Genesis 7:4 - Manobo Western Bukidnon OT

⁴ Su egkepasad is pitu he andew puun guntaan, ibpeuzanan ku is tivuuk he kelibutan, taman te 40 he andew wey 40 he kezukileman, su wey melimas is minsan hengkey he egeǥehinawa he linimbag ku.”

Genesis 7:4 Referans Kwoze

Genesis 7:17

Midsigudu med-uzan kayi te kelibutan seled te 40 he andew. Mibmezalem is wahig taman te midletew sikan is arka.

Genesis 7:12

Ne mid-uzanan is kelibutan taman te 40 he andew wey 40 he kezukileman.

Genesis 6:17

Su ibpelapey ku is langun he menge wahig dini te tanà su wey melimas is minsan hengkey he egeǥehinawa zini te kelibutan. Ne egkeǥerà is minsan hengkey zini te tanà.

Genesis 6:13

ne migkaǥi sikandin diyà te ki Noe te, “Neisip ku en he edlimasen ku is tivuuk he menusiyà. Su tenged kandan, nekeeneb te kelibutan is kelelalung, ne tenged dutun id-awè ku sikandan dini te tanà.

Genesis 6:7

Umbe ke sikandin te, “Edlumpiyuwan ku is kelibutan su edlimasen ku zutun is menge etew he linimbag ku. Edhimetayan ku is menge etew, menge langgam, menge keranapranap wey is menge tagbis he ziyà te hewhewanan, su deyzey pa pezem ke wazè ku sikandan limbaǥa.”

Salmo 69:28

Penasa nu is menge ngazan dan diyà te libru he edlistahan nu te menge uuyag, ne kenè nu sikandan ilista zuma te menge metazeng.

Amos 4:7

“Iyan a mid-eǥen te uzan te tetelu he vulan human is tiraǥun. Mibpeuzanan ku is duma he menge inged piru is duma wazè ku peuzani. Mibpeuzanan ku is duma he menge pemuleey piru is duma mibmemaza.

Job 28:25

Hein inhiyup din is keramag, wey hein midsukud din ke sengemenu kezekelà is uzan he ibpetanè din,

Job 22:16

Nepenggevuan is untung dan; iring sikandan te pundasyun te valey he naanud te zalem.

Genesis 8:12

Ne midtaǥad pa maan si Noe te pitu pa he andew zutun, ne impelayang din en maan haazà is limuken, piru wazè en medlikù diyà te kandin.

Genesis 7:10

Ne hein netuman en haazà is pitu he andew, midlapey is menge wahig diyà te kelibutan.

Genesis 8:10

Ne midtaǥad pa si Noe te pitu he andew ne impelayang din en maan haazà is limuken he ebpuun te arka.

Genesis 6:3

Ne migkaǥi zutun is Nengazen te, “Haaza is gehinawa ku he imbeǥey ku ziyà te menusiyà, kenè ku idtuǥut he wazà pidtemanan te kedtuvey zin diyà te kandan, su menge etew zà duen sikandan. Ne tenged dutun, edhimuwen ku he puun guntaan, iyan kelugayad te untung din is 120 dà he tuig.”

Genesis 2:5

wazè pa pinemula kayi te kelibutan wey wazè pa zaan benì he nenuvù, su wazè din pa ipeuzan su wazà etew he ebpekaatur te tanà.

Genesis 7:3

Ne kuwa ka zaan te ebpemenlayang diyà te hewhewanan, he pitu he perisan ne ipeseled nu ziyan su wey zuen egkesamà he egkevuwad diyan te kelibutan.

Genesis 8:2

Mid-engked haazà is kedtudà te wahig he ebpuun te utew mezalem he zaǥat ne mid-engked daan is kegkevusbus te utew zekelà he wahig he ziyà ebpuun te hewhewanan, ne midtikdew haazà is utew mereǥes he uzan.