Ezekiel 23:32 - Maung A Balita Biblia

³² Say Katawan a Dios kuanto, “Oninom ka ed kupa nen atsim; baleg tan aralem so kupa to. Balawen tan lureyen ka na balang sakey;

Maung a Balita Biblia

³² Say Katawan a Dios kuanto, Oninom ka ed kupa nen atsim; baleg tan aralem so kupa to. Balawen tan lureyen ka na balang sakey;

Ezekiel 23:32 Referans Kwoze

Isaias 51:17

Jerusalem, liing ka! Molagat ka tan bangon ka! Inminom kad kupa na dusa a diad pasnuk na Katawan et inter tod sikan inomen mo; ininom mo, et nampadongilngil ed sika.

Saray Salmo 60:3

Impanirap mon mapalalo iray totoom; mandongilngil kamin singa abuek.

Puyan 18:6

Gawa yo met ed sikatoy ginawa tod sikayo; bales yo na mamidwad karakel so ginagawa to. Pano yoy kupa to na iinomen a mamidway kinabiskeg to ed samay impainom tod sikayo.

Puyan 16:19

Nankatlon apisag so makapanyarin siudad, tan nagnagba ray amin a siudad ed intiron mundo. Ag akaliktar ed dusay Dios so makapanyarin Babilonia. Anunotan na Dios so Babilonia, tan pinainom to na alak, say alak na ontan lan pasnuk to.

Mikias 7:8

Anggapoy makasengeg na panelekelek ed sikami na saray kalaban mi. Atumba kami, balet ombangon kami lamlamang. Wala kamid kabilongetan natan, balet itdan kami na Katawan na liwawa.

Ezekiel 36:3

“Mampropisiya ka, sirin, tan ibawag mo so ibabagak, siak a Katawan a Dios. Nen adakep tan asamsaman na saray kaliber-liber a bansa so kapalandeyan na Israel, niluludlurey na balang sakey a too so Israel.

Ezekiel 35:15

a singa samay impanliket mod inkaderal na Israel a kayaryan ko. Say kapalandeyan na Seir, on, say intiron dalin na Edom, magmaliw a begtebegtew. Diad satan naamtaan na amin a katoowan a siak so Katawan.”

Ezekiel 26:2

Inkuanto, “Sika a toon ompatey, dengel mo yay ibagak. Sikato yay pakaliliketan na saray totood siudad na Tiro. Iyeeyag da, ‘Aderal-deral so Jerusalem! Naandi la so pakayari to ed nigosio! Ag lan balut nayarin kakompitinsia!’

Ezekiel 25:6

“Sikato ya so ibabaga na Katawan a Dios: Nantitipak tan nanlulugtot kayod liket. Binabalaw yoy dalin na Israel.

Jeremias 48:26

Inkuan na Katawan, “Buek yo so Moab, ta linmaban ed siak. Pandokulan toy dilin ota to, tan elek-elekan na saray totoo.

Jeremias 25:9

‘Tawagen kon amin iray totood baybay tan say aripen kon Ari Nabucodonosor na Babilonia. Pibakalen ko ra sumpad sayan bansa tan amin a manaayam dia tan amin a kaliber-liber ton bansa. Deralen ko ya anggad angga yan bansa tan saray kaabay to, paolyan ko ran aderal-deral ya anggad angga, makapataktakot tan makapasinagem iran nengnengen.

Saray Salmo 79:3

Imbung dan singa danum so dala da ray totoom; say dala ra inmagos ed intiron Jerusalem, et anggapoy akeraan a mangipompod saray bangkay.

1 Saray Arari 9:7

paekalen ko ray totook ya Israelita ed dalin ya inter kod sikara. Ikaindan ko met yan pinasantok a Timplo a sikatoy pangigalangan ed siak; balawen tan melag-melagen met na saray totoo ed inerman a pasen so bansan Israel.

Deuteronomio 28:37

Diad saray bansan pangitayakan ed sikayo na Katawan, saray totood man et nikelawan ira ed agawad sikayo; ludlureyen tan balbalawen da kayo.

Saray Salmo 44:13

Sankanengneng na saray kakaabay mi so ginawam ed sikami, kanyan eelek-elekan tan luludlureyen da kami.

Ezekiel 5:14

Balawen tan arawian kayo na balang sakey ya ondalan a toon taga saray bansan walad kaliber-liber yo.

Ezekiel 5:15

“No ampetang so olok tan mapalaloy pasnuk kod sikayo tan dusaen ta kayo, nataktakot ya amin iray bansan walad kaliber-liber yo. Naingungotan iran onnengneng ed sikayo, tan ludlureyen da kayo.

Ezekiel 16:57

tan kasakbayan na inkiparontal na kaogsan mo? Natan nagmaliw kan singa sikato—sikay lelemlemewen na saray Edomita, saray Filisteo, tan saray arum a kakaabay mon mamobusol ed sika.

Oseas 7:16

Itutuloy day onsingger ed sakey a dios ya anggapoy pakayari. Ag ira napanmatalkan a singa pikewet a pana. Lapud mapaatagey ed panagsalita iray pangulo ra ompatey irad ispada. Diad ontan elekan ira na saray Egipsio.”