Zefanias 3:13 - Manobo Western Bukidnon OT

¹³ Heini sikandan is egkesamà he menge Israilihanen ne kenà ebaal te mezaat; kenè dan edtarùtarù wey ebpenlimbung. Egkaan dan wey edlipezeng ne wazà ebpekepelihandek kandan.’ ”

Zefanias 3:13 Referans Kwoze

Zefanias 2:7

Is tanè niw ed-engkenen te egkesamà he menge etew te Juda. Dutun sikandan ebpemepenabtab te menge uyaǥen dan, ne emun mezukilem diyè dan edhizeǥà te menge valey ziyà te Ashkelon. Edtentenuzan sikandan te Nengazen he Megbevayè dan ne idlikù din is meupiya he kebpekesavuk dan.”

Isaias 60:21

Is langun he menge etew nu egkehimu he metazeng, ne egkaangken dan is tanà he Israel taman te taman. Midlimbag ku sikandan; iring sikandan te pinemula he impemula ku su wey a meveǥayi te zengeg.

Micas 4:4

Is kada etew ebpinuu ziyà te sihung te pinemula zin he paras wey kayu he higus he wazè din igkahandek. Egkehitavù iyan heini su iyan mismu is Nengazen he Mekeǥeǥehem migkaǥi kayi.

Isaias 17:2

Wazè en ed-ubpà diyà te menge inged diyà te Aroer. Egkehimu zà heini he pepenebtavà te menge langgam, ne wazà ebuǥew kandan.

Joel 3:17

Menge tig-Juda, egketuenan niw he iyan a, is Nengazen he Megbevayè niw, mid-ubpà a ziyà te Zion he segradu he vuvungan ku. Ne egkeuman en maan egkehimu he segradu is Jerusalem; kenè ne heini ed-umanan edsurunga te menge etew ziyà te zuma he menge nasyun.

Ezekiel 39:26

Egkelipatan dan en is keelezan dan wey kedluivi zan kedì, emun ebpengungubpaan en sikandan he melinawen wey wazà egkehendekan.

Jeremias 31:33

Migkaǥi pa is Nengazen te, “Is beǥu he kebpekid-uyun he edhimuwen ku ziyà te menge tig-Israel te egkeuma he timpu iyan heini: Idtaǥù ku is menge suǥù ku ziyà te isip dan wey idsurat ku heini ziyà te gehinawa zan. Egkehimu a he Megbevayè dan, ne egkehimu zan he menge etew ku.

Jeremias 30:10

“Umbe kenè kew mahandek wey mesuǥey is menge kevuwazan ni Jacob he menge suluǥuen ku. Iyan a is Nengazen migkaǥi te egkuwaan ku sikiyu ziyà te meziyù he lugar he zutun kew uwita te mibihag keniyu. Ne ed-ubpè kew he zuen kelinew. Wazè en igkehandek niw wey wazè en ebpekezezaat keniyu.

Jeremias 23:4

Ebeǥayan ku sikandan te menge pengulu he ed-atur kandan, ne kenè dan en egkahandek wey egkeheratan, ne wazè en egketazin kandan. Iyan a, is Nengazen, is migkaǥi kayi.”

Isaias 54:14

Ebmelig-en ka su edtinazeng is menge etew nu. Ebpeleǥuyan ka te menge kuntada nu, umbe wazè nu en igkahandek. Kenè en ed-uvey ziyà te kenikew is menge kuntada nu, ne kenè ke en egkeheratan.

Micas 7:14

Mid-ampù is menge Israilihanen diyà te Nengazen he ke sikandan te, “Ventayi key is menge etew nu he migaked nu, te iring te kebantey te perevantey te menge kerehidu. Is menge tanà diyà te peliǥuy zey ne zekelà is egketabtab duen, piru sikami nengungubpaan key kayi te sibsivayan he iyan key zà. Ipeuman nu ipemeluag is tanè dey taman te Bashan wey Gilead iring te nehuna he timpu.

Joel 3:21

Ibpenimales ku is kebpenhimetayi te menge etew ku; edsilutan ku is mibaal kayi ziyà te kandan. Iyan a, is Nengazen, ed-ubpà diyà te Zion.”

Isaias 65:10

Edtuvazan ku sikandan is midangep kayi te kediey. Is menge suǥud diyà te Sharon wey Acor egkehimu he penebtavà te menge uyaǥen dan.

Isaias 63:8

Migkaǥi is Nengazen te, “Tutuu iyan he menge etew ku sikandan; menge anak ku sikandan he kenà edluib kedì.” Umbe midlibri zin sikandan.

Isaias 35:8

Ebeelan dutun te disirtu is meluag he kersada, ne egngezanan heini te “Segradu he Zalan.” Wazà mekesesalà wey tulebung he ebpekeikul zutun. Su para zà haazà te menge etew he edsunud te menge paaǥi te Megbevayà.

Isaias 6:13

Minsan mesamè pa is ikesepulù he vahin te menge Israilihanen diyà te tanà te Israel, edezeetan ǥihapun sikandan. Piru zuen mibpilì ku ziyà te kandan ne iyan sikandan egkesamà. Egkeiring sikandan te tued te kayu he ulayan he mibpiley.”

Salmo 119:3

Wazà sikandan mebaal te mezaat, kekenà, edsunuzen dan is menge paaǥi te Megbevayà.

Salmo 23:2

Iring a te kerehidu he ibpehimeley nu ziyà te penebtavà he zutun is gerabi he memeilem he sagbet. Ne ibpeikul a kenikew ziyà te meleneng he wahig.

Leviticus 26:6

Edhimuwen ku he melinew is lugar niw, umbe ebpekelipezeng kew he wazè niw igkahandek. Edsegseǥen ku is dumezaas he menge langgam, wey wazà menge kuntada he edsurung keniyu.

Job 11:19

Edhizeǥè ka he wazè ebpelihandek kenikew, wey mahabet is ebpetavang kenikew.

Salmo 120:2

Nengazen, libriya a te kezeetan he edhimuwen te menge teruen wey menge limbungan.

Salmo 120:3

Sikiyu is menge limbungan, hengkey vuwa is idsilut te Megbevayà keniyu?

Zefanias 3:5

Piru zutun gihapun is Nengazen te inged dan. Mibeelan te Nengazen is hustu ne wazà sikandin mebaal te kenà hustu. Kada andew ibpeehè din ke hengkey is hustu, ne wazè din heini engkezi te ebaal. Piru heini is lalung he menge etew mibpedayun gihapun te kebaal te mezaat ne wazà sikandan meeled.

Zacarias 8:3

Edlikù a ziyà te Zion, kes inged he Jerusalem, ne ed-ubpà a ziyà. Ne egngezanan is Jerusalem te Metinumanen he Inged wey egngezanan heini is buvungan ku te Buvungan he Segradu.

Zacarias 8:16

Iyan heini ereg he ebeelan niw: Keǥiya niw is tutuu ziyà te kada sevaha keniyu. Iveǥey niw is metazeng he kukuman diyà te menge hukmanan niw he para te keupiyaanan te langun.

2 Cronica 20:30

Umbe, melinawen is ginhedian ni Jehoshafat su midhimu te Megbevayà he kenè sikandin mekepekidtebek te menge etew he nekeliǥuy kandin.

Zacarias 8:12

Ke ebpemula kew ne zuen kelinew. Ebpemeǥas is menge paras, duen egkeraǥun diyà te tanà, ne zuen en dehemug. Heini is langun, ibeǥey ku ziyà te keniyu te egkengesama, ne egkaangken niw heini.