Exodo 34:18 - Maung A Balita Biblia

¹⁸ “Silibraan yoy Pista na Tinapay ya Anggapoy Libadura. Onung na ingganggan kod sikayo, mangan kayo na tinapay ya anggapoy libadura ed loob na pitoran agew no bulan na Abib, ta saman imay bulan ya impanaynan yod Egipto.

Maung a Balita Biblia

¹⁸ Silibraan yoy Pista na Tinapay ya Anggapoy Libadura. Onung na ingganggan kod sikayo, mangan kayo na tinapay ya anggapoy libadura ed loob na pitoran agew no bulan na Abib, ta saman imay bulan ya impanaynan yod Egipto.

Exodo 34:18 Referans Kwoze

Levitico 23:6

Diad kumalabinliman agew say Pista na Tinapay ya Anggapoy Libadura et onggapo, tan diad loob na pitoy agew nepeg ya anggapoy libaduran tinapay so kanen yo.

Exodo 13:4

Diad sayan agew ed ononan bulan, say bulan na Abib, ontataynan kayo a manlapud Egipto.

Saray Gawgawa 12:3

Nen anengneng ton labalabay na saray Judio yan ginawa to, insoblay ton impaerel si Pedro. (Agawa ya nen Pistay Tinapay ya Anggapoy Libadura.)

Lucas 22:1

Manasingger lay Pista na Tinapay ya Anggapoy Libadura, a tatawagey Paskua.

Marcos 14:1

Duay agew labat la natan kasakbayan na Pista na Paskua tan pista na Tinapay ya Anggapoy Libadura. Saray manonan papari tan saray iskriba manaanap iray pankanawnawan mangerel a maamut ed kinen Jesus, insan da pateyen.

Exodo 23:15

Diad bulan na Abib, say bulan ya intaynan yod Egipto, silibraan yo so Pista na Tinapay ya Anggapoy Libadura onung na ingganggan kod sikayo. Ag kayo mamangan na tinapay a pinaalsa ed libadura legan na pitoran agew na sayan pista. Ag kayo ondadagon mangigalang ed siak ya anggapoy awit yon bagat.

Exodo 12:2

“Sayan bulan et ononan bulan na taon para sikayo.

Exodo 12:42

Sikato yay labin tinalaranan na Katawan a pangipaway tod saray Israelita ed Egipto; sayan labi et nisaklang ya anggad angga ed Katawan tan sakey a labin talaranan na saray Israelita.

Saray Bilang 28:16

Say Pista na Paskua a pamagalang ed Katawan et gawaen ed kumalabinapat agew na ononan bulan.

Saray Bilang 28:17

Diad kumalabinliman agew onggapo so pitoran agew a pista tan legan to ya say tinapay ya anggapoy libadura labat so nayarin kanen.

Exodo 13:3

Si Moises kuantod saray totoo, “Tandaan yo yan agew—say agew ya intaynan yon manlapud dalin na Egipto a dimay inkaaripenan yo. Diad sayan agew say Katawan impaway to kayo diad panamegley na baleg a pakayari to. Ag nepeg a kanen ed sayan agew so tinapay a pinaalsad libadura.

Exodo 23:14

“Diad loob na sakey taon mamitlo kayon mampista a pamagalang ed siak.