1 Saray Arari 13:7 - Maung A Balita Biblia

⁷ Insan inkuan na ari ed samay propita, “Mila kad siak ed abung, ta pakanen ta ka. Itdan ta ka met na tumang mod ginawam.”

Maung a Balita Biblia

⁷ Insan inkuan na ari ed samay propita, Mila kad siak ed abung, ta pakanen ta ka. Itdan ta ka met na tumang mod ginawam.

1 Saray Arari 13:7 Referans Kwoze

2 Saray Arari 5:15

Kaiba ton amin iray totoo to nen pinmawil ed kinen Eliseo tan kuanto, “Amtak la natan ya anggapo lay arum a dios no ag say Dios na Israel, kanyan awat mo pa labat yay awit kon rigalod sika.”

1 Pedro 5:2

pastolan yoy poluk da ray karniro na Dios ya impalima tod sikayo. Asikaso yon mabolbolus onung ed linaway Dios, aliwan diad pasootan. Gawa yoy kimey yo, aliwa labat a lapud pangawat yoy bayar, no ag ingen lapud liket yon manlingkur.

Malakias 1:10

Say Katawan a Makapanyarin-amin kuanto, “Oy la komun, ta sakey ed sikayo so mangisarad saray kaput na Timplo, pian anggapod sikayoy manelsel na andi-kakanaan ya apoy ed altar ko. Ag ak makaliliket ed sikayo; ag ko awaten iray bagat ya iyaakar yod siak.

Jeremias 40:5

Nen ag ak onebat, inkuanen Nebuzaradan ed siak, “Pawil kad kinen Gedalias, a lakin anak nen Ahicam tan apo nen Safan, a sikatoy impagmaliw na ari na Babilonia a gobirnador na saray baley na Juda. Nayarian moy manayam ed sikato a kalimug mo ray totood man, odino onla ka ed inerman a pasen a labay mo.” Initdan to ak na rigalo tan say nakan ya awiten ko, insan to ak la pinasiput.

Saray Huis 19:21

Kanyan intagar to rad abung to tan pinakan to ra may asno ra. Inorasan na saramay sangkaili so kasaliyan da, insan ira nandem.

Saray Huis 13:15

Diad ag pikakabat nen Manoa ya anghil na Katawan so katongtong to, inkuantod sikato, “Ag ka ni onaalis. Ilutoan mi ka ni na kilaw na kanding.” Balet inkuan na samay anghil, “No ag ak ni ontaynan, ag ko kanen lamlamang so iparaan mon kanen. Balet no labay moy mamparaan, isaklang mo lan bagat a popoolan ed Katawan.”

Genesis 18:5

Mangala ak met na kanen yo, pian naitdan kayoy biskeg a mangituloy na panaakar yo. Pinagalangan yo ak ed inyakar yo dia, kanyan abuloyan yo ak a manlingkur ed sikayo.” Inmebat ira, “Salamat; sigi sirin.”

1 Saray Arari 14:3

Iyawitan mo na samploran tinapay, pigaran kanen, tan sakey a garapon a dilo. Tepet mo no antoy nagawad ogaw, et ibaga tod sika.”