Genesis 22:1 - Maung A Balita Biblia

¹ Ag abayag, sinubok na Dios si Abraham; tinawag to, “Abraham!” “Wadya ak,” ebat nen Abraham.

Maung a Balita Biblia

¹ Ag abayag, sinubok na Dios si Abraham; tinawag to, Abraham! Wadya ak, ebat nen Abraham.

Genesis 22:1 Referans Kwoze

Saray Hebreo 11:17

Lapud pananisia, si Abraham, nen sinubok na Dios, inter ton bagat si anak ton Isaac. Si Abraham so angiteray Dios na sipan; anggaman ontan, sipaparaan a mangibagat ed saksakey ya anak to.

Deuteronomio 8:2

Nunot yo no panoy impangiwanwan ed sikayo na Katawan a Dios yo ed loob na apataploy taon diad kalawakan, impanlikna to kayoy kairapan a panubok ed sikayo, pian naamtaan to no antoy ginetma yon gawaen tan no kasi onuren yo ray ganggan to odino andi.

1 Pedro 1:7

Say balituk a naderal, iparalad apoy pian naamtaan no tuan puro. Ontan met, say pananisia yo a maung nen say balituk, nasubok pian naamtaan no tuan malet. Diad ontan napagalangan, nadayew, tan nitanduro kayo no Agew a nipanengneng si Jesu-Cristo.

Santiago 2:21

Ag ta apaandiay kasalanan ed arap na Dios si ama tayon Abraham lapud saray ginagawa to, nen insaklang tod altar si anak ton Isaac?

1 CORINTO 10:13

Anggapo niy sinmabin tukso ed sikayo ya ag ni asaliy karaklan. Matoor so Dios, kanyan ag to iyabuloy ya onsabid sikayoy tukson ag yo nayarian a taloen. Itdan to kayo ingey biskeg no natukso kayo, pian napaliisan yo, et manalo kayo.

Probirbio 17:3

Say balituk tan say pilak susuboken na apoy, tan say puso na too susuboken na Katawan.

Deuteronomio 8:16

Diad kalawakan initdan to kayo na mana a kinan yo, say kakanen ya ag balut atawayan na saray lalaki yo. Initdan to kayo na saray kairapan a panubok tod sikayo, pian diad kaonuran nabindisionan to kayo na saray maabig a bengatla.

Exodo 3:4

Nen anengneng na Katawan a Dios ya onaasingger si Moises, tinmawag ed sikato manlapud pegley na abeban kiew, “Moises, Moises!” “Wadya ak,” ebat nen Moises.

Genesis 22:11

Balet tinmawag a manlapud tawen so anghil na Katawan, “Abraham, Abraham!” Inmebat, “Wadya ak.”

Genesis 22:7

inkuanen Isaac, “Ama!” “Anto man, anak?” ebat to. Tinepet nen Isaac, “Nanenengneng kon walay ngalab tan kiew, balet kawalaay kordiron ibagat?”

Isaias 6:8

Insan nadngel kon say Katawan kuanto, “Siopay ibakik? Siopay managbalita tayo?” Inmebat ak, “Siak! Ibaki mo ak!”

2 Saray Awaran 32:31

Kanyan anggan nen sinmabi ray taga Babilonia a nibakin manosisad nidoma-doman agawa ed bansa to, inabuloyan na Dios si Ezekias a gawaen toy labay ton dili pian nasubok so petepeteg ya inkatoo to.

Exodo 16:4

Say Katawan kuantod kinen Moises, “Natan paoranen ko a manlapud tawen na kakanen a para sikayon amin. Saray totoo et nepeg ya ompaway iran inagew-agew a manala na kanen dan onduga ed sanagew. Diad onya nasubok ko no onuren da kasi iray bilin ko.

Deuteronomio 13:3

ag yo dedengelen. Say Katawan a Dios yo et ikana to a panubok ed sikayo, pian naamtaan to no kasi inaro yo ed intiron puso yo tan intiron kamarerwa yo.

Saray Huis 2:22

Ikanak ira yan bansa ed panubok kod saray Israelita no matoor irad siak kasi a singa inkatoor na saray atateng da.”

2 Samuel 24:1

Aminsan akapasnuk so Katawan ed Israel, kanyan tinanggoyur ton mangiter na gunigon ed saray Israelita si David. Inkuan na Katawan ed sikato, “Laka, ta bilang mo ray totood Israel tan Juda.”

Saray Salmo 11:5

Say Katawan sasalaysayen to ray matonung tan saray maoges a totoo; kabkabosul to ray totoon maruksa.

Genesis 15:1

Kasumpal to yan inkagawa, walay pasingayew ed kinen Abram tan arengel ton inkuan na Katawan ed sikato, “Ag ka natatakot, Abram. Salimbengan ta kad kaatapan tan itdan ta kay baleg a tumang.”

Genesis 21:11

Lapud saya agunigon na baleg si Abraham, ta anak to met si Ismael.

Genesis 37:13

inkuanen Jacob ed kinen Jose, “Laen mo ra may agagim dimad Sikem a kawalaan dan pampapastolan.” Inmebat si Jose, “On, ama.”

Genesis 46:2

Akisalitay Dios ed sikato diad panamegley na sakey a pasingayew ed labi tan inkuanto, “Jacob, Jacob!” “Wadya ak! Anto man?” ebat to.

1 Samuel 3:4

si Samuel tinawag na Katawan, “Samuel, Samuel!” Inmebat, “Wadya ak!”