Gawaen ko ya, pian ontonda a mangikaindan ed siak iray Israelita tan tondaan day pandotak dad sikaran dili lapud saray kasalanan da. Sikara so nepeg a totook, tan siak so nepeg a Dios da.” Say Katawan a Dios so nansalita.
“Sika a toon ompatey,” kuanto, “no mankasalanan so sakey a bansa tan magmaliw ya aliwan matoor ed siak, dusaen ko tan deralen koy panlalapwan na tagano na saray totoo to. Mangipadalan ak na eras ed satan a bansa tan pateyen ko ray totoo tan saray ayayep to.
Ibabagay Katawan a Makapanyarin-amin, ‘Mangipadalan ak ed sikara na bakal, eras, tan salot, tan pagmaliwen ko ran singa saray bungay igos a diad mapalalon inkaboluk da, ag ira nayarin kanen.