2 Timoteo 2:21 - Maung A Balita Biblia

²¹ Siopamay onaarawid kaogsan nikana para nidoma-doma ran getma, ta sikatoy nigana tan makana-kanad Katawan. Sikatoy sipaparaan a nikanad amin a maung iran gawgawa.

Maung a Balita Biblia

²¹ Siopamay onaarawid kaogsan nikana para nidoma-doma ran getma, ta sikatoy nigana tan makana-kanad Katawan. Sikatoy sipaparaan a nikanad amin a maung iran gawgawa.

2 Timoteo 2:21 Referans Kwoze

2 Timoteo 3:17

pian say toon manlingkur ed Dios et magmaliw a manepenepeg tan sipaparaan a manggaway amin a kamaungan.

TAGA-EFESO 2:10

Say Dios so Manamalsa tayo, tan diad pikakasakey tid Cristo Jesus pinalsa to itayo a manggaway maung iran gawa a say Dios imparaan to la ran sumpalen tayo.

2 CORINTO 7:1

Nisipan ira yan amin ed sikatayo, inararon agagi. Linisan tayo sirin so laman tan ispiritu tayo ed amin a makarotak. Pampelengan ti siriy magmaliw a nagnap ed kinasanto, diad panamegley na pambilay a walay panamagalang tayo ed Dios.

1 Pedro 1:22

Natan ta alinisan yo lay sikayon dili lapud itotoluk yod katwaan, tan diad ontan et wala lad sikayoy puron panangaro ed saray agagi yod pananisia, papetang tan manlapud otel na puso yoy panaarowan yo.

Saray Salmo 119:9

Panon a napansiansia na tobun-balo so bilay ton malinis? Diad panamegley na pangonur tod saray ganggan mo.

1 Juan 3:3

Balang sakey a wala yan ilalo tod Cristo linisan toy panagbilay to, a singa si Cristo et malinis.

2 Timoteo 2:20

Diad abung a baleg, aliwan amin ya ikakana et balituk tan pilak. Wala met iray kiew tan dalin. Saray arum nikakana no walay nidoma-doman okasion; saray arum nikakana ya inagew-agew.

Isaias 52:11

Ag yo sasaewen a taynan so Babilonia, amin yon umaawit na saray kagawaan na Timplo. Ag yo didiwiten so antokaman a marotak onung ed ganggan; pansiansia yon masanto so sikayon dili tan taynan kayo.

Tito 3:8

Sikato yay tuan bangat. Ipurek mo ra yan bengatla, pian saray mananisiad Dios et ompaga ran manggaway kamaungan. Maabig tan makana ra ya ed saray totoo.

Saray Gawgawa 9:15

Balet inkuan na Katawan ed sikato, “Laka la, ta sikatoy pinilik a manlingkur ed siak. Sikatoy mangipaamtay ngaran ko ed saray Hintil, saray arari, tan saray totood Israel.

Jeremias 15:19

Say Katawan inmebat, “No ompawil ka, awaten ta ka, tan magmaliw kan aripen ko lamet. No mansalita kay makana-kana, aliwan say andi-kakanaan, magmaliw kan propitak lamet. Ompawil ed sika iray totoo, tan ag nakaukolan ya onla kad sikara.

1 Pedro 1:7

Say balituk a naderal, iparalad apoy pian naamtaan no tuan puro. Ontan met, say pananisia yo a maung nen say balituk, nasubok pian naamtaan no tuan malet. Diad ontan napagalangan, nadayew, tan nitanduro kayo no Agew a nipanengneng si Jesu-Cristo.

1 CORINTO 5:7

Nepeg yon ekaley daan a libadura, say kasalanan, pian magmaliw kayon petepeteg a malinis. Diad ontan mipara kayod balon masa ya anggapoy libadura, ta talagan ontan kayo. Ta nibagat lay Cristo a Kordiro tayon onkanad Paskua.

Malakias 3:3

Sikatoy onsabi a manintinsia a singa toon mamasileng tan malinis ed pilak. No panoy pamapasileng na platiro ed pilak tan balituk, ontan met so panlilinis na Katawan ed saray papari, pian mangyakar irad Katawan na manepeg iran bagat.

Tito 3:14

Ibangat mo ray kakaiba tayo ya ikana ray panaon da ed panggaway maabig tan pangiter day talagan nakaukolan. Ag da komun dadarakey bilay da.

Tito 3:1

Ipanunot mod saray totoom a paoleyan irad saray manoley tan saray walay betang, onuren da ra, tan sipaparaan iran manggaway kamaungan.

Isaias 1:25

Walay gawaen ko sumpad sikayo. Linisan ta kayon singa panagpalba ed mital, tan ekalen koy amin a dotak yo.

2 CORINTO 9:8

Say Dios nayarian to kayon itday masolusoluk nen say nakaukolan yo, pian wala lawas so onkanad sikayo tan wala niy nayarian yon iter ya onkanad amin a maung a pamaakaran.

1 Timoteo 6:11

Balet sikan tooy Dios, paliisan mo ra yan amin. Seetan mon tombukey katonungan, kasantosan, pananisia, panangaro, panaganos, tan kinaoyamo.

2 Timoteo 2:16

Arawian moy aliwan diniriyos tan andi-kakanaan iran sangsangan, ta paarawien da labat ed Dios iray totoo.

2 Timoteo 4:11

Si Lucas labat lay kaibak dia. Laen moy Marcos tan itagar mo dia, ta dakel so nayarian ton itulong ed kimey ko.