Jeremias 27:18 - Manobo Western Bukidnon OT

¹⁸ Emun tutuu sikandan he menge ebpeneuven ne is ebpengeǥiyen dan ne ziyà ebpuun te Nengazen, ne ipahangyù sikandan diyà te Nengazen he Mekeǥeǥehem, he sikan is nesamà he menge gelemiten diyà te valey te Nengazen, diyà te turuǥan te hadì te Juda, wey turuǥan te hadì te Jerusalem, ne kenè en meuwit diyà te Babilonia.

Jeremias 27:18 Referans Kwoze

1 Samuel 7:8

Migkeǥiyan dan si Samuel te, “Kenè ka engked he ebpengemuyù te Nengazen he Megbevayè tew he luwasa kiw zin kayi te menge Filistihanen.”

Jeremias 18:20

Meupiya is mibeelan ku ziyà te kandan ne ebelesan e zan te mezaat. Mibangbang sikandan su para meulug a zutun. Tentenuzi nu he midangep a ziyà te kenikew te kedhangyù he kenè nu en sikandan kepeuki.

1 Hadì 18:24

Ne pengemuyù kew ziyà te keniyu he ed-ezapen he iyan medretem te hapuy, ne ebpengemuyù a zaan diyà te Nengazen. Ne sikan is edretem te hapuy ziyà te tavun, ne iyan tutuu he Megbevayà.” Ne nekeuyun dutun is menge etew.

1 Samuel 12:23

“Emun mehitenged kediey, layun ku sikiyu ibpengemuyù diyà te Nengazen, su emun kenè ku heini ebeelan ne ebpekesalà a ziyà te Nengazen. Ne ebpenuruen ku sikiyu te kebpengungubpaan he meupiya wey hustu.

1 Samuel 12:19

Migkeǥiyan dan si Samuel te, “Edhangyù key kenikew he, pengemuyù ka ziyà te Nengazen he Megbevayè nu he kenè key pezem mebpematey, su neumanan dà is menge salè dey te kebuyù dey te hadì.”

Malakias 1:9

Migkaǥi si Malakias, “Guntaan, sikiyu is menge memumuhat, hengyua niw is Megbevayà he mehizuwi kiw zin. Piru heeyan he kelasi te menge pemuhat ne ibpemuhat niw kandin, siguradu he kenè kew zin ebpaahaan te keupiya zin. Iyan heini migkaǥi te Nengazen he Mekeǥeǥehem.”

Ezekiel 22:30

“Nengahà a te etew he ebpekelavan te inged su egkehimu he zatù diyà te pid-elangan ku wey menge etew su wey ku kenà mevengkag heini is inged. Piru wazà a meketuredu.

Ezekiel 14:14

Minsan pa ke ziyà te kandan si Noe, si Daniel, wey si Job, ne iyan dà heini is tetelu egkelibri tenged te ketazeng dan. Iyan a, is Nengazen he MEGBEVAYÀ, is migkaǥi kayi.

Jeremias 42:2

Migkaǥi zan diyà te ki Jeremias te, “Edhangyù key ziyà te kenikew he pengemuyù ka ziyà te Nengazen he Megbevayè nu para kenami te nesamà. Neehè nu he mezakel key zengan, iyan, guntaan deisey key zà.

Jeremias 15:1

Migkaǥi is Nengazen kayi te kedì te, “Minsan si Moises pa wey si Samuel is ebpehizuhizu kediey para kayi he menge etew, ne kenè ku sikandan egkehizuwan. Umbe ipekeziyù sikandan kayi te etuvangan ku. Ipawè niw en sikandan!

Jeremias 7:16

“Umbe sikew, Jeremias, kenè ka ampù para kayi he menge etew. Kenè ka pehizuhizu wey hangyù kayi te kedì para kandan, su kenè ku sikew ebpemineǥen.

2 Cronica 32:20

Nengumew-umew te Megbevayà diyà te langit si Hadì Hezekia wey si Isaias he ebpeneuven he anak ni Amos.

1 Hadì 18:26

Umbe, migkuwa zuen te menge ebpeneuven ni Baal is tudu he vaka he mid-uwit diyà te kandan, ne mid-andam dan heini. Ne nengemuyù dan diyà te ki Baal puun te meselem taman te meudtu. Igkulahì dan en is lalag te, “He Baal, tevaka key kenikew!” Edsayewsayew en sikandan is edlingutlingut duen te pemuhatà he mibeelan dan. Piru wazà mibeǥey te hangyù dan.

Genesis 20:17

Tenged te kegkuwaa ni Abimelec ki Sara, mibpengelinteuwan te Megbevayà he kenà mekaanak is langun he menge vahi zutun te valey zin. Umbe mid-ampù si Abraham diyà te Megbevayà, ne mibpengelinteuwan te Megbevayà he meulii si Abimelec te zaru zin wey is esawa zin wey is menge uripen din he vahi su wey zan mekeuman mekaanak.