan ko ra a deralen ko ra tan ag ira makabatik. Tan no sikaray onkerew na tulong ed siak, ag ko ra dengelen.

Joel 2:6

Diad isasabi ra, natatakot ya amin so katoowan; ampoti-potiy bosaleg dan amin.

Joel 1:10

Anggapoy tanaman ed kaalogan; maermen so dalin lapud aderal-deral iray trigo, amagaan iray sengeg na ubas, tan nalnes iray kiew na oliba.

Oseas 4:3

Kanyan say dalin onkelang, tan ompatey ya amin iray manaayam. Ompatey ya amin iray ayayep, amin a manok, tan amin a sira.”

Saray Tagleey 5:10

Lapud eras singa kami popoolan ed kapepetang mi, ya anggad ampetang lay baog mi a singa pogun.

Saray Tagleey 2:9

Atabun-tabunan la na saray deral-deral iray puirta tan apoter-poter iray tarangka ra. Nibantak ed arum a bansa so ari tan saray prinsipi. Ag la nibabangat so Ganggan, tan anggapo lay nanaawat na saray propita a pasingayew a manlalapud Katawan.

Jeremias 18:22

Mangibaki ka pa na olup da ray totoon bigla-biglan mangakokos ed logan na saray kaabungan da; paeyag mo rad takot. Angotkot iray abut a kapelagan ko, tan angyan iray patit a pangerel dad siak.

Jeremias 12:4

Kapigay itonda na sayan inkamagaay dalin mi, tan say inkalenes na karikaan ed kaalogan? Ompapatey iray ayayep tan saray manok, lapud kaogsan na saray totoon manaayam ed sayan dalin, ya ibabaga ra, ‘Ag nanenengneng na Dios so gagawaen mi.’”

Jeremias 4:28

Manermen so dalin; ombilonget so tawen. Say Katawan so nansalita tan ag mansalat na kanunotan to. Nanggetma la so Katawan tan ag to la ya babawien.

Isaias 33:9

Ataynan so dalin kanyan anggapoy onkitakitaw. Amagaan so takel na Libano, nagmaliw a singa kalawakan so patar na Saron, tan mampagpag iray bulong na kakiewan ed Basan tan diad Palandey na Carmelo.

Isaias 24:7

Onlelenes iray sengeg na ubas tan ondadaiset lay alak. Amin da ray maliket nen saman et maermen la ra natan,

Isaias 24:4

Namamagaan so tapew na dalin tan nalalaylay iray amin a tanaman; onkakapoy so intiron mundo; naboboluk so tawen tan dalin.

Isaias 15:5

Kaskasian koy Moab! Batik ed baley na Zoar tan diad Eglatshelishiyah iray totoo to. Manakakis ya ontatatdang ed Luhit iray pigaran totoo; saray arum batik irad Horonaim a maksil so panakakis da lapud sinmabin deral.

Isaias 5:7

Say Israel so kaubasan na Katawan a Makapanyarin-amin; saray totood Juda iray wakal na ubas ya intatanem to. Inilaloan to a manggawa ray kamaungan, balet nampapatey ira lalaingen na katoowan! Inilaloan ton manggawa ray kaptekan, balet onkekerew na katonungan iray papairapen da.

Say Libro nen Job 34:28

Pinasoot dan ontawag ed Dios iray mairap-bilay, et denengel toy ikekerew day tulong.

1 Samuel 9:16

“Nabwas, sakey ya onyan oras, ibakik ed sikay sakey a lakin kabyangay tribu nen Benjamin; lanaan mo ta sikatoy manoley ed saray totook ya Israelita, tan iyagel to rad saray Filisteo. Anengneng koy kairapan da ray totook, tan nadngel koy ikekerew dad siak na tulong.”

Exodo 2:24

Dinengel toy ngesnges da, ta anunotan toy impisipanan tod kindi Abraham, Isaac, tan Jacob.

Saray Salmo 144:14

Ondakerakel komun iray anak na baka mi, anggapo komuy naekalan ed sikara. Anggapo komuy mannangis ed saray daladalan mi lapud segsegang!

Isaias 24:11

Maneeyag ed saray dalan iray totoo lapud anggapo lay alak. Naandi lay liket; tinmaynan la ed dalin.

Jeremias 12:11

Ginawa ran andi-kakanaan so dalin ko; nagmaliw a begtebegtew ed imaton ko. Nagmaliw a kabueran so intiron bansak, tan anggapo lay malabay ed sayan dalin ko.

Jeremias 46:12

Nadngelan na saray bansa so kababaingan yo; nadngelan na balang sakey so panaakis yo. Mampapateran iray sondalo kanyan natutumba ra.”

Saray Tagleey 2:8

Peteg a ginetma na Katawan a nageba ray padir na Sion; Sinukat to ray padir, pian andi-saew a naderal to ran amin. Aderal-deral lan amin natan iray tori tan saray padir.

Aggeo 1:11

Anggapoy pateterteren kon oran ed dalin—diad kapokdulan, diad kaalogan, diad kaubasan, tan diad kaolibaan—diad amin a tanaman ed dalin, diad saray totoo tan saray ayayep, tan diad amin a bengatlan labay yon pabalegen.”

Joel 1:11

Manermen kayo, sikayon dumaralos; akis kayo, sikayon managasikasoy kaubasan, lapud aderal la ray trigo, sibada, on, aderal lan amiy tanaman ed kaalogan.

Joel 1:14

Iganggan yon nagawa so sakey a panayuno; pantitipon yo ray totoo. Pantitipon yo ray pangulo tan amin da ray totood Juda. Pantitipon yo ra ed Timplo na Katawan a Dios yo tan tawag kayod sikato!