Ezekiel 44:7 - Maung A Balita Biblia

⁷ Dinotakan da so Timplok diad impangyabuloy dad saray totoon ag asegat a sangkaili, saray totoon ag mangoonur ed siak, ya onloob ed Timplo no ibabagat ed siak iray taba tan dala na saray ayayep ya ibagat. Kanyan saray totook dineral day impisipanan ko lapud amin a makapaingungot a ginagawa ra.

Maung a Balita Biblia

⁷ Dinotakan da so Timplok diad impangyabuloy dad saray totoon ag asegat a sangkaili, saray totoon ag mangoonur ed siak, ya onloob ed Timplo no ibabagat ed siak iray taba tan dala na saray ayayep ya ibagat. Kanyan saray totook dineral day impisipanan ko lapud amin a makapaingungot a ginagawa ra.

Ezekiel 44:7 Referans Kwoze

Levitico 22:25

Ag yo isasaklang a bagat a kakanen so ayep a nanlapud saray sangkaili. Sayan ayep et nibilang a walay deral na laman to kanyan ag nayarin ibagat.

Ezekiel 44:9

“Siak a Katawan a Dios ibabawag ko ya ag onloob ed Timplok so siopaman a toon ag asegat a sangkaili, saray ag onoonur ed siak, anggan saray sangkailin manaayam ed kawalaan da ray totood Israel.”

Jeremias 4:4

Toor yoy impisipanan yod siak a Katawan yo, tan isaklang yoy sikayon dili ed siak, sikayo ran totood Juda tan Jerusalem. No ag yo tooren, ondalang a singa apoy so pasnuk ko, lapud saray kaogsan a ginawa yo. Ondalang, et anggapoy makaerep.”

Levitico 26:41

tan anagyat ed siak ya onsumpad sikara tan mangibantak ed sikara diad dalin na saray kalaban da. Diad ontan, no saray kabyangay boleg yo et apaabeba la ra tan abayaran da la ray kasalanan da tan say insumlang da,

Genesis 17:14

Siopamay lakin ag asegat et ag la nibilang a kabyangan na saray totook, ta ag to tinoor so impisipanan ko.”

Saray Gawgawa 21:28

“Kabaleyan,” ineyag da, “tulongan yo kami! Sikato ya may toon nambabangat ed inerman a laen to na sumpad bansay Israel, sumpad Ganggan nen Moises tan sayan Timplo. Angitagar ni na saray Grigo diad dalem na Timplo, kanyan minurmura to yan masanton pasen!”

Saray Gawgawa 7:51

“Agaylay awet na olo yo! Agaylay ag pangoman na puso yo! Agaylay ag yo idengel ed salitay Dios! Kaparpara yo ray lalaki yo: susumlangen yo met a naynay so Ispiritu Santo!

Deuteronomio 10:16

Kanyan sirin, manlapud natan toluk kayod Katawan tan ekal yoy inkaawet na olo yo.

Saray Hebreo 8:9

Aliwan singa saya may impisipanan kod saray lalaki ra, nen agew ya intabin ko ran impaway ed Egipto. Aliwa ran matoor ed impisipanan kod sikara, kanyan pinaolyan ko ra.

Malakias 1:7

Onyay pamabalaw yod siak—mangibabagat kayoy andi-kakanaan a kakanen ed altar ko. Insan tetepeten yo, panoy ag mi impamagalang ed sika? Ibagak ed sikayo—diad ag yo pangingalngalep ed altar ko.

Ezekiel 22:26

Susumlangen na saray papari so ganggan ko tan dodotakan da so antokaman a masanto. Ag da pandodomaen so masanto tan say aliwan masanto. Ag da ibabangat so pandomaan na bengatlan malinis tan say aliwan malinis, tan anggapoy walad sikara so Agew na Panagpainawa. Lapud saya, ag ak papagalangan na saray totood Israel.

Ezekiel 7:20

Nen saman inkikinon da ray mararakep ya alahas da, balet inkakana da rad panggaway makapaingungot iran talintao. Lapud saya impagmaliw na Katawan a makarimdimla iray balituk tan saray pilak da.

Jeremias 31:32

Aliwan singa samay impisipanan kod saray lalaki ra nen intabin ko ran impaway ed Egipto. Aliwa ran matoor ed saman a sipanan, anggaman ya alimbawak so sakey ya asawan laki ed sikara.

Jeremias 11:10

Pinawil da ray kasalanan na saray lalaki ran ag tinmoluk ed saray ingganggan kod sikara; angigalang irad saray arum a diriyos. Dineral na saray totood Israel tan Juda so impisipanan kod saray lalaki ra.

Isaias 24:5

Dinotakan na saray totoo so mundo diad insusumlang dad saray ganggan na Dios tan diad impandederal dad andi-anggaan a sipanan.

Deuteronomio 31:20

Iyakar ko rad saman a mayaman tan mataban dalin onung na insipan kod saray lalaki ra. Nawalaan irad man na amin a labay dan kanen; mainawa tan maliket so pambilay dad man. Balet onasingger irad arum a diriyos tan mangigalang irad sikara. Ipolisay da ak tan deralen day impisipanan kod sikara,

Deuteronomio 31:16

Say Katawan kuantod kinen Moises, “Magano lay ipatey mo, et kapatey mo magmaliw iran malamang ed siak iray totoo tan deralen day impisipanan kod sikara. Ikaindan da ak tan mangigalang irad saray paganon diriyos na dalin a ngalngali da lan looban.

Deuteronomio 30:6

Say Katawan a Dios yo et itdan to kayo tan saray kabyangay boleg yo na matoluk a puso pian aroen yo ed intiron puso yo, et mansiansia kayon manayam ed saman a dalin.

Levitico 26:15

No ag yo onuren iray ganggan tan saray bilin ko tan deralen yoy impisipanan kod sikayo,

Levitico 21:21

Siopaman a kabyangay boleg nen Aaron a pari a walay deral na laman to et ag nayarin mangisaklang ed siak na bagat a kakanen.

Levitico 21:17

kinen Aaron, “Siopamay kabyangay boleg mon walay deral na laman to et ag nepeg a mangisaklang ed siak na bagat a kakanen. Mansiansia yan totontonen ed anggan kapigan a panaon.

Levitico 21:8

Saray totoo nepeg ya ipasen dan masanto so pari, lapud sikatoy mangisasaklang ed siak na bagat a kakanen. Siak so Katawan, masanto ak tan pasantosen ko ray totook.

Levitico 21:6

Nepeg a sikatoy masanto tan ag to nepeg ya ipelag ed kababaingan so ngaran ko. Sikatoy mangisasaklang na bagat a popoolan, kanyan nepeg a masanto.

Levitico 17:11

Walad dala so bilay na amin a pinalsan mabilay; sikato yay makasengeg a say Katawan ingganggan to ya amin a dala et ibungen ed tapew na altar pian naekal iray kasalanan na totoo. Say dala a sikatoy bilay et mamaandi na saray kasalanan.

Exodo 12:48

balet ag nayarin mangan so toon ag asegat. No manayam lad bansa so sakey a taga arum a bansa tan labay ton silibraan so Paskua a pamagalang ed Katawan, nepeg yo nin segaten ya amin iray lalaki ed pamilya to. Sikatod satan so nipasen a sakey a nianak ya Israelita tan nayarian toy mibiang ed pista.

Exodo 12:43

Say Katawan kuantod kindi Moises tan Aaron, “Sikara ya so totontonen no silibraan so Paskua: Anggapoy toon taga arum a bansa a nayarin mangan na kakanen na Paskua,

Ezekiel 44:15

Say Katawan a Dios kuanto, “Balet saray paparin kabyangan na tribu nen Levi tan si Sadoc so sengeg da et intutuloy day matoor a panaglingkur ed siak diad Timplo, anggaman ya inkaindan ak na amin da ray arum a totood Israel. Kanyan natan sikaray nepeg a manlingkur ed siak tan ondago rad arap ko a mangisaklang na saray taba tan say dala na saray ayayep ya ibagat.

Jeremias 9:25

Say Katawan kuanto, “Onsabiy panaon a dusaen ko ray totood Egipto, Juda, Edom, Ammon, Moab, tan amin a manaayam ed kalawakan a pinoputotan da ray buek da. Asegat ira yan amin a totoo, balet ag da tinoor so siopaman ya ipapamorya na segat. Amin da ra yan totoo tan amin a totood Israel et ag da sinumpal so impisipanan kod sikara.”

Malakias 2:4

Insan nakabatan yo ya inter kod sikayo yan ganggan, pian ag naderal so impisipanan kod saray paparin kabyangan iray boleg nen Levi.

Malakias 2:8

“Balet natan, inmarawi kayo ed tuan dalan, sikayo ran papari. Inggolo na bangat yo a nanggagaway kaogsan iray amayamay a totoo.