Ezekiel 33:11 - Maung A Balita Biblia

¹¹ Ibagam ed sikara a legan a siak so mabilay a Katawan a Dios, ag ko panliketan so ipatey na toon makasalanan. Labay ko ingen a magbabawid saray kasalanan to tan mambilay. Israel, tondaan mo lay kaogsan a gagawaen mo. Akin et labay moy ompatey?

Maung a Balita Biblia

¹¹ Ibagam ed sikara a legan a siak so mabilay a Katawan a Dios, ag ko panliketan so ipatey na toon makasalanan. Labay ko ingen a magbabawid saray kasalanan to tan mambilay. Israel, tondaan mo lay kaogsan a gagawaen mo. Akin et labay moy ompatey?

Ezekiel 33:11 Referans Kwoze

1 Timoteo 2:4

a labay ton nilaban ya amin iray katoowan tan nakabatan day katwaan.

Ezekiel 18:23

Abaloan yo a maliket ak a makanengneng ed maoges a too ya ompatey?” tepet na Katawan a Dios. “Andi, labay ko nin sikatoy nanengneng kon magbabawi tan mambilay.

2 Pedro 3:9

Say Katawan ag to babayagen a gawaen so insipan to, a singa nababaloay arum. Aanosan to kayo, ta ag to labay a walay nadusa, no ag ingen labay ton ibeneg na amin komun iray kasalanan da.

Saray Gawgawa 3:19

Kanyan magbabawi kayo la tan pawil kayo lad Dios, pian naponas iray kasalanan yo,

Probirbio 8:36

Balet say toon ag makarumog ed siak, papasakitan toy sikaton dili; siopamay mamobosul ed siak inaro toy patey.”

Oseas 14:1

Sikayo ran totood Israel, pawil kayo la ed Katawan a Dios yo. Imparokul tan impelag kayo na kasalanan yo.

Probirbio 1:23

Dengel kayo no pampasnukan ta kayo; itdan ta kayoy maung a simbawa tan inagnag kod sikayoy pakatalus ko.

Jeremias 3:22

Pawil kayo, amin yon angikaindan ed Katawan; paabigen to kayo, tan pagmaliwen to kayon matoor. Ikuanyo, “On, onsisingger kamid Katawan, ta sikatoy Katawan a Dios mi.

Oseas 11:8

“Panon toy isawak ed sika, Israel? Panoy pangikaindan kod sika? Nayarian ta ka kasin deralen a singa ginawak ed Adma, tan Zeboim? Ag iyabuloy na pusok a gawaen ko ya! Lalon onlalaknab so panangarok ed sika.

Ezekiel 14:6

“Natan sirin, ibagam ed saray Israelita so ibabagak, siak a Katawan a Dios: Magbabawi kayo tan taynan yo la ray makapaingungot a talintaoy diriyos.

Saray Tagleey 3:33

Ag to panliketan so pamasakit odino pamaermen tod sikatayo.

2 Samuel 14:14

Ompatey itayon amin; aliling tayoy danum a naibung ed dalin, ya ag la nakupkup. Anggan say Dios ag to la pabibilayen iray inatey a totoo, balet nayarian na ari a papawilen so toon nibantak ed arum a bansa.

Daniel 9:13

tan inter mod sikami iray amin a dusan nisulat ed Ganggan nen Moises. Balet anggad natan, O Katawan a Dios mi, ag mi ni gagawaen so pamaliket mid sika diad pangibeneg ed saray kasalanan mi odino pangonur ed katwaan mo.

Ezekiel 5:11

“Ontan sirin, legan a mabilay ak a Dios—sikato yay salita na Katawan a Dios—andi-panangasiy pangipolisay kod sikayo lapud dinotakan yoy Timplok diad panamegley na saray kaogsan tan makapaingungot a ginagawa to.

Saray Gawgawa 26:20

Nampupulong ak ya onona diad Damasco, insan diad Jerusalem tan diad intiron dalin na Judea, ontan met a diad saray Hintil. Impupulong kon nepeg day mampataulid saray kasalanan da tan ompawil irad Dios, tan ipanengneng day pampatauli ra diad panamegley na saray gawa.

Saray Bilang 14:21

Balet isipan ko a legan a mabilay ak tan legan a papanoen na kagalangan ko so mundo,

Isaias 49:18

Nengneng kad liber-liber ta imanom no antoy nagagawa! Mantitipon iray totoom—onsesempet la ra! No panon ya anggapoy duaruwa a siak so mabilay a Dios, ontan met a nikinon mo ray totoom; nikinon mo ran singa pangikinon na nubia ed saray alahas to.

Jeremias 46:18

Siak, a Katawan a Makapanyarin-amin, et ari. Siak so mabilay a Dios. Say biskeg na onsabin ondogpa ed sikayo et singa Palandey na Tabor ya atagey nen saray arum, tan singa Palandey na Carmelo a diad kinaatagey to et ososdungan toy dayat.

Jeremias 22:24

Inkuan na Katawan ed lakin anak nen Joakim a si Joakin ya ari na Juda, “Legan a siak so mabilay a Dios, ekalen ta ka anggaman a sika so singsing a panagtimbri diad gamet ko,

Saray Bilang 14:28

Natan ibagam ed sikara yan ebat: ‘Isipan ko a legan a mabilay ak, gawaen ko so kerew yo. Siak a Katawan so nansalita.

Sofonias 2:9

Legan a siak so mabilay a Katawan a Dios na Israel, sambaan ko a say Moab tan say Ammon et naderal iran singa say Sodoma tan say Gomorra. Magmaliw iran sakey a pasen ya abut na asin tan andi-anggaan a deral-deral tan atubo-tubuan na saray dika. Saray totook ya akapaliis ed patey et alaen day antokaman a kayamanan da tan kayaryanen day dalin da.”

Saray Taga Roma 14:11

Ta ibabagay Masanton Sulat, “Dapot mabilay ak, kuay Katawan, mantalimukor ed arap ko so amin a pueg tan balang dila mandayew ed Dios.”

Ezekiel 16:48

Say Katawan a Dios kuanto, “Andi-duaruwa a siak so mabilay a Dios; ontan met ya andi-duaruwa ya ag balut ginawa na agim a Sodoma tan saray bario to iray ginagawam tan saray bariom.

Say Libro nen Job 37:23

Ontan lay kabaleg na pakapanyari na Dios, kanyan ag itayo makaasingger ed sikato; matonung tan maptek so pipiolup tod katoowan.

Jeremias 3:12

Imbaga to nid siak ya onla ak a mangikuan ed Israel, “Aliwan matoor ya Israel, pawil kad siak. Lapud mapangasi ak, ag ta ka la pampasnukan; aliwan ando lan ando so petang na olok ed sika.

Jeremias 44:7

“Kanyan siak, say Katawan a Makapanyarin-amin a Dios na Israel, tetepeten kod sikayo natan no akin et gagawaen yod sikayon dili ira yan kaogsan. Labay yon onsabiy deral ed saray lalaki, bibii, saray anak tan saray ogogaw, pian anggapoy nakeraan ed sikayo?

Joel 2:12

“Balet anggan natan,” kuay Katawan! “masimoon kayon magbabawi tan pawil kayod siak a manaayuno, mannangnangis, tan maneermen kayo.

Saray Salmo 51:15

Tulongan mo ak pa a mansalita, O Katawan, et idayew ta ka.

Isaias 21:12

Ebat ko, “Onkakabwasan la, balet onsabi lamet so labi. No labay mo lamet so ontepet, pawil ka dian ontepet.”

Jeremias 44:8

Akin et pampapasnuken yo ak diad pangigagalang yod saray talintaoy diriyos tan diad pangibabagat yod saray arum a diriyos diad Egipto a nila yon panaayaman? Gagawaen yo ya a paneral ed sikayon dili, pian ludlureyen kayo na amin iray bansa diad tapew na dalin tan ikana ray ngaran yo a sakey a samba?