1 Samuel 6:17 - Maung A Balita Biblia

¹⁷ Impawit na saray Filisteo so limaran pelsan balituk a rigalo rad Katawan a pambayar dad saray kasalanan da; sakey so para siudad na Asdod; sakey so para siudad na Gaza, sakey so para siudad na Ascalon, sakey so para siudad na Gat, tan sakey so para siudad na Ecron.

Maung a Balita Biblia

¹⁷ Impawit na saray Filisteo so limaran pelsan balituk a rigalo rad Katawan a pambayar dad saray kasalanan da; sakey so para siudad na Asdod; sakey so para siudad na Gaza, sakey so para siudad na Ascalon, sakey so para siudad na Gat, tan sakey so para siudad na Ecron.

1 Samuel 6:17 Referans Kwoze

2 Samuel 1:20

Ag yo ya ibabalita ed Gat odino diad saray dalan na Askelon. Ag yo panliliketen iray bibiin taga Filistia; ag yo panggagayagaen iray bibiin anak na saray pagano.

Amos 6:2

Laka yo ta nengneng yoy siudad na Calne. Insan kayo onlad matalonan siudad na Hamat tan mampalosur kayod Filistia diad siudad na Gat. Natalonaan da kasid kaabigan iray nanarian na Juda tan Israel? Walay dalin a maawang nen say dalin yo?

2 Saray Awaran 26:6

Akibakal si Uzias ed saray Filisteo. Inggeba to ray padir na saray siudad na Gat, Jabnia, tan Asdod, tan nampapaalagey na saray aliber na padir a siudad diad asingger ed Asdod tan saray arum a pasen ed Filistia.

2 Saray Arari 1:2

Aminsan ya agew si Ari Ahazias na Israel apattak a nanlapud balkon na toktok na palasio to ed Samaria tan mapalaloy inkasakitan to. Angibaki sirin na saray mangipanon ed Baalzebub a dios na siudad na Ekron ed Filistia, ta amtaen da no kasi onabig ni odino andi la.

2 Samuel 21:22

Sarayan apat a pinatey nen David tan saray totoo to, et kabyangan ira na boleg na saray alan ed Gat.

1 Samuel 6:4

“Antoy ipila min rigalo?” tepet da ray arari. Inmebat ira, “Limaran pelsan balituk tan limaran otut a balituk, ta limaray pangulo na Filistia. Namparan salot so sinmabid sikayon amin tan saray limaran arariy Filistia.

1 Samuel 5:10

Kanyan impaiyakar day Kaban na Sipanan ed siudad na Ecron. Kasabi tod man, ineyag na saray totoo, “Inyakar da diay Kaban na Sipanan na Dios na Israel a mamatey ed sikatayon amin!”

1 Samuel 5:8

Angibaki ra sirin na manawag ed amin da ray limaran arari na saray Filisteo! Nen atipon la ran lima, tinepet dad sikara, “Antoy gawaen tayo ed Kaban na Sipanan na Dios na Israel?” Inmebat ira, “Iyakar yod Gat.” Kanyan inyakar dad Gat, sakey a siudad ed Filistia.

1 Samuel 5:1

Kayarin asamsam na saray Filisteo so Kaban na Sipanan na Dios, manlapud Ebenezer inyakar dad siudad dan Asdod.

Saray Huis 16:21

Dinakep na saray Filisteo si Samson tan sinokit da ray mata to. Inyakar da ed Gaza, ginolunggolungan da na gansa, insan da impankimey ed gilingan diad dalem na prisowan.

Saray Huis 16:1

Aminsan ya agew linmay Samson ed Gaza a siudad na Filistia. Akabat tod man so sakey a marotak a bii tan akiakdulan to.

Saray Huis 1:18

Tinulongan na KATAWAN iray totoo nen Juda, kanyan asakup da ray kapokdulan a dalin. Balet ag da alooban iray Gaza, Ascalon, tan Ecron, pati saray kaliber-liber dan pasen. Sarayan totoon manaayam ed gilig na dayat et wala ray balatyang a karwahi ra, kanyan ag ira apataynan na saray totood Juda.

Levitico 5:7

No say sakey a too et ag to nayarian so mangibagat na kordiro odino kanding lapud irap na bilay to, mangyakar ed Katawan na duaran palekpek odino duaran malangwer a malapati a pinagkabayar na kasalanan to; say sakey ibagat para kasalanan tan say sakey isaklang a bagat a popoolan.

Deuteronomio 28:27

Say Katawan paletawen toy pelsa ed laman yo, a singa samay ginawa tod saray Egipsio. Nagiri so intiron laman yo. Napanoy kegang so laman yo, onggatel ya amiy baog yo, balet ag kayo onabig.

Amos 1:6

Say Katawan kuanto, “Nankakasalanan iray taga Gaza, kanyan andi-saew a dusaen ko ra. Inaala da ray amin a totood saman a bansa, insan da ra inlalakon aripen ed saray taga Edom.

Saray Huis 14:19

Kabebekta pinabiskeg na ispiritu na Katawan si Samson, et linmad Askelon a dimay amateyan toy talomplon lalaki tan inaala to ray kawes da, insan to ra inter ed saramay akaebat na pabitla to. Kayari to, sinmempet a mapalaloy petang na olo to lapud samay agawa.