Ezekiel 11:12 - Maung A Balita Biblia

¹² Nakabatan yo a siak so Katawan, ta diad pangoonur yod saray ganggan na saray kaabay yon bansa, susumlangen yo ray ganggan tan saray bilin ko.”

Maung a Balita Biblia

¹² Nakabatan yo a siak so Katawan, ta diad pangoonur yod saray ganggan na saray kaabay yon bansa, susumlangen yo ray ganggan tan saray bilin ko.

Ezekiel 11:12 Referans Kwoze

Ezekiel 8:10

Kanyan linmoob ak tan ninmengneng ak. Nipintad padir iray oleg tan saray arum a marotak ya ayayep onung ed ganggan; nipinta met iray arum a bengatlan gagalangen na saray Israelita.

Ezekiel 8:16

Kanyan inyakar to ak ed pation walad dalem na Timplo. Diman ed abay na lolooban ed santuario, diad nanleetan na altar tan say balkon, wala ray duamplo tan liman lalaki. Imbeneg day santuario tan ondadakmomo ran akaarap ed bokig a mangigagalang irad agew ya ombubutay.

Ezekiel 8:14

Kanyan inyakar to ak ed puirtad baybay na Timplo tan impanengneng tod siak iray bibiin aakisan day impatey na dios a Tamuz.

Daniel 9:10

Ag kami dinmengel ed sika, O Katawan a Dios mi, nen imbagam a mambilay kami onung ed saray ganggan ya inter mod sikami diad panamegley na saray aripen mon propita.

Ezekiel 20:24

Ginawak iman ta impolisay da ray bilin ko, sinumlang da ray ganggan ko, ag da nginilinan so Agew na Panagpainawa, tan angigalang irad saray talintaoy diriyos a nanlilingkuran na saray lalaki ra.

Ezekiel 20:21

“Balet sinumlang ak met na saman a kailalakan. Sinumpa da ray bilin ko tan ag da inonur iray ganggan ko a mangiter na bilay ed saray mangonur. Ag da nginilinan so Agew na Panagpainawa. Akaparaan ak lad saman a mangidapod sikarad man ed kalawakan na pasnuk ko tan maneral ed sikara.

Ezekiel 20:16

Insambak iman a gawaen ta sinumlang da ray bilin ko, impolisay da ray ganggan ko, tan ag da nginilinan so Agew na Panagpainawa—nilabay da ni so angigalang ed saray talintaoy diriyos da.

Ezekiel 18:9

Oonuren to ray ganggan ko tan aapigeren ton sumpalen iray bangat ko. Sayan too so tuan matonung, et sikatoy mambilay,” kuay Katawan a Dios.

Ezekiel 11:21

Balet dusaen ko ray totoon maliket a mangigalang ed saray marotak tan makapaingungot a talintao. Dusaen ko ra lapud saray ginagawa ra.” Say Katawan a Dios so nansalita.

Jeremias 10:2

Kuanto, “Ag yo aaligen so kabibilay na saray totoo ed arum a bansa, tan ag kayo nagugunigon ed saray tanda a nanengneng yo ed tawen, anggaman a natatakot iray taga arum a bansa.

Jeremias 6:16

Inkuan na Katawan ed saray totoo to, “Manalagey kayod nansasangaan na dalan, tan nengneng kayo; tepet yo no iner so kawalaan da ray dagdaan a dalan tan no iner so kawalaay sankamaungan a dalan. Dalan kayod saya, et nagamuran yoy kareenan.” Balet inkuanda, “Ag kami ondalan ed satan!”

Saray Salmo 78:10

Ag da tinoor so impisipanan dad Dios; ag da tinoluk so ganggan to.

Nehemias 9:34

Saray lalaki mi, saray arari mi, saray pangulo mi, tan saray papari mi, et ag da inonur so Ganggan mo. Ag da dinengel iray ganggan mo tan saray pasakbay mo.

Esdras 9:7

Nanlapu lad panaon na saray lalaki mi ya anggad natan, ontan la so impankakasalanan da ray totoom. Lapud saray kasalanan mi, sikami, saray arari mi tan saray papari mi et naplag kamid lima da ray ararid arum a bansa, tan pinapatey, tinatakewan, tan inyaakar da kami ed arum a bansa. Asigsigput kamin naplag ed kababaingan a singa kipapasen mi nin anggad natan.

2 Saray Awaran 36:14

Ontan met, saray pangulo na Juda, saray papari, tan saray karaklan et ag da tinoor so Dios, ta inalig da ray kaogsan da ray bansan walad kaliber-liber da diad impangigalang dad saray talintaoy diriyos. Diad onya, dinotakan day Timplo a pinasanto na Katawan.

2 Saray Awaran 28:3

nampopool na insinso ed Patar na Hinom; tan insaklang ton bagat a popoolan ed saray talintaoy diriyos so anggan saray dilin anak ton lalaki, ta inalig toy makapaingungot a kaogaliyan na saray totoon pinataynan na Katawan legan a mankukurang iray Israelita.

2 Saray Awaran 13:9

Pinapataynan yo ray papari na Katawan a kabyangan iray boleg nen Aaron; pinapataynan yo met iray Levita. Insan anoro kayo na saray papari a singa gagawaen na saray arum a bansa. Siopamay ondagon sankaawit toy bakan kalakyan odino pitoran karniro et nayari lan magmaliw a pari na saray tatawagen yon diriyos yo!

2 Saray Arari 21:22

Impolisay toy Katawan, say Dios na saray lalaki to, tan ag to inonur iray ganggan na Katawan.

2 Saray Arari 21:2

Nanggagawa na kaogsan ed arap na Katawan, ta inalig to ray makapaingungot ya ogali da ray pinapataynan na Katawan legan a mankukurang iray totoo to.

2 Saray Arari 18:12

Ataloy Samaria, ta ag inonur na saray totood Israel so Katawan a Dios da; ag da sinumpal so impisipanan tod sikara. Ag da tinoluk ya amin iray ganggan ya inter nen Moises ya aripen na Katawan. Ag ira dinmengel odino tinmoluk.

2 Saray Arari 16:3

ta inalig to ray ginagawa na saray ararid Israel. Insaklang ton bagat a popoolan ed saray talintaoy diriyos so anggan say dilin anak ton laki, ta inalig toy makapaingungot a kaogaliyan na saray totoon pinataynan na Katawan legan a mankukurang iray Israelita.

1 Saray Arari 11:33

Gawaen ko ya, ta impolisay ak nen Solomon tan angigalang ed Astarte a diosa na Sidon, Cemos a dios na Moab, tan Milcom a dios na Ammon. Ag ak inonur nen Solomon; ag to inalig si ama ton David a nanggaway katonungan tan angonur ed saray ganggan tan saray bilin kod sikato.

Levitico 26:40

“Balet saray kabyangay boleg yo ipatua da ray kasalanan da tan saray kasalanan da ray lalaki ra ya anumlang tan linmaban ed siak,

Levitico 18:3

Ag yo aaligen iray kagagawa na saray Egipsio a nanayaman yo nen saman, odino saray kagagawa da ray taga dalin na Canaan a pangyaakaran kod sikayo natan.

Ezekiel 18:8

Ag to ipapaabang so kuarta to. Ag to labay so manggawa na antokaman a kaogsan tan diad antokaman a kolkolan say katonungan so ipapasumpal to.

2 Saray Arari 21:9

Balet ag inonur na saray totood Juda so Katawan, tan inlagyat nen Manases iran nankasalanan na ambelat ni nen saray kasalanan a ginagawa da ray totoon pinapataynan na Katawan legan a mankukurang iray totoo to.

Nehemias 9:33

Maptek so ginawam diad impanusam ed sikami; matoor ka lawas, anggaman a nankasalanan kami.

Ezekiel 5:6

Balet sinumpa na Jerusalem iray ganggan ko tan impanengneng to a lalon maoges ni nen saray arum a bansa, lalon aliwan maonur nen saray bansan walad kaliber-liber to. Impolisay to ray ganggan ko tan ag to binirbir iray bilin ko.