Deuteronomio 32:39 - Maung A Balita Biblia

³⁹ “‘Siak, tan siak labat, so Dios; anggapo lay arum. Mamatey ak tan mangiter ak na bilay, manugat ak tan mamaabig ak, tan anggapoy makasumlang ed antokaman a gawaen ko.

Maung a Balita Biblia

³⁹ Siak, tan siak labat, so Dios; anggapo lay arum. Mamatey ak tan mangiter ak na bilay, manugat ak tan mamaabig ak, tan anggapoy makasumlang ed antokaman a gawaen ko.

Deuteronomio 32:39 Referans Kwoze

1 Samuel 2:6

Say Katawan mamatey tan mamabilay; ibaki tod pasen a panaayaman da ray inaatey iray totoo, tan agwaten to ra.

Oseas 6:1

Saray totoo kuanda, “Ompawil itayod Katawan! Binibingkas to itayo, balet andi-saew a paabigen to itayo; sinusugat to itayo balet andi-saew a berberen to ray sugasugat tayo.

Say Libro nen Job 5:18

Beberberen na Dios iray sinusugat to; mamapasakit tan mamapaabig ed sika iray lima to.

Isaias 45:5

“Siak so Katawan; anggapo lay arum a Dios. Itdan ta kay biskeg a nakaukolan mo, anggaman ya ag mo ak kabat.

Isaias 45:22

“Pawil kayod siak natan, et nilaban kayo, amin yon totoo ed intiron mundo! Siak labat so Dios, anggapo lay arum.

Isaias 43:13

Siak so Dios tan Siak si Siak. Anggapoy makapaliis ed pakayarik; anggapoy makaoman ed antokaman a gagawaen ko.”

Isaias 46:4

Siak so Dios yo tan asikasoen ta kayo anggad ontakken kayo tan ompoti lay buek yo. Ginawa ta kayo tan asikasoen ta kayo; tulongan tan iyagel ta kayo.

Isaias 45:18

Say Katawan pinalsa toy katawenan— sikato so Dios! Tinibokel tan ginawa toy mundo— ginawa ton malet tan mansiansia lawas. Ag to ginawan anggapoy kabaliksan to, no ag ingen ginawa ton pasen a panayaman na saray totoo. Sikato so angikuan, “Siak so Katawan, tan anggapo lay arum.

Saray Salmo 68:20

Say Dios tayo et Dios a manangilaban; sikato so Katawan, say Katawan tayo, a mangipapaliis ed sikatayod patey.

Isaias 41:4

Siopay angyabuloy ya onyay nagawa? Siopay angigetar na amin ya agawgawa ed imbeneg? Siak a Katawan a wala la ed gapoy gapo, tan siak a Katawan so niwala ed kasamputan.

Saray Salmo 50:22

“Dengel yo ya, sikayon ag mangasasikasod siak, ta no andi, bingbingkasen ta kayo, et anggapoy mangyagel ed sikayo.

Deuteronomio 4:35

Say Katawan impapanengneng to ra man ed sikayo, pian napaneknekan tod sikayo a bukbukor to so Dios tan anggapo lay arum.

2 Saray Arari 5:7

Kapambasa na ari na Israel ed samay sulat, pinilat toy kawes to a pangipanengneng toy inkagunigon to tan inkuanto, “Panoy panilalo na ari ed Siria a napaabig ko yan too? Dios ak sirin a walay pakayarid bilay tan patey? Mapatnag a labay toy mikolkol ed siak!”

Saray Salmo 102:27

Balet ag kan balut mangoman, tan ag mangangga so bilay mo.

Say Libro nen Job 10:7

Amtam ya anggapoy kasalanan ko, tan anggapoy makapangyagel ed siak ed sika.

Puyan 2:8

“Isulat mod anghil na iglisia ed Esmirna: “Sikato yay ibabaga to may sankaonaan tan say sankasamputan, say inatey tan inmolid bilay.

Mikias 5:8

Saray atilak ed saray bansa et magmaliw iran singa lion a manaanap ed takel odino diad pastolan na kanen to; onlad kawalaan da ray karniro, tekmelan to ra, tan bingbingkasen to ra—et anggapoy makapangyagel.

Isaias 48:12

Say Katawan kuanto, “Dengel kad siak, Israel, saray totoon pinilik! Siak si Siak, say sankaonaan, tan say sankaonuran!

Juan 8:24

Kanyan imbagak ed sikayon ompatey kayod saray kasalanan yo. Talagan ompatey kayod saray kasalanan yo no ag yo sisiaen a ‘Siak si Siak’.”

Saray Hebreo 1:12

Topien mo ran singa kolibemben, tan singa ra kawes a nasalatan, Balet ag kan balut mangoman, tan ag mangangga so bilay mo.”

Puyan 1:11

Inkuanto, “Isulat moy nanenengneng mo, tan ipawit mo ed saray pitoran iglisia a walad Efeso, Esmirna, Pergamo, Tiatira, Sardis, Filadelfia, tan Laodicea.”

Exodo 4:7

Inkuan na Katawan lamet ed sikato, “Isoksok moy limam ed dalem na kawes mo.” Insoksok toy lima to, et nen inoyus to malinis lamet a singa arum a parti na laman to.

Exodo 15:26

Inkuanto, “No sigput so pangonur yod siak a Katawan a Dios yo, tan gawaen yoy antokaman ya ipapasen kon matonung tan sumpalen yo ray ganggan ko, ag ta kayo dusaen na saray salot ya impadalan kod saray Egipsio. Siak so Katawan a mamapaabig ed sikayo.”

Deuteronomio 32:12

Say Katawan a bukor so angiwanwan ed saray totoo to ya anggapoy tinmulong a dios na arum a bansa.

Saray Salmo 18:31

Bukbukor na Katawan so Dios; say Dios labat so manangyagel tayo.

Saray Salmo 51:8

Parengel mo ak pa na saray tanul na liket tan gayaga; et anggan ontan lay impamairap tan impanusam ed siak, manliket ak ni lamet.

Saray Salmo 86:10

Sikay makapanyari tan manggagawa ka ray pakelaw; bukor mo so Dios.

Isaias 19:22

Dusaen na Katawan iray Egipsio, insan to ra balet paabigen. Ompawil irad sikato, dengelen to ray pikakasi ra tan paabigen to ra.

Isaias 30:26

Say bulan magmaliw a maliwawan singa agew, tan say agew magmaliw a mamimpitoy kinaliwawa to, a singa kinaliwaway pitoran agew a nankakasakey. Nagawa ra yan amin no berberen tan paabigen na Katawan iray sinusugat tod saray totoo to.

Isaias 43:10

“Totood Israel, sikayo ray tasik; pinili ta kayon aripen ko, pian nakabatan yo ak tan manisia kayo ed siak tan natalusan yo a Siak si Siak. Likud ed siak anggapo lay arum a dios nen saman, natan, tan anggan kapigan.

Ezekiel 37:3

Inkuantod siak, “Sika a toon ompatey, nabilay ni kasi ra yan pokel?” Inmebat ak, “Katawan a Dios, sika labat so makaebat ed satan a tepet mo!”

Ezekiel 37:12

Kanyan mampropisiya kad saray totook ya Israelita, ta ibagam ed sikara a siak a Katawan a Dios et lokasan ko ray lobuk da. Ipaway ko ra, insan ko ra ipawil ed dalin na Israel.

Deuteronomio 7:9

Ag yo lilingwanan a say Katawan a Dios yo et bukor toy Dios tan sikatoy matoor. Tooren toy impisipanan to tan ag mangoman so panangaro tod saray nilibon kailalakan na saray mangarod sikato tan saray matoluk ed saray ganggan to,

2 Saray Arari 20:5

ya ompawil ed kinen Ezekias, say manoley na totoo na Katawan, ta ikuantod sikato, “Say Katawan kuantod sika: Siak, say Katawan a Dios na lakim a David, et nadngel koy pikakasim tan anengneng koy interter na luam. Paabigen ta ka, tan diad kumatlon agew onla kad Timplo.

Nehemias 9:6

Insan saray totood Israel nampikasi ra na onya: “Sika, Katawan, sika labat so Katawan; pinalsam iray katawenan tan saray bitewen ed tawen. Pinalsam so dalin tan say dayat tan amin a logan da; initdan moy bilay iray amin a bengatla. Ondadakmomo tan mangigagalang ed sika iray mangatatawen a pakayari.

Say Libro nen Job 10:13

Balet amtak la natan a nanlapud saman wala lay maamut a getmam a mamasakit ed siak.

Saray Salmo 102:28

Mambilay ya arawid kaatapan iray anak mi, tan diad silong na panangyagel mo mambilay ya ag nasigensigen iray kabyangay boleg da.

Ecclesiastes 3:3

Say panaon na pampatey tay say panaon na pampaabig, say panaon na pangigeba tan say panaon na pamaalagey.

Isaias 43:12

Impasakbay koy nagawa, insan inlaban ta kayo. Anggapoy dios na arum a bansa a nanggawad saya; sikayo ray tasik.

Oseas 5:14

Ondogpa ak a singa lion ed Israel tan diad Juda. Siak a dili so mambingbingkas ed sikara, insan ko ra taynan. No igayugoy ko ra, anggapoy makapangilaban ed sikara.