Jeremias 24:10 - Manobo Western Bukidnon OT

¹⁰ Ibpaaǥi ku ziyà te kandan is tebek, bitil, wey menge zaru taman te egkaamin ebpematey sikandan keniyan te tanà he imbeǥey ku kandan wey te menge kepuun dan.”

Jeremias 24:10 Referans Kwoze

Isaias 51:19

Dezuwa he vangkit is nehitavù kenikew: nevengkag ka tenged te tebek wey nerasey te vitil is menge etew nu. Wazà nesamà duen te menge etew nu he egkehimu he edigdig wey edlipey kenikew.

Ezekiel 33:27

Iyan a, is uuyag he Nengazen he MEGBEVAYÀ, nenangdù he siguradu he ebpemematey te tebek sikan is nengesamà he uuyag duen te nerundus he inged. Is menge nengesamà he uuyag diyà te menge vevesukà edewiyen te zumezaas he menge langgam, ne is duma kandan he ziyà te menge elesà wey menge surung ebpematey te zaru.

Ezekiel 7:15

“Is menge etew ziyà te ǥawas te inged, ebpatey te tebek. Ne is kenà ed-awà diyà te inged ebpatey te zaru wey vitil.

Jeremias 34:17

“Umbe siak, is Nengazen, migkaǥi a te geina te wazà a keniyu pezumdumahi su wazè niw veǥayi te vayàbayà is menge uripen niw he iring niw he Hebriyuhanen, ebeǥayan ku sikiyu te vayàbayà he ebpematey pinaaǥi te tebek, bitil, wey menge zaru. Tenged te egkeulaula keniyu egkelimezangan is langun he ginhedian kayi te kelibutan.

Jeremias 27:8

“ ‘Piru ǥuntaan, emun duen nasyun etawa ginhedian he kenà ebpenilbi etawa kenà ebpesakup ki Hadì Nebucadnezar he hadì te Babilonia, edsilutan ku haazà he nasyun etawa ginhedian pinaaǥi te tebek, bitil, wey menge zaru taman te igkepesakup ku sikandan ki Nebucadnezar.

Jeremias 19:7

Kayi he lugar edezeetan ku is pelanu te menge tig-Juda wey menge tig-Jerusalem. Ibpehimetayan ku sikandan te menge kuntada zan pinaaǥi te tebek, ne ibpekaan ku is menge lawa zan te menge tagbis wey zumezaas he menge langgam.

Jeremias 16:4

Ebpematey sikandan tenged te grabi he zaru. Wazè en egkesamà he egkeseeng wey edleveng kandan, kekenà, ebpekepeyapat is menge lawa zan he henduen be te menge tai he ebpekepeyapat diyà te tanà. Is duma kandan ebpematey tenged te tebek wey vitil, ne egkeenen sikandan te menge tagbis wey zumezaas he menge langgam.”

Jeremias 15:2

Emun ed-insà sikandan ke hendei zan ebpevayà, keǥiyi nu te iyan heini migkaǥi ku: Is midtelaan en is kebpatey zin ne ebpatey. Is duma ibanglis kandan is kebpatey pinaaǥi te tebek, ne is duma pinaaǥi te vitil. Ne is duma pa ibanglis kandan is kegkevihag.

Jeremias 9:16

Ibpeyapat ku sikandan diyà te zuma he menge nasyun he wazè dan duen hanew wey is menge kepuun dan. Ibpezal-as ku sikandan te menge kuntada zan taman te egkaamin sikandan egkepatey.”

Jeremias 5:12

Wazè dan megkaǥi te tutuu mehitenged kedì. Migkaǥi sikandan te, ‘Kenè kiw ebmenuwen te Nengazen! Wazà kezeetan he ebpekeuma ziyà te kenitew; wazà tebek etawa vitil.

Deuteronomio 28:21

Ibpaaǥi te Nengazen diyà te keniyu is menge zaru taman te egkengezeetan kew ziyà te tanà he edselezan niw wey ed-engkenen niw.

Jeremias 21:9

Is minsan hentei he kenà ed-awà kayi he inged ebpatey te tebek, bitil, etawa zaru. Piru sikan is egawas wey edsurindir ziyà te menge tig-Babilonia he edsurung keniyu ne egkeuyag-uyag. Uya, egkelibri is untung din.

Jeremias 42:17

Uya, is langun he egkesuat he ed-ubpà diyà te Ehipto ebpatey te tebek, bitil, wey zaru. Wazà minsan hentei kandan he egkelibri etawa ebpekelingkawas te kezeetan he ibpeseǥazan ku kandan.’

1 Hadì 14:15

Edsilutan te Nengazen is menge etew ziyà te Israel taman te ebpengerkeren sikandan iring te kegkerkera te tigbew he egkeigù te seleg te wahig. Id-awè din sikandan kayi te meupiya he tanà he imbeǥey zin diyà te menge kepuun dan, ne ibpeyapat din sikandan diyà te egkehunaan te Wahig he Eufrates su ǥeina te midhimu zan he mepauk sikandin pinaaǥi te kebpehitindeg dan te tukud he simbulu te vahi he ed-ezapen he si Ashera.

Jeremias 9:15

Umbe siak, is Nengazen he Mekeǥeǥehem, he Megbevayà te Israel, migkaǥi a te ibpekaan ku heini he menge etew te mepait he menge keenen wey ibpeinum ku te wahig he zuen duen hilu.

Jeremias 14:12

Minsan mebpuasa pa sikandan, ne kenè ku ebpemineǥen is kebuyù dan te tavang kayi te kediey. Minsan mebpemuhat pa sikandan te menge pemuhat he edtutungen wey pemuhat he para gasa, ne kenè ku heini edewaten. Kekenà, ebpenhimetayan ku sikandan pinaaǥi te tebek, bitil, wey menge vangkit.”

Jeremias 29:17

Ebpeeǥiyan ku sikandan te tebek, bitil, wey menge zaru. Egkeiring sikandan te neredak he higus he kenà egkekaan.

Jeremias 29:18

Uya, edlislisezen ku sikandan pinaaǥi te tebek, bitil, wey zaru, ne egkahandek is langun he menge ginhedian tenged te egkehitavù kandan. Edsegseǥen ku sikandan pehendiyà te zuma he menge nasyun ne zutun sikandan ebpenrewaki, edsudien, wey ed-un-undahan.

Jeremias 32:24

Ne ǥuntaan midtambù te tanà is menge tig-Babilonia kayi te kilid te verengbeng te Jerusalem he egkeveyaan dan te kedseled dan kayi te inged su wey zan maaǥew heini. Ne tenged te tebek, bitil, wey zaru, egkaaǥew te menge tig-Babilonia heini is inged su iyan heeyan migkaǥi nu.

Jeremias 32:25

Piru minsan pa te iyan heini, Nengazen he MEGBEVAYÀ, midsuǥù a kenikew te kebpemasa te vevesukà he ebeyazan heini te pelata ziyà te etuvangan te menge tistiǥus, Minsan pa te hapit en egkaaǥew te menge tig-Babilonia heini is inged.”

Jeremias 42:22

Umbe, egkeǥiyen ku keniyu he siguradu he ebpematey kew te tebek, bitil, wey zaru diyà te Ehipto, he iyan egkesuatan niw te ed-ubpa.”

Ezekiel 6:11

Ne migkaǥi is Nengazen he MEGBEVAYÀ kayi te kedì te, “Sumbaǥa nu is palad nu, padewpadew ka, ne pemensag ka te, ‘Hanu ve!’ te kebpaahaa nu te kegkeseeng wey kegkepauk nu te menge etew te Israel, tenged te langun he mezaat wey utew mahawag he menge ulaula zan. Iyan heini hinungdan te kebpematey zan pinaaǥi te tebek, bitil, wey zaru.