Ezekiel 13:19 - Maung A Balita Biblia

¹⁹ Papabaingan yo ak ed arap na saray totook, pian makala kayo labat na sankaakup a sibada tan pigaran tinapay. Papateyen yo ray totoon ag da kanepegay ompatey, tan pansiasiansiaen yon mabilay iray totoon ag da kanepegay mambilay. Kanyan titilaan yo ray totook, et manisia rad sikayo.”

Maung a Balita Biblia

¹⁹ Papabaingan yo ak ed arap na saray totook, pian makala kayo labat na sankaakup a sibada tan pigaran tinapay. Papateyen yo ray totoon ag da kanepegay ompatey, tan pansiasiansiaen yon mabilay iray totoon ag da kanepegay mambilay. Kanyan titilaan yo ray totook, et manisia rad sikayo.

Ezekiel 13:19 Referans Kwoze

Mikias 3:5

Saray totook et apalikdo ra na saray propitan mangisisipan na kareenan ed saray mambabayar ed sikara, balet tataktakoten dad bakal iray ag mambabayar. Say Katawan kuantod sarayan klasiy propita,

Probirbio 28:21

Makapoy so panintinsia a walay kikilingan. Balet wala ray huis a manggaway makapoy lapud pangala ray anggan melmelag a pasoksok.

Ezekiel 22:26

Susumlangen na saray papari so ganggan ko tan dodotakan da so antokaman a masanto. Ag da pandodomaen so masanto tan say aliwan masanto. Ag da ibabangat so pandomaan na bengatlan malinis tan say aliwan malinis, tan anggapoy walad sikara so Agew na Panagpainawa. Lapud saya, ag ak papagalangan na saray totood Israel.

Ezekiel 20:39

Say Katawan a Dios kuanto, “Sikayo ran amin ya Israelita, no ag yo ak dengelen, ituloy yo labat lad tay panlilingkur yod saray talintaoy diriyos yo! Balet papasakbayan ta kayo a kayari to ya, nepeg yo ak ya onuren tan ag yo la pabaingan so masanton ngaran ko diad pambabagat yo na saray rigalo ed saray talintaoy diriyos yo.

Jeremias 23:17

Ibabaga ra lawas ed saray totoo ya ag ondedengel na saray salitak, a maung ya amin so pansumpalan da. Ibabaga rad balang sakey ya anawet so puso to ya ag balut nadiwit na deral.”

Jeremias 23:14

Balet lalon maoges so anengneng kon gagawaen na saray propitad Jerusalem: mikakaloguran ira tan mantitila ra; tutulongan dan manggawa na makapoy iray totoo, kanyan anggapoy ontondan manggaway kaogsan. Para say siak, singa ra Sodoma; say kaogsan da singa kaogsan na saray totood Gomorra.

Saray Taga Roma 16:18

Saratan a klasiy totoo et ag da panlilingkuray Criston Katawan tayo, no ag say dilin pilalek da. Lapud malamlamuyot tan masamsamit a pananalita ra, ibabalang da so kanunotan da ray totoon mainomay a natanggoyur.

Mikias 3:11

Manaawat na pasoksok ed panooley da iray pangulo na siudad, miuupa ray papari ed pangipapatalus day Ganggan, tan pababayaran iray propita ed pangipapaamta ra na saray puyan da. Et ibabaga ran amin a walad sikara so Katawan. “Anggapoy onsabin deral ed sikami,” kuanda. “Say Katawan et walad sikami.”

1 Pedro 5:2

pastolan yoy poluk da ray karniro na Dios ya impalima tod sikayo. Asikaso yon mabolbolus onung ed linaway Dios, aliwan diad pasootan. Gawa yoy kimey yo, aliwa labat a lapud pangawat yoy bayar, no ag ingen lapud liket yon manlingkur.

1 CORINTO 8:11

Kanyan sayan too a makapoy ed pananisia, say agi yon makasengeg na inateyan nen Cristo, nabalang lapud “pakaamta” yo!

Saray Taga Roma 14:15

No napasakitan moy agim lapud bengatlan kanen mo, sumlang lad panangaro so gagawaen mo. Inatey para agim si Cristo, kanyan nepeg ya ag mo dederaley agim lapud bengatlan kanen mo!

Malakias 1:10

Say Katawan a Makapanyarin-amin kuanto, “Oy la komun, ta sakey ed sikayo so mangisarad saray kaput na Timplo, pian anggapod sikayoy manelsel na andi-kakanaan ya apoy ed altar ko. Ag ak makaliliket ed sikayo; ag ko awaten iray bagat ya iyaakar yod siak.

Ezekiel 13:22

“Diad panamegley na saray panagtila yo pabebetelen yoy linawa da ray maung a totoon ag ko labay a pasakitan. Sesebelan yo ray totoo ed pangibeneg dad saray kaogsan da tan pangilaban dad bilay da.

Probirbio 19:27

Anak ko, no tondaan moy manaral, nalingwanan mo la ray inaral mo.

1 Samuel 9:7

Tinepet nen Saul, “No onla tad sikato, antoy niiter tad sikato? Anggapo lay atilak a nakan ed pananginan ta, tan anggapoy antokaman a nayarin iter ta. Akin wala?”

Isaias 56:11

Singa ra masisiban aso ya ag balut napepesel. Anggapoy pakatalus da ra yan pangulo. Gagawaen na balang sakey ed sikara so labay to tan say dilin pankaabigan to so aanapen to.

Ezekiel 13:20

Natan sikato ya so ibabagay Katawan a Dios: “Kabosul ko ra tay abel ya ibeberber yo ed ngalngalowan ya ikakana yon panooley yo ed bilay tan patey. Bingkasen ko ran ekalen ed saray taklay yo tan ibolus ko ray totoon ooleyan yo.

Ezekiel 22:25

Saray pangulo et singa ra saray lion a mangwam diad impakapatey da na saray ayayep. Papateyen da ray totoo, aalaen da ray amin a naala ran kuarta tan kayaryan tan lapud saray panagpatey da, amayamay iray abalo.

Probirbio 17:15

Makapaingungot ed Katawan so panusa ed toon anggapoy kasalanan tan say pangibolus ed toon maoges.

Isaias 5:20

Pakaskasi kayo la! Ibabaga yo a maoges so maung tan maung so maoges. Pagmamaliwen yo a kabilongetan so liwawa tan say liwawa so kabilongetan. Gagawaen yon ampait so masamit tan masamit so ampait.

Ezekiel 22:27

Saray pangulo na gobirno et singa ra saray asod katakelan a mambibingkas na pinatey dan ayayep. Mampapatey ira na totoo, pian onyaman ira.